- मत्ती 14 - Bundeli Holy Bible

¹ ऊ बेरा चौथाई देश के राजा हेरोदेस ने यीशु की चरचा सुनी।

² और अपने चाकरन से कई, जौ तो यहून्ना बपतिस्मा देबेवारो आय: बो मरे भयन में से जी गओ है, ई लाने जे शक्तियां ईमें काम कर रईं आय।

³ कायसे हेरोदेस ने अपने भईया फिलिप्पुस की घरवारी हेरोदियास के काजें, यूहन्ना हां पकड़वा के बंधवा दओ हतो, और ऊहां जेहल में डरवा दओ हतो।

⁴ कायसे यूहन्ना ने ऊसे कहो हतो, कि ईहां रखबो तोरे लाने सही नईंयां।

⁵ हेरोदेस यूहन्ना हां मार डारबो चाहत हतो, पर लोगबाग से डरात हतो, कायसे बे ऊहां आगमवकता मानत हते।

⁶ पर जब हेरोदेस कौ जन्म दिन आओ, तो हेरोदियास की बिटिया ने उत्सव में नाच के हेरोदेस हां खुस कर दओ।

⁷ ई लाने ऊ ने कौल खाके बचन दओ, कि जो कछु तें मांग है, मैं तोय दै हों।

⁸ ऊ ने मताई के उकसाबे पे कई, एक थाली में यूहन्ना बपतिस्मा दैबेवाले कौ मूड़ मोय इते मंगवा दे।

⁹ हेरोदेस दुखी भओ, अकेले अपने कौल और संग में बैठबेवारन के कारन, हेरोदेस ने हुकुम दओ, कि दै दओ जाबै।

¹⁰ ऊने जेहल में लोगन हां पठैय के यूहन्ना को मूड़ कटवा दओ।

¹¹ और ऊकी मूड़ एक टाठी में लाई गई; और बिटिया हां दै दओ; और बो अपनी मताई के ऐंगर ले गई।

¹² फिन यूहन्ना के चेलन ने आके और ऊ की लाश हां ले जाके गाड़ दओ, और उन ने जाके यीशु हां खबर दई।

¹³ जब यीशु ने जौ सुनो, तो बो उते से नाव पे चढ़के अकेलो कोऊ सूनी जांगह हां चलो गओ; जौ सुनके भीड़ के लोगबाग नगर नगर से पैदल ऊके पाछें हो लए।

¹⁴ जब ऊ ने एक बड़ी भीड़ हां हेरो; और लोगन पे तरस खाओ; और उन के बीमारन हां साजो करो।

¹⁵ जब संजा भई, तो ऊके चेले ऊके ऐंगर आके कहन लगे; जा जांगह सूनी आय, और दिन डूब गओ आय, ई लाने भीड़ हां विदा करो जाए कि लोग बस्तियन में जाके अपने लाने खाबे हां मोल लेबें।

¹⁶ यीशु ने उन से कई, उन हां जाबे की जरूरत नईंयां! तुमई उन हां खाबे हां देओ।

¹⁷ उन ने ऊसे कई; इते हमाए ऐंगर पांच रोटियां और दो मछरियां आंय।

¹⁸ ऊने कई, उन हां मोरे ऐंगर लै आओ।

¹⁹ तब लोगन हां घांस पे बिठाओ, और ऊने पांच रोटियां और दो मछरियन हां लओ; और सरग कोद हेर के आसीष मांगी और रोटियां तोड़ तोड़ के चेलन हां दईं, और चेलन ने लोगन हां।

²⁰ और सब खाके अफर गए, और उन ने टुकड़न से बची भई बारह टुकनियां भरके उठाईं।

²¹ खाबेवारन में, बईयरन और लरका बिटियन हां छोड़के लुगवन की गिनती मानो पांच हजार लौ हती।

²² तब ऊने तुरतईं अपने चेलन हां नाव पे चढ़बे के लाने जबरंई करी, कि बे ऊसे पेंला ऊ पार जाबें, और खुद लोगन हां विदा करन लगो।

²³ भीड़ हां विदा करबे के बाद, बो पहड़िया पे अकेलो प्रार्थना करबे के लाने चलो गओ; जब संजा भई तो बो उते अकेलो हतो।

²⁴ ऊ बेरा नाव झील के मजारें लहरों से डगमगा रई हती, कायसे हवा सामूं की हती।

²⁵ और बो रात के चौथे पहर झील पे निंगत भए उन के ऐंगर आओ।

²⁶ जब चेलन ने ऊहां झील पे निंगत भए हेरो तो बे डरा गए! और कैन लगे, जौ तो भूत आय; और डर के मारे चिल्लान लगे।

²⁷ यीशु ने तुरतईं उन से बातें करी, और कई; हिम्मत धरो; मैं आंव, डरियो नईं।

²⁸ पतरस ने ऊसे कई; हे प्रभु, अगर तेंई आय, तो मोय सोऊ पानू पे निंग के अपने ऐंगर आबे कौ हुकुम दे।

²⁹ यीशु ने कई, आ: तब पतरस नाव पे से उतर के पानू पे निगत भओ यीशु की कोद बढ़ो।

³⁰ पर हवा हां हेर के डरा गओ, और जब डूबन लगो, तो चिल्ला के कई; हे प्रभु, मोय बचा।

³¹ यीशु ने तुरतईं हाथ बढ़ाके ऊहां थाम लओ, और ऊसे कई, हे तनक भरोसा करबेवाले, तेंने काय शंका करी?

³² जब बे नाव पे चढ़ गए, तो हवा थम गई।

³³ और जौन लोग नाव में हते, उन ने ऊहां परनाम करके कई, सांची तें परमेसुर कौ पूत आय।

³⁴ बे पार होकें गन्नेसरत देश में पहुंचे।

³⁵ और उते के लोगन ने जब ऊहां चीनो, तो उन ने लिगां के सारे देश में खबर पठैई, और लोग बीमारन हां ऊके ऐंगर ले आए।

³⁶ बे ऊसे बिन्तवाई करन लगे, कि बो अपने उन्ना के छोर हां छी लैन देबे: और जितनन ने ऊहां छिओ, बे साजे हो गए।