- मरकुस 5 - Bundeli Holy Bible

¹ और बे झील के ऊ पार गिरासेनियों के देश पोंचे।

² और जब ऊ नाव पै से उतरो तो तुरतईं एक मान्स जी में बुरई आत्मा हती कबरों से निकल के ऊसे मिलो।

³ ऊ कबरों में रैत हतो। और कोऊ ऊहां सांकरन से भी न बांध सकत हतो।

⁴ कायसे ऊ बेर बेर बेड़ियन से और सांकरन से बांधो गओ हतो, पै ऊ ने सांकरन हां तोड़ दओ, और बेड़ियन के टुकड़ा टुकड़ा कर दए हते, और कोऊ ऊहां वस में न कर सकत हतो।

⁵ ऊ लगातार रात दिन कबरन में और पहरवन में चिल्लात हतो, और खुद हां पथरन से घायल करत हतो।

⁶ ऊ यीशु हां दूरई से देख के दौड़ो, और ऊहां परनाम करो।

⁷ और जोर की आवाज में चिल्ला के कओ; हे यीशु, सबसे बड़े परमेसुर के बेटा, मोहां तोसे का काम? मैं तोहां परमेसुर कौ कौल धराऊत आंव, कि मोहां पीड़ा न दे।

⁸ कायसे ऊ ने ऊसे कओ हतो, हे बुरई आत्मा, ई मान्स में से कड़ आ।

⁹ यीशु ने ऊसे पूछो; तोरो का नाओं आय? ऊ ने ऊसे कओ; मोरो नाओं फौज आय; कायसे हम भौत से आंय।

¹⁰ और ऊ ने ऊसे भौतई बिनती करी, कि हमें ई देश से बाहर न भेज।

¹¹ उतईं पहरवा पै सुअरन कौ एक बड़ौ झुण्ड चर रओ हतो।

¹² और उन ने ऊसे बिनती करके कओ, कि हमें उन सुअरन में भेज दे, कि हम उनके भीतर जाबें।

¹³ सो यीशु ने उने हुकम दओ और बुरई आत्मा निकल के सुअरन के भीतर घुस गईं, और झुण्ड जो कोनऊं दो हजार गिनती में हतो, पहरवा पै से झपट के झील में गिर पड़ो और डूब के मर गओ।

¹⁴ और उनके चराबेवारन ने दौड़ लगा के नगर और गांवन में जा खबर सुनाई।

¹⁵ और जो भओ हतो, मान्स ऊहां देखबे आए। और यीशु के ऐंगर आके, बे ऊहां जीमें बुरई आत्माएं हतीं, यानी जीमें फौज समाई हती, उन्ना पैरें और अच्छी तरहां से बैठो देख के, डरा गए।

¹⁶ और देखबे वालन ने ऊ को जीमें बुरई आत्माएं हतीं, और सुअरन कौ पूरौ हाल, उने कह सुनाओ।

¹⁷ और बे ऊसे बिनती करके कहन लगे, कि हमाए सिवानन से चलो जा।

¹⁸ और जब ऊ नाव पै चढ़न लगो, तो ऊ जीमें पेंला बुरई आत्माएं हतीं, ऊसे बिनती करन लगो, कि मोहां अपने संग्गै रहन दे।

¹⁹ लेकिन ऊ ने ऊहां आज्ञा न दई, और ऊसे कओ, अपने घरै जाके अपने लोगन हां बता, कि तोपे दया करके प्रभु ने तोरे लाने कैसे बड़े काम करे आंय।

²⁰ ऊ जाके दिकपुलिस नगर में ई बात कौ परचार करन लगो, कि यीशु ने मोरे लाने कैसे बड़े काम करे; और सबरे अचम्भा करत हते।

²¹ जब यीशु फिन नाव से ऊ पार गओ, तो एक बड़ी भीड़ ऊके ऐंगर जमा हो गई; और ऊ झील के किनारे हतो।

²² और याईर नाओं प्रार्थनाघर के सरदारों में से एक आओ, और ऊहां देख के, ऊके गोड़ों में गिरो।

²³ और ऊ ने जौ कह के भौतई बिनती करी, कि मोरी हलकी बिटिया मरबे पे आय: तें आके ऊ पै हाथ धर दे, कि बा ठीक होकें जिन्दा रैबे।

²⁴ तब बे ऊके संग्गै चले; और बड़ी भीड़ ऊके पाछें हो चली, इतै लौ की लोग ऊ पे गिरे पड़त हते।

²⁵ और एक बईयर, जीहां बारह साल से खून बहबे को रोग हतो।

²⁶ और जीने मुतके बैद्यों से बड़ो दुख उठाओ और अपनौ सबरो धन खर्च करबे पै भी कछु ठीक न भई हती, बल्कि और रोगी हो गई हती।

²⁷ यीशु की चरचा सुनके, भीड़ में ऊके पांछू से आई, और ऊके उन्ना हां छू लओ।

²⁸ कायसे बा कैत हती, कि अगर मैं ऊके उन्ना हां छू लैहों, तो ठीक हो जै हों।

²⁹ और तुरतईं ऊकौ खून बहवो बन्द हो गओ; और ऊ ने अपनी देह में जान लऔ, कि मैं ऊ बीमारी से ठीक हो गई।

³⁰ यीशु ने तुरतईं खुद में जान लओ, कि मोय में से ताकत निकली आय, और भीड़ कोद मुड़के पूछो; मोरो उन्ना कीने छुओ?

³¹ ऊके चेलन ने ऊसे कओ; तें देखत आय, कि भीड़ तोपे गिरी पड़त आय, और तें कैत आय; कि कीने मोहां छुओ?

³² तबई ऊ ने ऊहां देखबे के लाने जीने जौ काम करो हतो, चारऊ कोद नजर दौड़ाई।

³³ तब बा बईर्यर जौ जान के, कि मोरी कैसी भलाई भई आय, डरात और कांपत भई आई, और ऊके गोड़न पै गिरके, ऊसे सबरो हाल सच्चौ सच्चौ बता दओ।

³⁴ ऊ ने ऊसे कओ; बेटी तोरे बिसवास ने तोय ठीक करो आय: कुशल से जा, और अपनी ई बीमारी से बची रै।

³⁵ ऊ ऐसो कैई रओ हतो, कि प्रार्थनाघर के सरदार के घर से लोगन ने आके कओ, कि तोरी बिटिया तो मर गई; अब गुरू हां काय तकलीफ देत आय।

³⁶ जौन बात बे कै रए हते, यीशु ने ऊहां अनसुनी करके, प्रार्थनाघर के सरदार से कओ; डरौ नें केवल बिसवास राखौ।

³⁷ और ऊ ने पतरस और याकूब और याकूब के भाई यूहन्ना हां छोड़, और कोऊहां अपने संग्गै आऊन न दओ।

³⁸ और प्रार्थनाघर के सरदार के घर में पोंच के, ऊ ने लोगन हां भौत रोत और चिल्लात तको।

³⁹ तब ऊ ने भीतर जाके ऊसे कओ, तुम काय हल्ला मचात और रोत आव? बिटिया मरी नईंयां, बल्कि सो रई आय।

⁴⁰ बे ऊ की हंसी करन लगे, लेकिन ऊ ने सब हां निकाल के बिटिया के महतारी बाप और अपने संगियन हां लैके, भीतर जहां बिटिया पड़ी हती गओ।

⁴¹ और बिटिया कौ हाथ पकड़ के ऊसे कओ, “तलीता कूमी”; जी कौ मतलब आय कि “ए बिटिया, मैं तोसे कैत आंव, उठ”।

⁴² और बिटिया तुरतईं उठके चलन फिरन लगी; कायसे कि बा बारह साल की हती। और ई पै लोग भौत अचम्भे में हो गए।

⁴³ फिन ऊ ने उनहां चिता के आज्ञा दई, कि जा बात कोऊ जान न पाबै और कओ; कि ऊहां कछु खाबे के लाने दओ जाए।