- मरकुस 16 - Bundeli Holy Bible

¹ जब विश्राम कौ दिना बीत गओ, तो मरियम मगदलीनी और याकूब की महतारी मरियम और शलोमी ने सुगन्धित चीजें मोल लईं, कि आके यीशु की लाश पै मलें।

² और सप्ताह के पहले दिना बड़े भुनसारे, जब सूरज निकलो ही हतो, बे कबर पै आईं।

³ और आपस में कैत हतीं, हमाए लाने कबर के दोरे से पथरा को लुढ़का है।

⁴ जब उन ने आंख उठाई, तो तको पथरा लुढ़को भओ आय! कायसे ऊ भौत बड़ो हतो।

⁵ और कबर के भीतर जाके, उन ने एक जवान हां सफेद उन्ना पैरें भए दांएने कोद बैठो तको, और भौत चकित हो गईं।

⁶ ऊ ने उन से कओ, चकित न होओ, तुम यीशु नासरी हां, जौन क्रूस पै चढ़ाओ गओ हतो, ढूंढ़त आव: ऊ जिन्दा हो गओ आय; इतै नईंयां; तको, जा ओई जांगा आए, जहां पै उन ने ऊहां रखो हतो।

⁷ लेकिन तुम जाओ, और ऊके चेलन और पतरस से कओ, कि ऊ तुम से पेंला गलील हां जै है; जैसो ऊ ने तुम से कओ हतो, तुम उतईं ऊहां देख हौ।

⁸ और बे निकल के कबर से भग गईं; कायसे कि कपकपी और घबराहट उन पै छा गई हती और उन ने कोऊ से कछु नईं कओ, कायसे कि डरात हतीं।

⁹ सप्ताह के पहले दिना इतवार को भोर होतई यीशु जी उठके पैलऊं मरियम मगदलीनी हां जौन में से ऊ ने सात बुरई आत्माएं निकाली हतीं, दिखाई दओ।

¹⁰ ऊ ने जाके ऊके संगियन हां जौन शोक में डूबे हते और रो रए हते, समाचार दओ।

¹¹ और उन ने जौ सुन के कि यीशु जिन्दा है, और ऊ ने ऊहां तको आय, बिसवास न करो।

¹² ईके बाद यीशु दूसरे रूप में उन में से दो मान्स हां, जब बे गांव कोद जा रए हते, दिखाई दओ।

¹³ उन ने भी जाके दूसरन हां समाचार दओ, लेकिन उन ने भी उनकी बात पै बिसवास न करो।

¹⁴ पांछू यीशु उन ग्यारह चेलन हां भी, जब बे भोजन करबे बैठे हते दिखाई दओ, और उनके अबिसवास और मन के कर्रेपन पै उरानों दओ, कायसे कि जिन ने ऊके जी उठबे के बाद ऊहां तको हतो, इन ने उनकी बात पै बिसवास नईं करो हतो।

¹⁵ और यीशु ने चेलन से कओ, तुम पूरी दुनिया में जाके, सबरे संसार के लोगन हां भलो संदेसो परचार करो।

¹⁶ जो बिसवास कर है और बपतिस्मा लै है ओई को उद्धार हुईये, लेकिन जो बिसवास नें कर है ऊ दोषी ठहराओ जै है।

¹⁷ और बिसवास करबे वालन में जे निसानी हुईयें कि बे मोरे नाओं से बुरई आत्मन हां निकाल हैं।

¹⁸ नई नई भाषा बोल हैं, सांपन हां उठा लै हैं, और अगर बे जहरीली चीज पी जाएं तौभी उनकी कछु हानि न हुईये, बे बीमारन पै हाथ धर हैं, और बे ठीक हो जै हैं।

¹⁹ अन्त में प्रभु यीशु उन से बातें करबे के बाद सरग पै उठा लओ गओ, और परमेसुर के दांए कोद बैठ गओ।

²⁰ और चेलन ने निकल के हर जांगा परचार करो, और प्रभु उनके संग्गै काम करत रओ, और उन चिन्हों के द्वारा जौन संगै संगै होत हते, बचन हां पक्को करत रओ। आमीन।