- लूका 7 - Bundeli Holy Bible

¹ जब यीशु मान्सन हां पूरो उपदेस सुना चुको, तो कफरनहूम में आओ।

² और कोऊ सूबेदार कौ एक बिलात प्यारो चाकर हतो, और रोग से मरबे पे हतो।

³ जब सूबेदार ने यीशु के बारे में सुनो तो ऊ ने यहूदियन के बूढ़े पुराने जन हां ऊसे जौ बिन्तवाई करबे हां पठैओ, कि आन के मोरे चाकर हां साजो कर।

⁴ जब बे औरें यीशु लौ पोंचे तो यीशु से बिन्ती कर कैन लगे, कि बो ई जोग आय कि तें ऊके लाने जौ करे।

⁵ कायसे ऊ हमाई जात वारन से प्रेम करत आय, और ओई ने हमाए मन्दर हां बनवाओ आय।

⁶ यीशु उन के संग्गै सग्ंगै निंगो, और घर से तनकई दूर हतो, तो सूबेदार ने अपने प्रेमी जन हां जौ कैबे हां पठैओ, कि हे पिरभु दुख: न उठा, कायसे मैं ई जोग नईंयां, कि तें मोरी छत के नेचें आबै।

⁷ ऐई काजें मैं ने अपने आप हां ई जोग सोई न समजो, कि तोरे ऐंगर आओं, बस बचन कै भर दे और मोरो चाकर साजो हो जै है।

⁸ मैं सरकारी नौकर आंव; और सिपाई मोरे वस में आंय, मैं एक से कैत आंव, जा, तो ऊ जात आय; और दूजे से कैत आंव, आ, तो बो आत आय; और मैं अपने चाकर से कै त आंव जौ कर, तो बो ऊ करत आय।

⁹ जब यीशु ने जौ सुनो तो अचम्भा करो, और झुण्ड कुदाऊं जौन ऊके पाछूं निंगत आत हती कओ, मैं तुम से कैत आंव, कि मैंने इस्राएल में भी ऐसो बिसवास नईं पाओ।

¹⁰ और जो पठैए गए हते उन ने घर लौट के ऊ चाकर हां साजो पाओ।

¹¹ ई के पाछें तुरतऊं यीशु नाइन नाओं नगर हां गओ, और ऊके चेला, और बड़ो झुण्ड ऊके संग्गै निंग रओ हतो।

¹² जब बो नगर के दरवाजा लौ पोंचो, तो ऊ ने तको, कि मान्स एक मरे भए हां बायरें लए जा रए हते; बो अपनी मताई कौ एकलौतो पूत हतो, और बा बिधवा हती: और नगर के बिलात मान्स ऊके संग्गै हते।

¹³ ऊहां तक के पिरभु हां ऊ पै बड़ी दया आई, और ऊसे कओ, न रो।

¹⁴ तब यीशु ने ऐंगर जाके अर्थी हां छियो; तब अर्थी हां उठाबेवारे ठैर गए तब यीशु ने कओ; हे जवान मैं तोसे कैत आंव, उठ।

¹⁵ तब ऊ मुरदा उठ बैठो, और बातें करन लगो: और यीशु ने ऊहां ऊ की मताई हां सौंप दओ।

¹⁶ ई से सब जनें बिलात डरा गए; और बे औरें परमेसुर की बड़वाई कर के कैन लगे, कि हमाए मजारें एक बड़ो आगमवकता उठो आए, और परमेसुर ने अपने लोगन पे बड़ी किरपा करी आय।

¹⁷ यीशु के बारे में जा बात सबरे यहूदिया और आस-पास के सबरे देस में फैल गई।

¹⁸ यूहन्ना हां ऊके चेलन ने इन सबरी बातन कौ सन्देसो दओ।

¹⁹ तब यूहन्ना ने अपने चेलन में से दो चेलों हां बुला के पिरभु के ऐंगर जौ पूंछबे के लाने पठैओ, कि का आबेवारो तेंई आय, या हम कोऊ और दूजे की बाट हेरें?

²⁰ उन ने यीशु के ऐंगर पोंच के कओ, यूहन्ना बपतिस्मा देबेवारे ने हम हां तोरे ऐंगर जौ पूंछबे हां पठैओ आय; कि का आबेवारो तेंई आय, या हम दूजे की बाट तकें?

²¹ ओई बेरा यीशु ने बिलात जन हां रोगों, और पीड़ा दुख और बुरई आत्माओं से छुड़ाओ; और यीशु ने बिलात अंधरन हां आंखें दईं।

²² फिन उन से कओ; जौन कछु तुम ने तको और सुनो आय, जाके यूहन्ना से कै दो; कि अंधरा तकत आंय, लगड़े निंगत फिरत आंय, कोढ़ी शुद्ध करे जात आंय, बहिरे सुनत आंय, मुरदे जिलाए जात आंय; और गरीब गुरवन हां भलो सन्देसो सुनाओ जात आय।

²³ और धन्न आय बो, जौन मोरे काजें ठोकर न खाबै।

²⁴ जब बे मान्स जौन यूहन्ना ने पठैय हते चले गए, तो यीशु यूहन्ना के बारे में मान्सन से कैन लगो; तुम हार में का तकबे गए हते? का बैहर से हलत भए सरकण्डा हां?

²⁵ तो फिन तुम का तकबे गए हते? का मलमल के उन्ना पैरें भए मान्स हां? तको, जौन चमक वारे उन्ना पैरत आंय, और ठाट बाट से रैत आंय, बे महलों में रैत आंय।

²⁶ तो फिन का तकबे गए हते? का कौनऊं आगमवकता हां? हओ, मैं तुम से कैत आंव, कि आगमवकता से भी बड़े हां।

²⁷ जौ ओई आय, जीके बारे में लिखो आय, कि हेरो, मैं अपने दूत हां तोरे आंगू पठैत आंव, जौन तोरे आंगू गैल तईयार कर है।

²⁸ मैं तुम से कैत आंव, जौन बईयरन से पैदा भए आंय, उन में से यूहन्ना से बड़ो कोऊ नईंयां: पर जौन परमेसुर के राज में हलके से हलको आय, बो ऊसे भी बड़ो आय।

²⁹ सबरी जनता ने और चुंगी लेबेवारन ने सोई यूहन्ना कौ बपतिस्मा लेके परमेसुर हां सांचो मान लओ।

³⁰ पर फरीसियन और व्यवस्था पालकों ने ऊसे बपतिस्मा न लेके, परमेसुर की मनसा हां अपने बारे में टाल दओ।

³¹ सो मैं ई जुग के मान्सन हां, की के समान बताओं, कि बे औरें की के जैसे आंय?

³² बे उन बच्चन घांई आंय जौन बजार में बैठे भए एक दूजे से टेर के कैत आंय, हम ने तुमाए लाने बांसुरी बजाई, और तुम नईं नाचे, हम ने दुख मनाओ और तुम नईं रोए!

³³ काय से यूहन्ना बपतिस्मा देबेवारो न रोटी खात आओ, और न दाख कौ रस पीयत आओ, और तुम कैत आव, ऊ में दुष्ट आत्मा आय।

³⁴ मान्स कौ पूत खात-पियत आओ आय; और तुम कैत आव, तको, पेटू और पियक्कड़ मान्स, चुंगी लेबेवारों कौ और अधर्मियन कौ मीत।

³⁵ पर बुद्धि अपनी सबरी सन्तानों से सांची ठैराई गई आय।

³⁶ फिन कोऊ फरीसी ने यीशु से बिन्तवाई करी, कि मोरे संग्गै भोजन कर; सो बो ऊ फरीसी के घरै जाके भोजन करबे हां बिराजो।

³⁷ और हेरौ, ऊ नगर की एक पापिनी दुराचारी बईयर जौ जान के कि बो फरीसी के घर में भोजन करबे हां बिराजो आय, संगमरमर के बरतन में इत्र लेके आई।

³⁸ ऊके गोड़न के ऐंगर, बो रोत भई, पाछूं ठांड़ी होकें ऊके गोड़न हां अंसुअन से भिगोन लगी, और अपने मूड़ के बाल से पोंछन लगी और ऊके गोड़े बेर-बेर चूम के उन पे इत्र मलो।

³⁹ जौ हेर के, बो फरीसी जीने यीशु हां बुलाओ हतो, अपने हिये में विचार करन लगो, जदि जौ आगमवकता होतो तो जान जातो, कि जा जौन ऊहां छी रई आय, बो को और कैसी बईयर आय? कायसे बा तो पापिनी आय।

⁴⁰ जौ जान के यीशु ने ऊसे कई; हे शमौन मोहां तोसें कछु कैने आय, ऊ बोलो, हे गुरु कै।

⁴¹ कोऊ साहूकार से दो जने उधार लएं हते, एक पांच सौ, और दूजो पचास रुपईया धरत हतो।

⁴² जब कि उन लौ चुकाबे हां कछु न रओ, तो ऊ ने दोई जन हां छिमा कर दओ: सो उन में से को ऊसे अधक प्रेम कर आय?

⁴³ शमौन ने उत्तर दओ, मोरी समज में बो जीकौ बिलात छोड़ दओ: यीशु ने ऊसे कओ, तेंने सई विचार करो।

⁴⁴ और ऊ बईयर कुदाऊं फिर के यीशु ने शमौन से कओ; का तें ई बईयर हां तकत आय? मैं तोरे घर में आओ पर तेंने मोय गोड़े धोबे हां पानू नईं दओ, पर ईने मोरे गोड़े अंसुअन से भिंजाए, और अपने बालों से पोंछो!

⁴⁵ तेंने मोय चूमा नईं दओ, पर जब से मैं आओ आंव तब से ईने मोरे गोड़न हां चूमबो नईं छोड़ो।

⁴⁶ तेंने मोरे मूड़ में तेल नईं मलो; पर ईने मोरे गोड़न पे इत्र मलो आय।

⁴⁷ ई लाने मैं तोसें कैत आंव; कि ईके पाप जौन कुल्ल बिलात हते, छिमा भए, कायसे ईने बिलात प्रेम करो; पर जीकौ तनक छिमा भओ आय, ऊ तनक प्रेम करत आय।

⁴⁸ और यीशु ने ऊ बईयर से कओ, तोरे पाप छिमा भए।

⁴⁹ तब जौन मान्स ऊके संग्गै भोजन करबे हां बिराजे हते, बे अपने अपने हिये में विचार करन लगे, जौ को आय जौन पापन हां सोई छिमा करत आय?

⁵⁰ पर यीशु ने ऊसे कई; तोरे बिसवास ने तोय बचा लओ आय, कुशल से चली जा।