- मरकुस 3 - Bundeli Holy Bible

¹ और ऊ प्रार्थनाघर में फिन गओ; और उते एक मान्स हतो, जी कौ हाथ सूख गओ हतो।

² और बे ऊ पै दोष लगाबे के लाने ऊ की घात में लगे भए हते, कि तकें, ऊ विश्राम के दिना ऊहां ठीक करत आय कि नईं।

³ ऊ ने सूखे हाथ वाले मान्स से कओ; बीच में ठाड़े होओ।

⁴ और उनसे कओ; काय विश्राम के दिना भलौ करबो उचित आय कि बुरओ करबो, प्रान हां बचाबो कि मारबो? लेकिन बे चुप्प रए।

⁵ और ऊ ने उनके मन की कड़ाई से उदास होकें, गुस्‍सा से चारऊ तरपी तको, और ऊ मान्स से कओ, अपनो हाथ बढ़ा ऊ ने हाथ बढ़ाओ, और ऊकौ हाथ ठीक हो गओ।

⁶ तबईं फरीसी बाहर जाके तुरतईं हेरोदियन के संग्गै ऊके खिलाफ में सलाह करन लगे, कि ऊहां की प्रकार नास करें।

⁷ और यीशु अपने चेलन के संग्गै झील कोदाईं चलो गओ: और गलील से एक बड़ी भीड़ ऊके पांछू हो लई।

⁸ और यहूदिया, और यरूशलेम और इदूमिया से, और यरदन नदिया के पार, और सूर और सैदा के अगल बगल में एक बड़ी भीड़ जा सुनके, कि ऊ कैसे अचम्भे के काम करत आय, ऊके ऐंगर आई।

⁹ और ऊ ने अपने चेलन से कओ, भीड़ के कारन एक छोटी नाव मोरे लाने तईयार रैबै जीसे बे मोहां दबा न पाबें।

¹⁰ कायसे कि ऊ ने मुतके मान्सन हां साजौ कर दओ हतो; ईसे जितने मान्स रोगी हते, बे ऊहां छूबे के लाने ऊ पै गिरे पड़त हते।

¹¹ और बुरई आत्माएं भी, जब ऊहां तकत हतीं, तो ऊके आंगू गिर पड़त हतीं, और चिल्या के कैत हतीं कि तें परमेसुर कौ बेटा आय।

¹² और ऊ ने उन हां भौत चिताओ, कि मोरी असलियत न बताईयो।

¹³ फिन ऊ पहरवा पै चढ़ गओ, और जिन हां ऊ चाहत हतो उन हां अपने ऐंगर बुलाओ; और बे ऊके ऐंगर चले आए।

¹⁴ तब ऊ ने बारह मान्सन हां अपने ऐंगर रख लओ, कि बे ऊके संगै संगै रएं, और ऊ उन हां पोंचाबे, कि बे प्रचार करें।

¹⁵ और बुरई आत्मन हां निकालबे कौ हक्क राखें।

¹⁶ और बे जे आएं: शमौन जी कौ नाओं ऊ ने पतरस राखो।

¹⁷ और जब्दी कौ बेटा याकूब, और याकूब कौ भईया यूहन्ना, जिनको नाओं ऊ ने बूअनरगिस, यानी गरजन कौ बेटा राखो।

¹⁸ और अन्द्रियास, और फिलिप्पुस, और बरतुलमै, और मत्ती, और थोमा, और हलफई कौ बेटा याकूब, और तद्दी, और शमौन कनानी।

¹⁹ और यहूदा इस्कारियोती, जीनें ऊहां पकड़वा भी दओ।

²⁰ और ऊ घर में आओ: और इतनी भीड़ इकट्ठी भई, कि बे रोटी तक न खा पाए।

²¹ जब ऊके घर के लोगन ने जौ सुनो, तो ऊहां पकड़बे के लाने निकले; कायसे कैत हते, कि ऊकौ चित्त ठिकानें नईंयां।

²² और शास्त्री जो यरूशलेम से आए हते, ऐसो कहत हते, कि ऊ में शैतान आय, और जौ भी, कि ऊ बुरई आत्मन के मुखिया की मदद से बुरई आत्मन हां निकालत आय।

²³ और ऊ उने ऐंगर बुलाके, उनसे कनौत दैके कहन लगो; शैतान कैसे शैतान हां निकाल सकत आय?

²⁴ और अगर कौनऊं राज्य में आपस में मनमुटाव हो जाए, तो ऊ राज्य कैसे टिकाऊ रह सकत आय?

²⁵ और अगर कोनऊं घर में मनमुटाव हो जाबै, तो ऊ घर कैसे टिकाऊ रह सकत आय?

²⁶ और अगर शैतान अपनौ बिरोधी होकें अपनन में मनमुटाव कराबै, तो ऊ कैसे बनो रह सकत आय? ऊ को तो अन्त हो जात आय।

²⁷ पै कोई मान्स कौनऊं ताकतवाले के घर में घुसके ऊकौ माल लूट नईं सकत, जौ लौ कि ऊ पेंला ऊ ताकतवाले हां बांध न ले; और तबई ऊके घर हां लूट लै है।

²⁸ मैं तुमसे सांची कैत आंव, कि मान्सन की सन्तान के सबरे पाप और निन्दा जौन बे करत आंय, माफ करी जै हैं।

²⁹ लेकिन जो कोऊ शुद्ध आत्मा के खिलाफ निन्दा कर है, ऊ कभऊं माफ न करो जै है: बल्कि ऊ ऐसे पाप कौ दोषी हुईये जौन पाप कभऊं खतम न हुईये।

³⁰ कायसे बे कैत हते, कि ऊ में बुरई आत्मा आय।

³¹ और ऊ की महतारी और ऊके भईया आए, और बाहर ठांड़े होकें ऊहां बुलवाओ।

³² और भीड़ ऊके अगल बगल बैठी हती, और उन ने ऊसे कओ; देख, तोरी महतारी और तोरे भईया बाहर तोहां ढूंढ़त आंय।

³³ ऊ ने उने उत्तर दओ, कि मोरी महतारी और मोरे भईया कौन आएं?

³⁴ और उन पै जो ऊके अगल बगल बैठे हते, नजर डाल के कओ, देखो, मोरी महतारी और मोरे भईया जे आंय।

³⁵ कायसे जो कोऊ परमेसुर की इच्छा पे चल है, ओई मोरो भईया और बहिन और महतारी आय।