- मत्ती 16 - Bundeli Holy Bible

¹ फरीसी और सदूकियन ने ऐंगर आके ऊहां परखबे के लाने ऊसे कई, कि हम हां आकास कौ कोऊ चिन्ह दिखाओ।

² ऊ ने उन हां उत्तर दओ, जब संजा होत आय तो तुम कहत आव कि खुलो रै है कायसे आकास लाल आय।

³ और भुनसारे कहत आव कि आज आंधी आ है कायसे आकाश लाल और धुमला आय; तुम आकास के गुन हां तो चीनत आव, पर समयों के चिन्ह हां नईं बता सकत?

⁴ बुरय और व्यभिचारी ई जुग में चिन्ह खोजत आंय पर यूनुस के चिन्ह हां छोड़ ऊहां और कोऊ चिन्ह नईं दओ जै है, और बो उन हां छोड़के चलो गओ।

⁵ फिन चेले ऊ पार पहुंचे और रोटी लेबो बिसर गए हते।

⁶ यीशु ने उन से कई, हेरो; फरीसी और सदूकियन के खमीर से चौकन्ने रहियो।

⁷ बे आपस में बतकाव करके कहन लगे, कि हम रोटी लाबो बिसर गए।

⁸ यीशु ने जौ जानके उन से कई, हे तनक भरोसा करबे वारो, तुम काय आपस में झगड़ रए आव? कि हमाए ऐंगर रोटी नईंयां?

⁹ का तुम अबै लेओ नईं समजे? कि जब पांच हजार मान्सन के लाने पांच रोटियां हतीं, तो तुम ने कितेक टुकना उठाए हते?

¹⁰ और चार हजार के लाने सात रोटियां हतीं; तो तुम ने कितेक टुकना उठाए?

¹¹ तुम काय नईं समजत कि मैं ने तुम से रोटी के बारे में नईं कई? पर जौ कि तुम फरीसी और सदूकियन के खमीर से चौकन्ने रहियो।

¹² तब उन की समझ में आओ, कि ऊ ने रोटी के खमीर के बारे में नईं, परन्त फरीसी और सदूकियन की सीख से चौकन्ने रहबे हां कई हती।

¹³ जब यीशु कैसरिया, फिलिप्पी के परगना में आओ, तो अपने चेलन से जौ पूछन लगो, मान्स कौ पूत हां लोगबाग का कहत आंय?

¹⁴ उन ने कई, कछु तो यूहन्ना बपतिस्मा देबेवारो कहत आंय, कछु एलिय्याह और दूसरे यिर्मयाह या आगमवकतन में से कोऊ एक।

¹⁵ ऊ ने उन से कई; पर तुम मोहां का कहत आव?

¹⁶ शमौन पतरस ने उत्तर दओ, कि तें जीयत परमेसुर कौ पूत मसीह आय।

¹⁷ यीशु ने ऊसे कई, कि हे शमौन योना के पूत, तें धन्य आय; कायसे मांस और खून ने ईहां तोपे उजागर नईं करो, बल्कि मोरे बाप ने जौन सरग में आय।

¹⁸ मैं तोसे जौ सोई कहत हों, कि तें पतरस आय; और ऐई चट्टान पे मैं अपनी मंडली बना हों: और अधोलोक के फाटक ऊ पे प्रबल न हुईयें।

¹⁹ मैं तोय सरग के राज्य की कुंजी दै हों: और जो कछु तें धरती पे बांध है, बो सरग में बंध है; और जो कछु तें धरती पे खोल है, बो सरग में खुल है।

²⁰ तब ऊने चेलन हां चिताओ, कि कोऊ से न कहियो! कि मैं मसीह आओं।

²¹ ऊ बेरा से यीशु मसीह अपने चेलन हां बतान लगो, कि जरूरी आय, कि मैं यरूशलेम हां जाओं, और पुरनियन, महापुरोहितन और शास्त्रियन द्वारा बिलात दुख उठाओं; और मार डारो जाओं; और तीसरे दिना जी जाओं।

²² ई पे पतरस ऊहां अलग ले गओ, और जे कै कें झिड़कन लगो कि हे पिरभू, परमेसुर न करे; तोपे ऐसो कभऊं न हुईये।

²³ तब ऊने मुड़के पतरस से कई, हे शैतान मोरे सामने से दूर हो: तें मोरे लाने ठोकर कौ कारन आय; कायसे तें परमेसुर की बातन पे नईं, पर मान्सन की बातन पे मन लगात आय।

²⁴ तब यीशु ने अपने चेलन से कई; अगर कोऊ मोरे पाछें आबो चाहे, तो बो अपने आप हां त्यागे, और अपनो क्रूस उठाके मोरे पछें हो ले।

²⁵ कायसे जौन अपनो प्राण बचाबो चाहे, बो ऊहां गवां है; और जौन कोऊ मोरे लाने अपनो प्राण गवां है, बो ऊहां पा है।

²⁶ अगर मान्स सारे जगत हां पा ले, और अपने प्राण गंवाए, तो ऊहां का फायदा? या मान्स अपने प्राण के बदले में का दै है?

²⁷ कायसे मान्स कौ पूत अपने सरगदूतन के संग्गै अपने बाप की मईमा में आ है, और ओई बेरा बो हर एक मान्स हां ऊके कामन के अन्सार फल दै है।

²⁸ मैं तुम से सांची कहत आंव, कि जो इते ठांड़े आंय, उन में से कितेक ऐसे आंय; कि जब लौ मान्स के पूत हां ऊके राज्य में आत भए न हेर लै हैं, तब लौ मृत्यु कौ सुवाद कभऊं न चीख हैं।