- नहेम्याह 1 - Bundeli Holy Bible

यरूशलेम के लाने नहेम्‍याह चिन्‍तित

¹ हकल्‍याह कौ मोंड़ा नहेम्‍याह के बचन। बीसवें साल के किसलेव नाओं के मईना में, जब मैं शूशन नाओं राजगढ़ में रैत हतो,

² तब हनानी नाओं मोरो एक भईया और यहूदा सें आए भए भौत से मान्‍सन आए; तब मैंने उनसें उन बचे भए यहूदियन के बारे में जो गुलामी सें छूट गए हते, और यरूशलेम के बारे में पूंछो।

³ उनोंरन ने मोय सें कई, “जो बचे भए मान्‍सन गुलामी सें छूटकें ऊ देस में रैत आंय, बे बड़ी बुरई दसा में पड़े आंय, और उनकी निन्‍दराई होत आय; कायसें यरूशलेम की सहरपनाह टूटी भई, और ऊके फाटक जले-भए आंय।”

⁴ जे बातें मैं सुनतई बैठकें रोऊन लगो और बिलात दिना लौ रोऊत रओ; और सरग के यहोवा परमेसुर के सामूं उपास करत रओ और ऐसो कहकें बिन्‍तवाई करत रओ,

⁵ “हे सरग के यहोवा परमेसुर, हे महान और भयजोग ईसुर! तें जो अपने प्रेम रखबेवारे और हुकम मानबेवारे के बारे में अपनी बाचा पालत और उनपै दया करत आय;

⁶ तें कान लगाए और आंखें खोलें रईयो कि जौन बिन्‍तवाई मैं तोरो दास ई बेरा तोरे दास इस्राएलियन के लाने दिन-रात करत रैत आंव, ऊहों तें सुन ले। मैं इस्राएलियन के पापन हों जो हमोंरन ने तोरे बिरोद में करे आंय, मान लेत आंव। मैं और मोरे बाप के घराने दौनऊ ने पाप करो आय।

⁷ हमने तोरे बिरूद्ध में भौत बुराई करी आय, और जो हुकम, तौर-तरीके और बिधियां जो तेंनें अपने दास मूसा हों दए हते, उनहों हमने नईं मानो।

⁸ ऊ बचन हों याद कर, जो तेंनें अपने दास मूसा सें कय हते, ‘तुमोंरें बिसवासघात करौ, तौ मैं तुमोंरन हों देस देस के मान्‍सन में तितर-बितर करहों।

⁹ परन्‍त जदि तुमोंरें मोरी कोद फिरौ, और मोरे हुकम मानौ, और उन पै चलौ, तौ चाए तुमोंरन में सें निकारे भए मान्‍सन आकास की छोर में भी होबें, तौभी मैं उनहों उतै सें इकट्ठो करकें ऊ जागां में पोंचाहों, जीहों मैंने अपने नाओं के रैबे के लाने चुन लओ आय।’

¹⁰ अब बे तोरे दास और तोरी परजा के लोग आंय जिनहों तेंनें अपनी बड़ी ताकत और ताकतवारे हांथन सें छुड़ा लओ आय।

¹¹ हे पिरभु तोसें जा बिनती आय, कि तें अपने दास की बिन्‍तवाई पै, और अपने उन दासों की बिन्‍तवाई पै, जो तोरे नाओं कौ डर मानबो चाहत आंय, कान लगाकें सुन ले और आज अपने दास कौ काम सफल कर, और ऊ मान्‍स हों ऊपै दयालु कर दे।” मैं तौ राजा कौ पियाबेवारो हतो।