- मरकुस 9 - Bundeli Holy Bible

¹ और ऊ ने उन से कओ; मैं तुम से सांची कैत आंव, कि जौन इतै ठांड़े आंय, उन में से कैऊ ऐसे आंय, कि जब लौ परमेसुर के राज्य हां ताकत के संग्गै आओ भओ न तक लें, तौ लौ मौत को स्वाद बिल्कुल न चख हैं।

² छै दिना के बाद यीशु ने पतरस और याकूब और यूहन्ना हां संग्गै लओ, और अकेले में कौनऊं ऊंचे पहरवा पै लै गओ; और उनके सामने ऊकौ रूप बदल गओ।

³ ऊकौ उन्ना ऐसो चमकन लगो और इतै लौ ज्यादा उजरौ भओ, कि धरती पै कौनऊं धोबी लौ ऊं सो उजरौ नईं कर सकत।

⁴ और उने मूसा के संग्गै एलिय्याह दिखाई पड़ो; और बे यीशु के संग्गै बात करत हते।

⁵ ईपै पतरस ने यीशु से कओ; हे रब्बी, हमाओ इते रहबो अच्छो आय: ईसे हम तीन मंड़प बनाएं; एक तोरे लाने, एक मूसा के लाने, और एक एलिय्याह के लाने।

⁶ कायसे ऊ नईं जानत हतो, कि का उत्तर देबे; ईसे कि बे भौत डरा गए हते।

⁷ तब एक बादल ने उने ढंक लओ, और ऊ बादल में से जा आवाज आई, कि जौ मोरो प्यारो बेटा आय; ऊ की सुनो।

⁸ तब उन ने चारऊ कोद नजर डाली, और यीशु हां छोड़ अपने संग्गै और कोऊहां नईं तको।

⁹ पहरवा से उतरत भए, ऊ ने उने आज्ञा दई, कि जब लौ मान्स कौ बेटा मरे भए में से न जी उठै, तब लौ जो कछु तुमने तको आय ऊ कोऊ से न कईयो।

¹⁰ उन ने ई बात हां याद रखो; और आपस में बहस करन लगे, कि मरे भए में से जी उठबे कौ का मतलब आय?

¹¹ और उन ने ऊसे पूछो, शास्त्री काय कैत आंय, कि एलिय्याह कौ पेंला आबो निश्चित आय?

¹² ऊ ने उने उत्तर दओ, कि एलिय्याह सांचऊ में पेंला आके सब कछु ठीक कर है, लेकिन मान्स के बेटा के बारे में जौ काय लिखो आय, कि ऊ भौत दुख उठा है, और तुच्छ गिनो जै है?

¹³ लेकिन मैं तुम से कैत आंव, कि एलिय्याह तो आ चुको, और जैसो ऊके बारे में लिखो आय, उन ने जैसो ऊके संग्गै चाहो सो करो।

¹⁴ और जब ऊ चेलन के ऐंगर आओ, तो तको कि उनके चारऊ कोद भौत भीड़ लगी आय और शास्त्री उनके संग्गै बहस कर रए आंय।

¹⁵ और ऊहां देखतई सबरे भौत अचम्भा करन लगे, और ऊके तरफ हां दौड़ के ऊसे नमस्कार करो।

¹⁶ ऊ ने उनसे पूछो; तुम इन से का बहस कर रए आव?

¹⁷ भीड़ में से एक ने ऊहां उत्तर दओ, कि हे गुरू, मैं अपने बेटा हां, जीमें एक गूंगी आत्मा समाई आय, तोरे ऐंगर लाओ हतो।

¹⁸ जां कऊं बा ऊहां पकड़त आय, उतईं पटक देत आय: और ऊ मों में फैन भर लाऊत, और दांत पीसत, और सूकत जात आय; और मैंने तोरे चेलन से कओ हतो कि बे ऊहां निकाल देबें लेकिन बे निकाल नईं पाए।

¹⁹ जौ सुनके ऊ ने उन से उत्तर देके कओ: हे अबिसवासी लोगो, मैं कब लौ तुमाए संग्गै रै हों? और कब लौ तुमाई सै हों? ऊहां मोरे ऐंगर ले आओ।

²⁰ तो बे ऊके ऐंगर ले आए: और जब ऊ ने ऊहां तको, तो तुरतईं ऊ आत्मा ने ऊहां मरोड़ो; और ऊ जमीन पे गिरो, और मों से फैन बहात भओ लोटन लगो।

²¹ ऊ ने ऊके बाप से पूछो; ईकी जा हालत कब से आय?

²² ऊ ने कओ, बचपन से: ऊ ने ईहां मारबे के लाने कभऊं आगी और कभऊं पानी में गिराओ; लेकिन अगर तें कछु कर सकै, तो हम पै तरस खाके हमाओ भलौ कर।

²³ यीशु ने ऊसे कओ; अगर तें कर सकत आय; जा का बात आय? बिसवास करबे वालन के लाने सब कछु हो सकत आय।

²⁴ लड़का के बाप ने तुरतईं गिड़गिड़ा के कओ; हे प्रभु, मैं बिसवास करत आंव, मोरे अबिसवास कौ उपाय कर।

²⁵ जब यीशु ने तको, कि लोग दौड़ के भीड़ लगा रए आंय, तो ऊ ने बुरई आत्मा हां जौ कह के डांटो; कि ऐ गूंगी और बहरी आत्मा, मैं तोहां हुकम देत आंव, ऊ में से कड़ आ, और ऊ में फिन कभऊं न घुसिए।

²⁶ तो बा चिल्ला के, ऊहां भौत मरोर के, कड़ आई, और लड़का मरो भओ सो हो गओ, इतै लौ के भौत लोग कहन लगे, कि ऊ मर गओ।

²⁷ लेकिन यीशु ने ऊकौ हाथ पकड़ के ऊहां उठाओ, और ऊ ठांड़ो हो गओ।

²⁸ जब ऊ घर में आओ, तो ऊके चेलन ने अकेले में ऊसे पूछो, हम ऊहां काय न निकाल सके?

²⁹ ऊ ने उन से कओ, कि जा जात बगैर प्रार्थना के कौनऊं और तरीका से निकल नईं सकत।

³⁰ फिन बे उते से चले, और गलील में होकें जा रय हते, और ऊ नईं चाहत हतो कि कोऊ जाने।

³¹ कायसे कि ऊ अपने चेलन हां उपदेस देत और उन से कहत हतो, कि मान्स कौ बेटा मान्सन के हाथन में पकड़वाओ जै है, और बे ऊहां मार डाल हैं, और ऊ मरबे के तीन दिना बाद जी उठ है।

³² पै जा बात उनकी समझ में नईं आई, और बे ऊसे पूछबे से डरात हते।

³³ फिन बे कफरनहूम में आए; और घर में आके ऊ ने उन से पूछो कि गैल में तुम कौन सी बात पै बहस करत हते?

³⁴ बे चुप्प रए, कायसे कि गैल में उन ने आपस में जा बहस करी हती, कि हम में से बड़ो को आय?

³⁵ तब ऊ ने बैठ के बारहों चेलन हां बुलाओ, और उन से कओ, अगर कोऊ बड़ो होबो चाहे, तो सबसे छोटो और सबकौ सेवक बने।

³⁶ और ऊने एक छोटे से लड़का हां लैके उनके बीच में ठांड़ो करो, और ऊहां गोदी में लैके उनसे कओ।

³⁷ जो कोऊ मोरे नाओं से ऐसे लड़कन में से कोनऊं एक हां अपनात आय; और जो कोऊ मोहां अपनात आय, ऊ मोहां नईं, बल्कि मोरे भेजबेवाले हां अपनात आय।

³⁸ तब यूहन्ना ने ऊसे कओ, हे गुरू, हमने एक मान्स हां तोरे नाओं से बुरई आत्मन हां निकालत तको और हम ऊहां रोकन लगे, कायसे ऊ हमाए पांछू नईं होत हतो।

³⁹ यीशु ने कओ, ऊहां न रोको; कायसे ऐसो कोऊ नईंयां जौन मोरे नाओं से ताकत कौ काम करै, और जल्दी से मोहा बुरओ कै सके।

⁴⁰ कायसे जौन हमाए खिलाफ नईंयां, ऊ हमाई तरफ आय।

⁴¹ जो कोऊ एक कटोरा पानी तुमें ईसें पिलाबै कि तुम मसीह के आओ तो मैं तुम से सच्ची कैत आंव कि ऊ अपनो करमन कौ फल कौनऊं तरीका से न खो है।

⁴² पै जो कोऊ ई छोटन में से जौन मोरे ऊपर बिसवास करत आंय, कोऊहां ठोकर खबाए तो ऊके लाने भलो जौ आय कि एक बड़ी चकिया कौ पाट ऊके गले में लटकाओ जाय और ऊहां समुन्दर में फें क दओ जाए।

⁴³ अगर तोरो हाथ तोहां ठोकर खबाए तो ऊहां काट डाल, टुण्डा होकें जीवन में घुसबो, तोरे लाने ईसे भलो आय।

⁴⁴ कि दो हाथ रहत भए नरक के बीच में ऊ आगी में डालो जाए जौन कभऊं बुझने नईंयां।

⁴⁵ अगर तोरो पांव तोहां ठोकर खबाए तो ऊहां काट डाल।

⁴⁶ लंगड़ौ होकें जीवन में घुसबो तोरे लाने ईसे भलो आय, कि दो पांव होत भए नरक में डालो जाए।

⁴⁷ और अगर तोरी आंख तोहां ठोकर खबाए तो ऊहां निकाल डाल, कनवां होकें परमेसुर के राज्य में घुसबो तोरे लाने ईसे भलौ आय, कि दो आंखें होत भए तें नरक में डालो जाए।

⁴⁸ जहां पै उनको कीड़ा नईं मरत और आगी नईं बुझत।

⁴⁹ कायसे कि हर एक जन आगी से नमकीन करो जै है।

⁵⁰ नोंन अच्छो आय, पै अगर नोंन कौ नोंनपन जात रए, तो ऊहां कीसे स्वाद में कर हौ? अपने में नोंन राखौ और आपसी में मेल-जोल से रऔ।