- मत्ती 24 - Bundeli Holy Bible

¹ जब यीशु मन्दर से कड़ के जा रओ हतो, तो ऊके चेले मन्दर हां दिखाबे ऊके ऐंगर आए।

² तब ऊने उन से कई, का तुम जे सब नईं हेरत? मैं तुम से सांची कैत हों, इते एक पत्थरा के ऊपरै दूसरो पत्थरा जुड़ो न रै है, जौन गिराओ न जै है।

³ जब बो जैतून पहरवा पे बैठो हतो, तो ऊके चेले आके ऊसे कैन लगे, हम हां बता की जे बातें कबै हुईयें? और तोरे आबे की, और ई जुग के अन्त की का चिन्हार हुईये?

⁴ ईपे यीशु ने उत्तर दओ, खबरदार रहियो! कोऊ तुम हां न भरमाने पाबै।

⁵ कायसे बिलात जनें मोरे नाओं से जौ कहत आ हैं, कि मैं मसीह आंव: और बिलातन हां भरमा हैं।

⁶ तुम लड़ाईयन और लड़ाईयन की खबर सुन हौ; तको डरियो नईं कायसे इन कौ होबो जरूरी आय, पर ऊ बेरा अन्त न हुईये।

⁷ कायसे जात पे जात और राज्य पे राज्य चढ़ाई कर है, और बिलात जांगा पे काल पड़ हैं, और भुईडोल हुईंयें।

⁸ जे सब बातें पीड़ाओं की शुरूआत हुईयें।

⁹ तब बे सताबे के लाने तुम हां पकरवा हैं, और तुम हां मार डार हैं और मोरे नाओं के काजें सब जातें तुम से अदावट राख हैं।

¹⁰ उन दिना में बिलात लोग ठोकर खा हैं, और एक दूसरे हां पकड़वा हैं, और एक दूसरे से बैर राख हैं।

¹¹ और बिलात लबरे आगमवकता हुईंयें, और बिलातन हां भरमा हैं।

¹² अधर्म बढ़बे से बिलातन कौ प्रेम जुड़ा जै है।

¹³ पर जौन अन्त लौ धीरज धरे रै हैं, ओई कौ उद्धार हुईये।

¹⁴ राज्य कौ जौ सन्देसो सबरे जगत में प्रचार करो जै है, कि सब जातियन पे गवाही होए, तब अन्त आ जै है।

¹⁵ ई लाने जब तुम ऊ उजाड़बेवारी गन्दी बस्त हां जी की चरचा दानिय्येल आगमवकता के द्वारा करी गई हती, पवित्र जांगा में ठांडी तको, (पढ़बेवाले जान लें)।

¹⁶ तब जौन यहूदिया में होबें बे पहरवन पे भग जाबें।

¹⁷ जौन घर की छत पे होबें, बे घर में से कछु लैबे के लाने खालें न उतरें।

¹⁸ और जौन खेतन में होबें, बो अपने उन्ना लैबे के लाने पाछें न लौटें।

¹⁹ उन के लाने हाय, जौन उन दिना पेट से हुईयें और जौन दूध पिलात हुईयें।

²⁰ बिनती करियो; कि तुम हां जाड़े के दिना या सब्त के दिना में भागने न पड़े।

²¹ कायसे ऊ बेरा ऐसी भारी पीड़ा हुईये, जैसो न तो जगत के शुरू से अब लौ भओ, और न कभऊं हुईये।

²² और अगर बे दिना घटाए न जाते, तो एकऊ प्राणी नईं बचतो; पर चुने भयन के काजें बे दिना घटा दए जै हैं।

²³ तब अगर कोऊ तुम से कै है, कि तको, मसीह इते आय! या बो उते आय तो न मानियो।

²⁴ कायसे लबरे मसीह और लबरे आगमवकता उठ ठांड़े हुईयें, और बड़े चिन्ह, और अचम्भे के काम दिखा हैं, इते लौ कि अगर उन कौ बस चलो तो चुने भयन हां भरमा दें हैं।

²⁵ तको, मैं ने पेंलई तुम हां बता दओ आय।

²⁶ ई लाने अगर कोऊ तुम से कैबे, कि बो हार में आय, तो बायरें न कड़ जईयो; तको, बो कुठरियन में आय, तो भरोसा न करियो।

²⁷ कायसे जैसे बिजली पूरब से कड़के पच्‍छिम लौ चमकत आय, ऊंसई मान्स के पूत कौ भी आबो हुईये।

²⁸ जिते लाश होबै, उतईं गिद्ध भी जुड़ हैं।

²⁹ ऊ दिना की पीड़ा के तुरतईं बाद सूरज अन्धयारो हो जै है, और चांद अपनो उजयारो न दै है, और आकास के तारे गिर पड़ हैं, और आकास की सक्तियां हिलाई जै हैं।

³⁰ तब मान्स के पूत की चिन्हार आकास में दिखाई दै है, और धरती की सब जातन के लोग छाती पीट हैं; और लोगबाग मान्स के पूत हां बड़े ठाठ बाट और बल के संग्गै आकास के बादरन पे आत हेर हैं।

³¹ और बो तुरही की तेज आवाज के संग्गै अपने सरगदूतन हां पठै है, और बे चारऊं दिसा से आकास के एक छोर से लैके दूसरे छोर लौ, ऊके चुने भयन हां इकट्ठे कर हैं।

³² अंजीर के पेड़ से जा कनौत सीखो: जब ऊकी डाल कोंरी हो जात और ऊमें कोंपलें कड़न लगत आंय, तो तुम जान लेत आव, कि गरमी की रितु ऐंगर आय।

³³ ऐई तरहां जब तुम इन सब बातन हां होत तकी, तो जान लईयो, कि बो ऐंगर आय, परन्त द्वारई पे आय।

³⁴ मैं तुम से सांची कहत आंव, कि जब लौ जे सबरी बातें पूरी न हो जाबें, ई पीढ़ी कौ अन्त न हुईये।

³⁵ आकास और धरती टल जै हैं, पर मोरी बातें कभऊं न टल हैं।

³⁶ ऊ दिन या ऊ घड़ी के बारे में कोऊ नईं जानत; न तो सरग के दूत, और न पूत, पर केवल बाप।

³⁷ मान्स के पूत कौ आबो, ठीक नूह के दिना के समान हुईये।

³⁸ कायसे पानी की बाढ़ के पेंला के दिना में, जी दिना लौ नूह जहाज में न चढ़ो, ऊ दिना लौ लोग खात पीयत रए और उन में ब्याव शादी होत हतीं।

³⁹ और जब लौ पानू की बाढ़ उन हां बहा न लै गई, तब लौ उन हां कछु भी सुर्त न भई; ओई तरहां मान्स के पूत कौ आबो भी हुईये।

⁴⁰ ऊ बेरा दो मान्स खेत में हुईयें, एक लै लओ जै है और दूसरो छोड़ दओ जै है।

⁴¹ दो बईयरन चकिया पीसत हुईयें, एक लै लई जै है और दूसरी छोड़ दई जै है।

⁴² ई लाने जागत रहियो, कायसे तुम नईं जानत कि तुमाओ प्रभु की दिना आ है।

⁴³ पर जौ सही मानो कि अगर घर के मालक हां पता होतो कि भड़या रात में की बेरा आ है, तो बो जागत रैतो; और अपने घरै सेंध नईं लगन देतो।

⁴⁴ ई लाने तुम भी तईयार रहौ, मान्स कौ पूत ऊ बेरा आ जै है, जी बेरा के लाने तुम सोचत भी नईयां।

⁴⁵ ऐसो भरोसे वारो और समझदार चाकर को आय, जीहां ऊको मालक चाकरन के ऊपरै हाकिम धरै, कि सही बेरा पे उन हां खाबे हां दे।

⁴⁶ धन्य आय, बो चाकर, जीकौ मालक आके ऊहां ऐसो ही करत पाबै।

⁴⁷ मैं तुम से सांची कहत आंव; कि बो ऊहां अपनी सबरी जाजाद पे हाकिम ठहरा है।

⁴⁸ पर जदि बो दुष्ट चाकर सोचे, कि मोरे मालक के आबे में अबै अबेर आय।

⁴⁹ और अपने संगी चाकरन हां मारन लगे, और दारू खोरन के संग्गै खान पीयन लगे।

⁵⁰ तब ऊ चाकर कौ मालक एैसई दिना आ है, जब बो ऊके आबे की आस नईं करत होबै।

⁵¹ और एैसई बेरा जीहां बो जानत होबै, तब बो ऊहां कड़ो दण्ड दैके, और कपटियन के संग्गै ऊहां डार दै है, उते रोबो और दांत पीसबो हुईये।