- लूका 6 - Bundeli Holy Bible

¹ फिन सब्त के दिना बो खेतन में से होकें जा रओ हतो, और ऊके चेला बालें तोड़ तोड़के, और हांथन से मसल के खात जात हते।

² तब फरीसियन में से केऊ जने कैन लगे, तुम बो काम काय करत आव जौन सब्त के दिना करबो सई नईंयां?

³ यीशु ने उन हां उत्तर दओ: का तुम ने जौ नईं बांचो, कि दाऊद ने जब बो और ऊके संग्गी भूखे हते तो का करो?

⁴ बो कौन भांत परमेसुर के घर में गओ, और भेंट की रोटियां लेके खाईं, जिन हां खाबो याजकन हां छोड़ और कोऊहां खाबो सई नईंयां, और अपने संगियन हां सोई दईं।

⁵ और ऊ ने उन से कओ; मान्स कौ पूत सब्त के दिना कौ सोई पिरभु आय।

⁶ और ऐसो भओ कि कोऊ और सब्त के दिना बो मन्दर में जाके उपदेस देन लगो; उते एक मान्स हतो, जी को सूदो हाथ सूखो हतो।

⁷ शास्त्री और फरीसी यीशु पे लांछन लगाबे कौ मौका पाबे की ताक में हते, कि तकें कि बो सब्त के दिना साजो करत आय कि नईं?

⁸ पर यीशु उन के विचार जानत हतो; ई लाने यीशु ने ऊ सूखे हाथवाले से कओ; उठ, मजारें ठांड़ो हो जा, बो उठ ठांड़ो भओ।

⁹ यीशु ने उन से कओ; मैं तुम से पूंछत आंव कि सब्त के दिना का सई आय, भलो करबो या बुरो करबो; प्रान हां बचाबो या नास करबो?

¹⁰ और यीशु ने चारों कुदाऊं उन सब हां तक के ऊ मान्स से कओ; अपनो हाथ बढ़ा: ऊ ने ओई करो, और ऊकौ हाथ फिन के साजो हो गओ।

¹¹ पर बे आपे से बाहर होकें आपस में बतकाओ करन लगे कि हम यीशु के संग्गै का करें?

¹² उन दिना में बो पहरवा पे बिन्तवाई करबे हां कड़ो, और परमेसुर से बिन्तवाई करबे में सबरी रात बिताई।

¹³ जब दिन भओ, तो ऊ ने अपने चेलन हां टेर के, उन में से बारह नबेर लए, और उन हां प्रेरित कओ।

¹⁴ और बे जे आंय शमौन जी कौ नाओं ऊ ने पतरस सोई धरो; और ऊको भईया अन्द्रियास और याकूब और यूहन्ना, फिलिप्पुस और बरतुलमै।

¹⁵ मत्ती और थोमा और हलफई कौ पूत याकूब और शमौन जौन जेलोतेस कहलात आय।

¹⁶ और याकूब कौ पूत यहूदा और यहूदा इसकरियोती जौन ऊहां पकड़वाबे वारो बनो।

¹⁷ तब बो उन के संग्गै उतर के समतल जांगा में ठांड़ो भओ, और ऊके चेलन की बड़ी भीड़, और सारे यहूदिया और यरूशलेम और सूर और सैदा के समुन्दर के कगारें के कुल्ल मान्स, जौन ऊ की सुनबे और अपनी बिमारियों से साजे होबे हां ऊके ऐंगर आए हते, उते हते।

¹⁸ दुष्टआत्माओं के सताए भए मान्स सोई साजे करे जात हते।

¹⁹ और सबरे ऊ ए छिओ चाहत हते, कायसे ऊ में से सामर्थ सक्ति कड़ के सब हां साजो करत हती।

²⁰ तब यीशु ने अपने चेलन कुदाऊं तक के कओ; धन्न आव तुम, जौन नरम दीन आव, कायसे परमेसुर कौ राज तुमाओ आय।

²¹ धन्य आव तुम, जौन अब भूखे आव; कायसे अफराए जै हो, धन्न आव तुम, जौन अब रोऊत आव, कायसे तुम हंस हौ।

²² धन्न आव तुम, जब मान्स के पूत के काजें मान्स तुम से बैर कर हैं, और तुम हां काड़ दै हैं, और तुमाई बुराई कर हैं, और तुमाओ नाओं बुरओ जान के काट दें हैं।

²³ ऊ दिना खुसी से कूंदिओ, कायसे तको, तुमाए लाने सरग में बड़ो प्रतिफल आय: उन के बाप-दादे आगमवकतन के संग्गै साई उंसई करत हते।

²⁴ पर हाय तुम पै; जौन मालपानू वारे आव, कायसे तुम अपने सुख भोग चुके।

²⁵ हाय तुम पै; जो अब अफरे आव, कायसे भूखे हुईयो: हाय तुम पै; जौन अब हंसत आव, कायसे अफसोस कर हौ और रो हौ।

²⁶ हाय तुम पै; जब सबरे मान्स तुम हां भलो कैबें, कायसे उन के बाप-दादे लबरे आगमवकतन के संग्गै ऐंसई करत हते।

²⁷ सो अब मैं तुम सुनबेवारन से कहत आंव, कि अपने बैरियन से प्रेम राखौ; जौन तुम से बैर करें, उन कौ भला करौ।

²⁸ जौन तुम हां कोसे, उन हां आसीस देओ: और जौन तुमाओ अपमान करै, ऊ न के लाने बिन्ती याजना करौ।

²⁹ जौन तोरे एक गाल पे चांटा मारे, ऊ कुदाऊं दूसरो सोई फेर दे; और जौन तोरो कोट छीन ले, ऊहां कुरता लेबे से सोई न रोक।

³⁰ जौन कोई तोसे मांगे, ऊहां दे; और जौन तोरी बस्त छीन लेबे, ऊसे वापस न मांग।

³¹ और जैसो तुम चाहत आव कि मान्स तुमाए संग्गै करें, तुम सोई उन के संग्गै उंसई करो।

³² जदि तुम अपने प्रेम राखबे वारन के संग्गै प्रेम राखो, तो तुमाई का बड़वाई? कायसे पापी सोई अपने प्रेम राखबे वारन के संग्गै प्रेम राखत आंय।

³³ और जदि तुम अपने भलाई करबे वारन के संग्गै भलाई करत आव, तो तुमाई का बड़वाई? कायसे पापी सोई ऐंसई करत आंय।

³⁴ और जदि तुम उन हां उधार देत आव, जिन से फिन वापस लेबे की आसा करत आव, तो तुमाई का बड़वाई? कायसे पापी पापियन हां उधार देत आंय, कि उन हां उतनौ फिन मिलै।

³⁵ पर अपने बैरियन से प्रेम राखौ, और भलाई करौ: और फिन वापस पाबे की आस न राख के उधार देओ; तो तुमाए लाने बड़ो इनाम हुईये: और तुम परम परधान के बालबच्चा ठैर हौ, कायसे बो उन पे जो धन्नवाद नईं करत और बुरए जन पे सोई दया करत आय।

³⁶ जैसो तुमाओ बाप दया करबेवारो आय, उंसई तुम सोई दया करबेवाले बनौ।

³⁷ लांछन न लगाओ; तो तुम पे सोई लांछन न लगाओ जै है: अपराधी न ठैराओ, तो तुम सोई अपराधी न ठैराए जै हौ: छिमा करो, तो तुम हां सोई छिमा करो जै है।

³⁸ दए करो तो तुम हां सोई दओ जै है: मान्स पूरो नाप ठांस ठांसके और हिला हिलाके और ऊपरै लौ भरो भओ तुमाई ओली में डाल हैं, कायसे जौन नाप से तुम नापत आव, ओई से तुमाए लाने सोई नापो जै है।

³⁹ फिन यीशु ने उन से एक और कनौत कई; का अन्धरा, अन्धरे हां गैल बता सकत आय? का दोई गढ्ढा में न गिर हैं?

⁴⁰ चेला अपने गुरु से बड़ो नईं, पर जौन सिद्ध हुईये, बो अपने गुरु के बिरोबर हुईये।

⁴¹ तें अपने भाईया की आंख के तिनके हां काय तकत आय? और अपनी आंख कौ लट्ठा तोय नईं दिखात?

⁴² और जब तें अपनी आंख कौ लट्ठा नईं तकत, तो अपने भईया से कौन भांत कै सकत आय, हे भईया, ठैर जा मैं तोरी आंख में से तिनका काड़ देओं? हे कपटी, पेंला तें अपनी आंख कौ लट्ठा काड़ ले, तब तें अपने भईया की आंख के तिनके हां काड़बे हां सई सई तक पा है।

⁴³ कायसे कौनऊ साजो पेड़ नईंयां, जौन बुरओ फल लात होबै, और न कोऊ बुरओ पेड़ आय, जौन साजो फल फलत होबै।

⁴⁴ हर एक पेड़ अपने फल से चीनो जात आय; कायसे मान्स झाड़ियन से अंजीर नईं तोड़त, और न झरबेरी से अंगूर तोड़त आय।

⁴⁵ भलो मान्स अपने हिये के भले भण्डार से भली बातें काड़त आय; और बुरओ मान्स अपने हिये के बुरए भण्डार से बुरई बातें काड़त आय; कायसे जौन हिये में भरो आय ओई ऊके मों पे आत आय।

⁴⁶ जब तुम मोरो कओ नईं मानत, तो मोय हे पिरभु, हे पिरभु, काय कैत आव?

⁴⁷ जौन कोई मोरे लौ आत आय, और मोरी बातें सुन के उन हां मानत आय, मैं तुम हां बतात आंव बो की के समान आय?

⁴⁸ बो ऊ मान्स के समान आय, जी ने घर बनाती बेरा माटी गैरी खोद के चट्टान पे खचव डाली, और जब बाढ़ आई और हिलोर कौ पानू ऊसे टकराओ, पर ऊहां हला न सकी; कायसे बो पक्को बनो हतो।

⁴⁹ पर जौन सुन के नईं मानत, बो ऊ मान्स के समान आय, जीने माटी के बिना नी के घर बनाओ। जब ऊ पे पानू की धारा लगी, तो बो तुरतऊं गिर पड़ो, और सत्यानास हो गओ।