- मरकुस 1 - Bundeli Holy Bible

¹ परमेसुर के बेटा यीशु मसीह के भले संदेसे की शुरुआत।

² जैसो यशायाह अगमवकता की पोथी में लिखो आय कि हेरो, मैं अपने दूत हां तोरे आंगू पठैत आंव, जो तोरे लाने गैल तईयार कर है।

³ जंगल में एक टेरबेवाले कौ बोल सुनाई दे रओ आय कि प्रभु की गैल तईयार करो और ऊ की पक्की गैलें सूदी करो।

⁴ यूहन्ना आओ ऊ जंगल में बपतिस्मा देत हतो, और पापन की माफी के लाने मन बदलबे के बपतिस्मा कौ परचार करत हतो।

⁵ और पूरे यहूदिया देश के, और यरूशलेम के सबरे रैबेवारे निकल के ऊके ऐंगर गए, और अपने पापन हां मान के यरदन नदिया में ऊसे बपतिस्मा लओ।

⁶ यूहन्ना ऊंट के रोंअन कौ उन्ना पैरें और अपनी करयाई में खाल कौ पटुका बांधे रहत हतो और टिडि्डयां और जंगल की मेंपर खात हतो।

⁷ और जौ परचार करत हतो, कि मोरे बाद ऊ आबेवालो आय, जो मोय से जांदा ताकत वालो आय; मैं ई लायक नईंयां कि झुक के ऊ की पनईयों के बंध खोलों।

⁸ मैंने तो तुमें पानी से बपतिस्मा दओ आय, पै ऊ तुमें शुद्ध आत्मा से बपतिस्मा दै है।

⁹ ऊ दिना में यीशु ने गलील के नासरत गांव से आके, यरदन नदी में यूहन्ना से बपतिस्मा लओ।

¹⁰ और जब ऊ पानी से कड़ के ऊपर आओ, सो तुरतईं ऊ ने आकास हां खुलत और आत्मा हां परेवा कैसो अपने ऊपर उतरत तको।

¹¹ और ऐसी आकासवानी भई, कि तें मोरो प्यारो बेटा आय, तोय से मैं खुस आंव।

¹² तबईं आत्मा ने ऊहां जंगल कोद पोंचाओ।

¹³ और जंगल में चालीस दिना लौ शैतान ने ऊ की परीक्षा लई; और ऊ जंगली जानवरन के संग्गै रओ, और सरगदूत ऊ की खुसामद करत रए।

¹⁴ यूहन्ना के पकड़वाए जाबे के बाद यीशु ने गलील में आके परमेसुर के राज कौ भलो संदेसो परचार करो।

¹⁵ और कओ, समय पूरो भओ आय, और परमेसुर कौ राज ऐंगर आ गओ आय; मन बदलौ और भले संदेसे पै बिसवास करौ।

¹⁶ गलील की झील के किनारे किनारे जात भए ऊ ने शमौन और ऊके भईया अन्द्रियास हां झील में जाल डालत तको; कायसे कि बे मछवारे हते।

¹⁷ और यीशु ने उनसे कओ; मोरे पछाऊं चले आओ; मैं तुमें मान्सन कौ मछवारौ बना हों।

¹⁸ बे तुरतईं जाल हां छोड़ के ऊके पछाऊं हो लय।

¹⁹ और कछु आंगू बढ़के, ऊने जब्दी के बेटा याकूब और ऊके भईया यूहन्ना हां, नाव पै जाल हां सुदारत तको।

²⁰ ऊ ने तुरतईं उने बुलाओ; और बे अपने बाप जब्दी हां मजूरन के संग्गै नाव पै छोड़ के, ऊके पछाऊं चले गए।

²¹ और बे कफरनहूम में आए, और ऊ तुरतईं विश्राम के दिना सभा के घर में जाके उपदेस करन लगो।

²² और लोग ऊके उपदेस से चकित भए; कायसे ऊ उन हां शास्त्रियन कैसो नईं वरन् अधकारी कैसो उपदेस देत हतो।

²³ और ओई बेरा, उनकी सभा के घर में एक मान्स हतो, जीमें एक अशुद्ध आत्मा हती।

²⁴ ऊ ने चिल्ला के कओ, हे यीशु नासरी, हमें तोय से का काम? काय तें हमें नास करबे आओ आय? मैं तोहां जानत आंव, तें को आय? परमेसुर कौ शुद्ध मान्स!

²⁵ यीशु ने ऊहां डांट के कओ, चुप्प रै; और ऊ में से कड़ जा।

²⁶ तबईं अशुद्ध आत्मा ऊहां मरोर के, और बड़े जोर से चिल्या के ऊ में से कड़ गई।

²⁷ ईपे सब जनें अचम्भा करत भए आपस में बतकाव करन लगे कि जा का बात आय? जौ तो कोनऊं नओ उपदेस आए! ऊ अधिकार के संग्गै अशुद्ध आत्मन हां भी आज्ञा देत आय, और बे ऊ की आज्ञा मानत आंय।

²⁸ सो ऊ को नाओं तुरतईं गलील के अगल-बगल के पूरे देश में हर जांगा फैल गओ।

²⁹ और ऊ तुरतईं प्रार्थनाघर से निकल के, याकूब और यूहन्ना के संग्गै शमौन और अन्द्रियास के घरै आओ।

³⁰ और शमौन की सास हां ताप चढ़ो हतो, और उन ने तुरतईं ऊके बारे में ऊसे कओ।

³¹ तब ऊ ने ऐंगर जाके ऊकौ हाथ पकड़ के उठाओ; और ऊ को ताप ऊ पै से उतर गओ, और बा उनकी सेवा खुसामद करन लगी।

³² संजा के समय जब सूरज डूब गओ तब लोग सबरे बीमारन हां और उन हां जिनमें बुरई आत्माएं हतीं ऊके ऐंगर ले आए।

³³ और पूरौ नगर दरवाजे पै इकट्ठो भओ।

³⁴ और ऊ ने कैऊ अन हां जो कई तरहां की बीमारियन से दुखी हते, ठीक कर दओ; और कैऊ बुरई आत्मन हां काड़ो; और बुरई आत्मन हां बोलन न दओ कायसे बे ऊहां चीनत हतीं।

³⁵ और भुनसारे के पेंला से भौतऊ पेंला, ऊ उठके निकलो, और एक जंगली जांगा में गओ और उतै प्रार्थना करन लगो।

³⁶ तब शमौन और ऊके संग्गी ऊहां ढूंढ़बे गए।

³⁷ जब ऊ मिलो, सो ऊसे कओ; सब लोग तोहां ढूंढ़ रए आंय।

³⁸ ऊने उनसे कओ, आओ; हम और कऊं अगल बगल की बस्तियन में जाएं, कि मैं उते भी परचार करों, कायसे मैं ऐई हां निकलो आंव।

³⁹ सो ऊ पूरे गलील में उनकी सभाओं में जा जा के परचार करत रओ और बुरई आत्मन हां निकालत रओ।

⁴⁰ और एक कोढ़ी ने ऊके ऐंगर आके, ऊसे बिनती करी, और ऊके सामने टिंगरे टिका के ऊसे कओ; अगर तें चाहे तो मोहां शुद्ध कर सकत आय।

⁴¹ ऊ ने ऊ पै तरस खाके हाथ बढ़ाओ, और ऊहां छूके कओ; मैं चाहत आंव कि तें साजौ हो जा।

⁴² और तुरतईं ऊ को कोढ़ जात रओ, और ऊ साजौ हो गओ।

⁴³ तब ऊ ने ऊहां चिता के तुरतईं विदा करो।

⁴⁴ और ऊसे कओ, देख, कोऊ से कछु न कईये, लेकिन जाके अपने आप हां पुजारी हां दिखा, और अपने साजे होबे के बारे में जो कछु मूसा ने ठैराओ ऊहां भेंट चढ़ा, कि उन पै गवाही होबे।

⁴⁵ लेकिन ऊ बाहर जाके ई बात हां भौत परचार करन लगो, और इते तक फैलान लगो कि यीशु फिन खुलासां नगर में ना जा पाओ, लेकिन बाहरी जंगली जांगा में रओ; और चारऊं कोद से लोग ऊके ऐंगर आत रए।