- मत्ती 22 - Bundeli Holy Bible

¹ यीशु फिन उन से कनौत में कहन लगे।

² सरग के राज्य की तुलना ऊ राजा से करी जा सकत आय, जीने अपने पूत कौ ब्याव करो।

³ ऊने नेवताहारियन हां बुलऊआ करबे के लाने अपने चाकर पठैय; परन्त उन ने आबो नईं चाहो।

⁴ फिन ऊने दूसरे चाकर हां जौ कहके पठैव, नेवताहारियन से कईयो, हेरो; मैं भोजन तईयार कर चुको आंव, मोरे बैल और पले भए ढोर मारे गए आंय: और सब कछु तईयार आय; ब्याव के भोज में आओ।

⁵ पर उन ने कोऊ ध्यान नईं दओ: कोई अपने खेत हां, कोई अपने धन्धे हां।

⁶ और बचे भए लोगन ने ऊके चाकरन हां पकड़ो और उन से बुरओ बरताव करके उन हां मार डारो।

⁷ तब राजा खुन्सया गओ, और अपनी पलटन पठैई और उन हत्यारन हां मार डारो, और उन के नगर में आगी लगवा दई।

⁸ तब ऊने अपने चाकरन से कई, ब्याव कौ भोज तईयार आय, पर नेवताहारी ठीक नईं कड़े।

⁹ ई लाने चौगड्डा पे जाओ, और जितेक जनें तुम हां मिलें, सब हां ब्याव के भोज में टेर लियाव।

¹⁰ तब उन चाकरन ने गलियन में जाके जौन भी भलो या बुरओ उन हां मिलो, सब हां इकट्ठो करो; और ब्याव कौ घर जेवनहारों से भर गओ।

¹¹ जब राजा जेवनहारों हां देखबे भीतर आओ; तो ऊने उते एक मान्स हां तको, जौन ब्याव कौ उन्ना नईं पैरे हतो।

¹² ऊने ऊसे कई, हे मित्र, तें इते ब्याव कौ उन्ना पहिने बिना कैसे आ गओ? बो कछु नईं कह पाओ।

¹³ तब राजा ने अपने चाकरन से कई, ऊके हाथ और गोड़े बांध के ऊहां बायरें अन्धयारे में डार दो, उते रोबो, और दांत पीसबो हुईये।

¹⁴ कायसे बुलाए भए तो बिलात पर चुने भए तनक से आंय।

¹⁵ तब फरीसियन ने जाके आपस में विचार करो, कि ऊहां की तरहां बातन में फंसाएं।

¹⁶ ई लाने उन ने अपने चेलन हां हेरोदियन के संग्गै ऊके ऐंगर जौ कहबे हां पठैव, कि हे गुरू; हम जानत आंय, कि तें सच्चो आय; और परमेसुर की गैल सच्चाई से सिखात आय; और कोऊ की परवाह नईं करत, कायसे तें मों हेरी बात नईं करत।

¹⁷ ई लाने हम हां बता कि तें का समजत आय? कैसर हां चुंगी देबो सही आय, या नईं?

¹⁸ यीशु ने उन कौ छल जानके कई, हे कपटियो; तुम मोय काय परखत आव?

¹⁹ मोय बो सिक्का दिखाओ: जीसे चुंगी चुकाई जात आय, तब बे ऊके ऐंगर एक दीनार ले आए।

²⁰ ऊने उन से कई, जा मूरत और नाओं की कौ आय?

²¹ उन ने ऊसे कई, कैसर कौ; तब ऊने उन से कई; जौन कैसर कौ आय, बो कैसर हां देओ; और जौन परमेसुर कौ आय, बो परमेसुर हां देओ।

²² जौ सुनके बे अचरज में पड़ गए, और ऊहां छोड़ के चले गए।

²³ ओई दिना कछु सदूकी ऊके ऐंगर आए, जो कहत आंय कि मरे भयन कौ जी जाबो हैई नईंयां, और ऊसे पूछन लगे।

²⁴ कि हे गुरू; मूसा ने कई हती, अगर कोऊ मन्सेलू बिना बच्चा पैदा करे मर जाए, तो ऊको भईया ऊकी घरवारी से ब्याव करके, अपने भईया के लाने वंस पैदा करे।

²⁵ हमाए इते सात भईया हते; पेंला ब्याव करके मर गओ; और बच्चा न होबे पे अपनी घरवारी हां अपने भईया के लाने छोड़ गओ।

²⁶ ऐई तरहां दूसरे और तीसरे ने भी करो, और सातवें लों जौई भओ।

²⁷ और आखरी में बा बईयर सोई मर गई।

²⁸ ई लाने मरे भयन में से जी जाबे पे, बो उन सातई में से कौन की घरवारी हुईये? कायसे बो तो सबई की घरवारी बनी रई।

²⁹ यीशु ने उन हां उत्तर दओ, तुम बिलोरा में पड़ गए आव; कायसे तुम धर्मशास्त्र और परमेसुर की शक्ति हां नईं चीनत।

³⁰ कायसे मरे भयन के जी जाबे पे ब्याव शादी नईं हुईये; पर बे सरग में परमेसुर के दूतन घांई हुईयें।

³¹ का मरे भयन के फिन से जी जाबे के बारे में तुम ने जौ बचन नईं पढ़ो, जौन परमेसुर ने तुम से कई।

³² कि मैं इब्राहीम कौ परमेसुर, और इसहाक कौ परमेसुर, और याकूब कौ परमेसुर आंव? बो तो मरे भयन कौ नईं, परन्त जियत वारन कौ परमेसुर आय।

³³ जब लोगन ने जा सुनी तो बे ऊके बोल से अचरज में पड़ गए।

³⁴ जब फरीसियन ने सुनी, कि ऊने सदूकियन कौ मों बन्द कर दओ; तो बे जुरे।

³⁵ और उन में से एक जौन मुखिया हतो परखबे के लाने, ऊसे सवाल करो।

³⁶ हे गुरू; रीतियन में कौन सी आज्ञा बड़ी आय?

³⁷ ऊने ऊसे कई, तें परमेसुर अपने पिरभू से अपने सारे मन और अपने सारे प्राण और अपनी सारी बुद्धि से प्रेम कर।

³⁸ बड़ी और सही आज्ञा तो जाई आय।

³⁹ और ऐई तरहां दूसरी भी आय, कि तें अपने पड़ोसी से अपने समान प्रेम कर।

⁴⁰ जेई दो आज्ञाएं सारी रीतियन और आगमवकतन कौ आधार आय।

⁴¹ जब फरीसी जमा हते, तब यीशु ने उन से पूंछो।

⁴² कि मसीह के बारे में तुम का समजत आव? बो कौन को पूत आय? उन ने ऊसे कई, दाऊद कौ।

⁴³ ऊने उन से कई, तब दाऊद आत्मा में होकें ऊहां पिरभू काय कहत आय?

⁴⁴ कि प्रभु ने, मोरे पिरभू से कई; मोरे दांयने बैठ, जब लों मैं तोरे बैरियन हां तोरे चरन के नेंचें न कर देंओं?

⁴⁵ अगर, दाऊद ऊहां पिरभू कैत आय, तो बो ऊको पूत कैसे भओ?

⁴⁶ ऊके उत्तर में कोऊ भी ऊहां कछु उत्तर नईं दे पाओ; और ऊ दिना से कोऊहां ऊसे और कछु पूंछबे की हिम्मत नईं भई।