- मत्ती 18 - Bundeli Holy Bible

¹ ऊ बेरा चेले यीशु के ऐंगर आके कैन लगे, सरग के राज्य में बड़ो को आय?

² तब ऊने एक बच्चा हां, अपने ऐंगर टेरो और बीच में ठांड़ो करके कई।

³ मैं तुम से सांची कैत आंव, कि जब लों तुम न फिरो और बच्चन घांई न बनो, तुम सरग के राज्य में कभऊं न पोंच पा हौ।

⁴ जौन कोऊ अपने आप हां ई बच्चा के घांई छोटो बना है, बो सरग के राज्य में सब से बड़ो हुईये।

⁵ और जो कोऊ मोरे नाओं से ऐसई एक बच्चा हां अपनात आय, बो मोय अपनात आय।

⁶ पर जो कोऊ इन हल्के में से जौन मोय पे भरोसा करत आंय एक हां ठोकर खिलाए, ऊके लाने सही होतो, कि ऊके घींच में चक्की कौ भारी पाट लटकाओ जातो, और ऊहां समुन्दर की तरी में डुबो दओ जातो।

⁷ ठोकरों के काजें संसार पे हाय! ठोकरों कौ लगबो जरूरी आय; पर हाय ऊ मान्स पे जीके द्वारा ठोकर लगत आय।

⁸ अगर तोरो हाथ या तोरो गोड़ो तोय ठोकर खिलाए, तो ऊहां काट के मेंक दे; कायसे तोरे लाने लूलो लंगड़ो होकें सरग में जाबो, ईसे कहूं भलो आय, कि दो हाथ और दो गोड़े रहते भए नरक में डार दओ जाए।

⁹ अगर तोरी आंख तोय ठोकर खिलाए, तो ऊहां काड़ के मेंक दे।

¹⁰ कायसे तोरे लाने कनवा होकें सरग के राज्य में जाबो ईसे कहूं भलो आय, कि तें दो आंखें रहत भए नरक की आगी मैं डारो जाबै।

¹¹ हेरो, तुम इन हल्के में से कोऊहां नीचो न जानियो; कायसे मैं तुम से कहत आंव, कि सरग में उन के दूत मोरे बाप कौ मों सदा हेरत आंय।

¹² तुम का समजत आव? जदि कोऊ मान्स की सौ गाड़रें होबें, और उन में से एक भटक जाए, तो का बो निन्नानबे हां छोड़के, और पहरवा पे जाके, ऊ भटकी भई गाड़र हां खोजबे न जै है?

¹³ और अगर ऐसो होबै, कि बो ऊहां पाए, तो मैं तुम से सांची कहत आंव, कि बो ऊन निन्नानबे गाड़रों के लाने जौन हिरानी नईं हतीं बिलात खुस नईं हुईये, जितनो कि ई गाड़र के लाने हुईये।

¹⁴ ऐसई तुमाओ बाप की जौन सरग में आय जा मनसा नईंयां, कि इन हल्के में से एकऊ नास होए।

¹⁵ अगर तोरो भईया पाप करे, तो जाके ऊहां अकेले में समजा; अगर बो तोरी सुने तो तेंने अपने भईया हां बचा लओ।

¹⁶ अगर बो तोरी न सुनै, तो तें अपने संग्गै एक या दो जनें हां लै जा, कि हर एक बात दो या तीन गवाह के मों से सही पाई जाए।

¹⁷ अगर बो उन की भी न माने, तो मण्डली से कै दे, अगर बो मण्डली की भी न सुने, तो बो तोरे लाने गैर जातियन और चुंगी लेबेवारन के घांई कहाओ।

¹⁸ मैं तुम से सांची कहत आंव, जो कछु तुम धरती पे बांध हौ, बो सरग में बंध है और जो कछु तुम धरती पे खोल हौ, बो सरग में खुल है।

¹⁹ मैं तुम से फिन कहत आंव, अगर तुम में से दो जनें धरती पे प्रार्थना के लाने एक मन हुईंयें, तो बो मोरे स्वर्गीय बाप की कोद से उन के लाने पूरी हो जै है।

²⁰ कायसे जिते दो या तीन मोरे नाओं से जुर हैं, उते मैं उन के बीचा में होत आंव।

²¹ तब पतरस ने ऐंगर आके ऊसे कई, हे प्रभु, जदि मोरो भईया पाप करत रए, तो मैं ऊहां कितेक बेर क्षमा करों, का सात बेर लौ?

²² यीशु ने ऊसे कई, मैं तोसे जौ नईं कैत, कि सात बेर, परन्त सात बेर के सत्तर गुना लौ।

²³ ई लाने सरग के राज्य की तुलना ऐसे राजा से करी जा सकत आय, जीने अपने चाकरन से हिसाब लेबो चाहो।

²⁴ जब बो हिसाब लैन लगो, तो ऊके सामूं एक मान्स लाओ गओ, जीपे दस हजार तोड़े कौ करजा हतो।

²⁵ पर ऊके ऐंगर करजा चुकाबे हां कछु नईं हतो, तो ऊके मालक ने हुकुम दओ, कि ऊहां और ऊकी घरवारी और लड़का वारन और जो कछु ऊके ऐंगर आय, सब हां बेंच के करजा चुका दओ जाए।

²⁶ ई पे चाकर ने गिरके ऊहां परनाम करो, और कई, हे मालक, धीरज धर, मैं सब कछु चुका दै हों।

²⁷ तब ऊ चाकर के मालक ने तरस खाके ऊहां छोड़ दओ, और ऊको करजा माफ कर दओ।

²⁸ पर जब बो चाकर बायरें कड़ो, तो ऊके संगी चाकरन में से एक ऊहां मिलो, जौन ऊको सौ दीनार कौ कर्जदार हतो; ऊने ऊहां पकड़ो और ऊकौ गला दबा के कई; मोरो करजा चुका दे।

²⁹ ई पे ऊको संगी चाकर गिरके, ऊसे बिन्तवाई करन लगो; कि धीरज धर मैं सब कछु चुका दै हों।

³⁰ परन्त बो नईं मानो, और ऊहां जेहल में डार दओ; कि जब लौ बो करजा न चुका दे, तब लौ उतईं रहे।

³¹ जौ देख के ऊके संगी चाकर बिलात दुखी भए, और उन ने अपने मालक हां पूरो हाल सुना दओ।

³² तब ऊके मालक ने ऊहां टेर के कई, हे दुष्ट चाकर, ई लाने की तेंने मोय से बिनती करी, मैं ने तोरो पूरो करजा माफ कर दओ।

³³ तो फिन मैं ने जैसे तोपे दया करी, का ओई तरहां तोय भी अपने संगी चाकर पे दया नईं करो चईये?

³⁴ और ऊके मालक ने खुन्सया के ऊहां दण्ड देबेवारन हां सौंप दओ, कि जब लौ सब करजा न चुका देबै, तब लौ उनई के हाथ में रए।

³⁵ ऐंसई अगर तुम में से हर एक अपने भईया हां क्षमा नईं कर है, तो मोरो स्वर्गीय बाप भी तुमाए संग्गै वैसई कर है।