- मत्ती 7 - Bundeli Holy Bible

¹ लांछन न लगाओ, जीसे तुम पे भी लांछन न लगाओ जाबै।

² कायसे जी भांत तुम लांछन लगात आव, ओई भांत तुम पे भी लांछन लगाओ जै है; और जी हिसाब से तुम नापत आव, ओई हिसाब से तुमाए लाने सोई नापो जै है।

³ तें काय अपने भईया की आंख के तिनूका हां तकत है, और अपनी आंख कौ लठ्ठा तोए नईं सूजत?

⁴ यानि तें अपने भईया से कैसे कह सकत आय, कि आ मैं तोरी आंख कौ तिनूका काड़ देओं।

⁵ हे कपटी, पेंला अपनी आंखन कौ लठ्ठा काड़ ले, तब तें अपने भईया की आंख कौ तिनूका साजो हेर के काड़ सक है।

⁶ शुद्ध बस्त कूकरन हां न देओ, और अपने मोती सुंगरन के आंगू न डारो; कहूं ऐसो न होबै कि बे उन हां गोड़न तरें रौंदें और पलट के तुम हां फाड़ डारें।

⁷ मांगौ, तो तुम हां दओ जै है; ढूढ़ौ, तो तुम पा हौ; खटखटा हौ, तो तुमाए लाने खोलो जै है।

⁸ कायसे जो कौनऊं मांगत आय, ऊहां मिलत आय; और जो खोजत आय, बो पात है? और जो खटखटात आय, ऊके लाने खोलो जै है।

⁹ तुम में से ऐसो कौन मान्स आय, कि जब ऊकौ पूत रोटी मांगे, तो ऊहां पत्थरा दे?

¹⁰ या मछरिया मांगे, तो ऊहां सांप देबे?

¹¹ सो जब तुम बुरय होकें, अपनी लडेर हां साज़ी बस्त देबो जानत आव, तो तुमाओ बाप जौन सरग में रहत आय अपने मांगबे बारन हां साजी बस्त काय न दै है।

¹² ई लाने जैसो तुम चाहत आव, कि मान्स तुमाए संग्गै करें, तुम सोई उन के संग्गै वैसई करो; कायसे पुराने नैम और आगमवकतन की जाई शिक्षा आय।

¹³ सकरे द्वारे से घुसो, कायसे बड़ो आय बो फाटक और चौंड़ी आय बा गैल जो विनास हां लै जात आय; और बिलात आंय जो ऊमें पिड़त आंय।

¹⁴ कायसे सकरो आय बो फाटक और सकरी आय बो गैल जो जीवन की कोद लै जात आय, और तनकई आंय जो ऊमें पिड़ पात आंय।

¹⁵ लबरे आगमवकतन से चौकन्ने रहियो, जौन गाड़रन के भेष धरके तुमाए ऐंगर आत आंय, पर भीतरै से बे भूखे फाड़खाबे वारे बिगना आंय।

¹⁶ उन के फलन से तुम चीन लै हौ का झड़ियन से अंगूर, वा ऊंटकटारे से अंजीर तोड़त आंय?

¹⁷ ऐसई हरएक उमदा पेड़ उमदा फल लात है, पर बुरओ पेड़ो, बुरओ फल देत आय।

¹⁸ उमदा पेड़ बुरओ फल नईं दे सकत, और न बुरओ पेड़ उमदा फल दे सकत है।

¹⁹ हर एक पेड़ जो उमदा फल नईं देत, बो काटो और आगी में बारो जै है।

²⁰ ई लाने तुम उन के फलन से ऊहां चीन लै हौ।

²¹ जो मोसें, हे पिरभू, हे पिरभू कैत आय, उन में से हर एक सरग के राज्य में नईं पिड़ पा है, पर जो मोरे स्वर्गीय बाप की कई पे निंगत आय ओई पिड़ पा है।

²² ऊ दिना बिलात लोग मोसें कै हैं; हे पिरभू, हे पिरभू, का हम ने तोरे नाओं से आगे की बातें नईं बताईं, और तोरे नाओं से भूत प्रेत हां नईं काड़ो, और तोरे नाओं से बिलात अचरज के काम नईं करे?

²³ तब मैं उन से साफ्र कह दै हों कि मैं ने तुम हां कभऊं नईं चीनो, हे बुरय काम करबेवारो, मोरे ऐंगर से दूर रहियो।

²⁴ ई लाने जो कोऊ मोरी इन बातन हां सुनके ऊन हां मानत आय, बो ऊ होसियार मान्स की तरहां हुईये जीने अपनो घर चट्टान पे बनाओ।

²⁵ और पानू बरसो बाढ़ें आईं, आंधी चलीं, और ऊ घर से टकराईं, परन्त बो नईं गिरो, कायसे ऊकी नी चट्टान पे डारी गई हती।

²⁶ पर जो कोई मोरी इन बातन हां सुनत आय और ऊको पालन नईं करत, बो ऊ मूरख की घांई आय जीने अपनो घर रेता पे बनाओ।

²⁷ और पानू बरसो, बाढ़ें आंईं, और आंधी चली, और ऊ घर से टकराईं, और बो गिर पड़ो और पूरो सत्यानास हो गओ।

²⁸ जब यीशु जे बातन कह चुको, तो भीड़ ऊके सन्देसे से चकरया गई।

²⁹ कायसे बो उन के शास्त्रियन के समान नईं परन्त अधकारी के जैसो सन्देसो दे रओ हतो।