- मत्ती 25 - Bundeli Holy Bible

¹ तब सरग कौ राज्य उन दस कुंवारियन जैसो हुईये, जौन अपनी मशालें लैके दूल्हे से मिलबे हां कड़ीं।

² उन में से पांच मूरख और पांच समजदार हतीं।

³ कायसे मूरखन ने अपनी मशालें तो लईं, पर अपने संग्गै तेल नईं लओ।

⁴ पर समजदारन ने अपनी मशालों के संग्गै कुप्पियन में तेल भी भर लओ।

⁵ जब दूल्हे के आबे में देरी हो गई, तो बे सब ऊं घन लगीं और सो गईं।

⁶ आधी रात में हल्ला मचो, कि तको, दूल्हा आ रओ आय, ऊसे मिलबे हां चलो।

⁷ तब बे सब कुंवारियां उठ के अपनी अपनी मशालें ठीक करन लगीं।

⁸ और मूरखन ने समजदारन से कई, हम हां भी अपने तेल में से कछु देओ, कायसे हमाई मशालें बुझबे पे आंय।

⁹ पर समजदारन ने उत्तर दओ, नईं, जे हमाए लाने और तुमाए लाने पूरो न हुईये, भलो आय कि तुम बैंचबे वारन के ऐंगर जाके अपने लाने मोल लै लेओ।

¹⁰ जब बे मोल लेबे हां चली गईं, तो दूल्हा आ गओ, और जौन तईयार हतीं, बे उन के संग्गै ब्याव के घर में चली गईं और द्वार बन्द कर दओ गओ।

¹¹ ईके पाछें बे दूसरी कुंवारियां सोई आके कैन लगीं, हे मालक, हे मालक, हमाए लाने द्वार खोल देओ।

¹² ऊने उत्तर दओ, कि मैं तुम से सांची कहत आंव, मैं तुम हां नईं चीनत।

¹³ ई लाने जागत रहियो, कायसे तुम न तो ऊ दिन हां जानत आंव, और न ऊ बेरा हां।

¹⁴ कायसे जा ऊ मान्स की सी दसा आय, जीने परदेस जाती बेरा अपने चाकरन हां टेर के, अपनी जाजाद उन हां सौंप दईं।

¹⁵ ऊने एक हां पांच रुपईया, दूसरे हां दो, और तीसरे हां एक; यानि हर एक हां ऊकी हैसियत के जैसो दओ, और तब परदेस हां चलो गओ।

¹⁶ जीहां पांच रुपईया मिले हते, ऊने तुरतईं जाके उन से धन्धा करो और पांच रुपईया और कमाए।

¹⁷ ऐई तरहां जीहां दो रुपईया मिले हते, ऊने सोई दो और कमाए।

¹⁸ पर जीहां एक मिलो हतो, ऊने जाके मिट्टी खोदी, और अपने मालक कौ रुपईया ऊमें गाड़ दओ।

¹⁹ बिलात दिना के पाछें उन चाकरन कौ मालक आओ और उन से हिसाब लैन लगो।

²⁰ तब जीहां पांच रुपईया मिले हते, ऊने पांच रुपईया और लाके कहो; हे मालक, तेंने मोय पांच रुपईया दए हते, हेर, मैं ने इन से पांच रुपईया और कमाए आंय।

²¹ ऊके मालक ने ऊसे कई, हे भले और भरोसेमन्द चाकर, तें तनक में भरोसेमन्द रओ; मैं तोय बिलात बस्तन कौ हाकिम बना हों अपने मालक की खुसी में सामिल हो।

²² और जीहां दो रुपईया मिले हते, ऊने भी आके कई; हे मालक, तेंने मोय दो रुपईया दए हते, हेर, मैं ने दो और कमाए आंय।

²³ ऊके मालक ने ऊसे कई, हे भले और भरोसेमन्द चाकर, तें तनक में भरोसेमन्द रओ; मैं तोय बिलात बस्तन कौ हाकिम बना हों अपने मालक की खुसी में सामिल हो।

²⁴ तब जीहां एक रुपईया मिलो हतो, ऊ ने आके कई; हे मालक, मैं जानत हतो, कि तें कड़ो मान्स आय: तें जिते नईं बोत उते काटत आय, और जिते नईं डारत उते से बटोरत आय।

²⁵ ई लाने मैं डरा गओ और जाके मैं ने रुपईया मिट्टी में लुका दओ; हेर, जौन तोरो रुपईया आय, ऊ जौ आय।

²⁶ मगर ऊके मालक ने ऊहां उत्तर दओ, हे दुष्ट और आलसी चाकर; जब तें जौ जानत हतो, कि जिते मैं नईं बोत उते से काटत आंव; और जिते मैं नईं डारत उते से बटोरत आंव।

²⁷ तब तें ऐसो करतो, कि मोरो धन साहूकारन के ऐंगर धर देतो, जीसे कि मैं आके अपनो धन सूद के संग्गै ऊसे ले लेतो।

²⁸ ई लाने ईसे बो रुपईया लै लेओ, और जी के ऐंगर दस रुपईया आंय, ऊहां दै दो।

²⁹ कायसे, जीके ऐंगर आय, ऊहां और दओ जै है; और ऊके ऐंगर बिलात हो जै है: पर जीके ऐंगर नईंयां, ऊसे बो भी लै लओ जै है, जौन ऊके ऐंगर आय।

³⁰ और ई आलसी चाकर हां बायरें के अन्धयारे में डार दो, जिते रोबो और दांत पीसबो हुईये।

³¹ जब मान्स कौ पूत अपनी मईमा में आ है, और सब सरगदूत ऊके संग्गै आ हैं तो बो अपनी मईमा के सिंहासन पर बिराज है।

³² और सब जातियन के जने ऊके सामूं इकट्ठे करे जै हैं; और जैसो गड़रिया, गाड़रन हां छिरियन से नबेर देत आय, वैसई बो उन हां एक दूसरे से नबेर है।

³³ और बो गाड़रन हां अपनी दाहिनी कोद और छिरियन हां बांई कोद ठांड़ी कर है।

³⁴ तब राजा अपनी दाहिनी कोद वारन से कै है, हे मोरे बाप के धन्य मान्सन, आओ, ऊ राज्य के अधकारी हो जाओ, जो संसार के पेंला से तुमाए लाने तईयार करो भओ आय।

³⁵ कायसे मैं भूखो हतो, और तुम ने मोय खैबे हां दओ; मैं पियासो हतो, और तुम ने मोय पानू पिलाओ, मैं परदेसी हतो और तुम ने मोय अपने घरै ठहराओ।

³⁶ मैं नंगो हतो, तुम ने मोय उन्ना पैराए; मैं बीमार हतो, तुम ने मोरी सुधी लई, मैं जेहल में हतो, तुम मोय से मिलबे आए।

³⁷ तब धर्मी ऊहां उत्तर दै हैं कि हे पिरभू, हम ने तोय कबै भूखो तको और खाबे हां दओ? या पियासो तको, और पानू पिलाओ?

³⁸ और हम ने कबै तोय परदेसी जानो और अपने घर में धरो या नंगो तको, और उन्ना पैराए?

³⁹ हम ने कबै तोय बीमार या जेहल खाने में तको और तोसे मिलबे आए?

⁴⁰ तब राजा उन हां उत्तर दै है, मैं तुम से सांची कहत आंव, कि जौन कछु तुम ने मोरे इन हल्के भईयन में से कोऊ एक के संग्गै करो, बो मोरे संग्गै करो।

⁴¹ तब बो बांई कोद वारन से कै है, हे श्रापित लोगो, मोय से दूर होकें ऊ अनन्त आगी में जा पड़ो, जौन शैतान और ऊके दूतन के लाने तईयार करी गई आय।

⁴² कायसे मैं भूखो हतो, और तुम ने मोय कछु खाबे हां नईं दओ, मैं पियासो हतो, और तुम ने मोय पानू नईं पियाओ।

⁴³ मैं परदेसी हतो, और तुम ने मोय अपने घर में नईं ठहराओ; मैं नंगो हतो, और तुम ने मोय उन्ना नईं पैराए; बीमार और जेलखाने में हतो, और तुम ने मोरी खबर नईं लई।

⁴⁴ तब बे उत्तर दै हैं, कि हे पिरभू, हम ने कबै तोय भूखो, या पियासो, या परदेसी, या नंगो, या बीमार, या जेलखाने में तको, और तोरी सेवा नईं करी?

⁴⁵ तब बो उन हां उत्तर दै है, मैं तुम से सांची कहत आंव कि जौन तुम ने इन हल्के से हल्कन में से कोऊ एक के संग्गै नईं करो, बो मोरे संग्गै भी नईं करो।

⁴⁶ जे लोग अनन्त दण्ड भोग हैं, पर धर्मी अनन्त जीवन में जै हैं।