- लूका 24 - Bundeli Holy Bible

¹ सप्ताह के पैले दिना बड़े भुन्सारे बे उन खुशबूदार बस्तन हां जौन उन ने तईयार करी हतीं लेके कबर पे आईं।

² उन ने पत्थर हां कबर पे से लुड़को भओ पाओ।

³ बे कबर के भीतरे गईं पर उन ने पिरभु यीशु की लाश न पाई।

⁴ जब बे ई बात से भौचक्की हो रईं हतीं तो तको, दो मान्स चमकीले उन्ना पैरें भए उन के ऐंगर आन के ठांड़े हो गए।

⁵ जब बे डरा गईं, और धरती कुदाऊं मों करें ठांड़ी रईं; तब उन ने उन से कओ; तुम जीयत हां मरे भयन में काय ढूंढ़ रई आव?

⁶ बो इते नईंया, पर जी उठो आय; सुमरन करो; ऊ ने गलील में रैत भए तुम से कओ हतो।

⁷ जरूरी आय, कि मान्स कौ पूत, पापियन के हाथ में पकड़वाओ जाए, और क्रूस पे टांगो जाए; और तीसरे दिना मरे भयन में से जी उठे।

⁸ तब यीशु की बातें उन हां याद आईं।

⁹ और कबर से लौट के उन ने उन ग्यारहों को, और, और सबरन हां, जे सबरी बातें कै सुनाईं।

¹⁰ जिन ने चेलन हां जे बातें कईं, बे मरियम मगदलीनी और योअन्ना और याकूब की मताई मरियम और उन के संग की और बईयरें हतीं।

¹¹ पर उन की बातें उन हां कहानी सी जान पड़ी, और उन ने उन के कैबे कौ बिसवास नईं करो।

¹² तब पतरस उठ के कबर लौ दौड़ो गओ, और झुक के बस उन्ना पड़े तके, और जौन भओ हतो, ऊसे चकित होकें अपने घरै चलो गओ।

¹³ तको, ओई दिना उन में से दो जन इम्माऊ स नाओं एक गांव हां जा रए हते, जौन यरूशलेम से सात मील की दूरी पे हतो।

¹⁴ और बे इन सबरी बातन पे जौन घटी हतीं, आपस में बातचीत करत जात हते।

¹⁵ और जब बे आपस में बातचीत और पूंछतांछ कर रए हते, तो यीशु खुद ऐंगर आन के उन के संग्गै हो लओ।

¹⁶ पर उन चेलन की मति ऐसी मारी गई हती, कि बे औरें यीशु हां चीन न सके।

¹⁷ यीशु ने उन से पूंछो; तुम कौन सी बातन के बारे में निंगत भए आपस में बात कर रए आव? तो बे उदास से ठांड़े रै गए।

¹⁸ जब उन ने जौ सुनो, तो उन में से एक कौ नाओं क्लियुपास हतो ऊने कओ; का तें यरूशलेम में अकेलो परदेसी आय; जौन नईं जानत, बीते दिना में यरूशलेम में का भओ आय?

¹⁹ यीशु ने उन से पूंछो; कौन सीं बातें? उन ने यीशु से कओ; यीशु नासरी के बारे में जो परमेसुर और सबरे मान्सन के लेखे में काम और बचन में सामर्थी आगमवकता हतो।

²⁰ और महायाजकन और हमाए अधकारियन ने यीशु हां पकड़वा दओ, कि उन हां मार डालबे की सजा दई जाबे; और उन ने यीशु हां क्रूस पे टांग दओ।

²¹ पर हम हां आसा हती, कि जौई इस्राएल कौ उद्धार कर है, इन सबरी बातन के अलावा ई घटना हां घटे भए तीसरो दिना आय।

²² हम में से कछु बईयरों ने भी हम हां आश्चर्य में डाल दओ आय, बे भुनसारे कबर पे गईं हतीं।

²³ पर उन हां जब यीशु की लाश नईं मिली, तो उन ने वापस आन के बताओ कि उन ने सरगदूतन कौ दर्शन पाओ आय, सरगदूतन ने उन से कओ कि यीशु जीयत आय।

²⁴ तब हमाए कछु संग्गी कबर पे गए, जैसो बईयरों ने कओ हतो, ऊंसई पाओ; पर उन ने यीशु हां उते नईं तको।

²⁵ यीशु ने उन से कओ; हे मूरखो, तुम आगमवकतन की सबरी बातन पे बिसवास करबे में कित्ते मन्दबुद्धि आव!

²⁶ का जौ जरूरी नईं हतो, कि मसीह जा पीड़ा झेलतो और तब अपनी मईमा में जातो।

²⁷ तब यीशु ने मूसा और सबरे आगमवकतन से शुरु कर के सबरे पवित्तर धरम पोथी में से, अपने बारे में लिखी भईं बातन कौ मतलब, उन हां समजा दओ।

²⁸ इतने में बे औरें ऊ गांव के ऐंगर पोंचे, जिते बे जा रए हते, यीशु के ढंग से ऐसो जान पड़ो, कि बो आंगू जा रओ आय।

²⁹ पर उन ने जौ कै कें यीशु हां रोको, कि हमाए संग्गै रै; कायसे लौलईया लग चली आय और दिन बिलात ढल गओ आय। तब बो उन के संग्गै रैबे हां भीतर गओ।

³⁰ जब यीशु उन के संग्गै खाना खाबे हां बिराजो, तो ऊ ने रोटी लेके धन्नवाद करो, और रोटी तोड़ के उन हां देन लगो।

³¹ तब उन की आंखें खुल गईं; और उन ने ऊहां चीन लओ, और यीशु उन की आंखन से छिप गए।

³² उन ने आपस में कओ; जब यीशु गैल में हम से बात करत हतो, और पवित्तर धरम पोथी कौ भेद हम हां समजा रओ हतो, तो का हमाए हियन में जोस न भर गओ हतो?

³³ ओई टैम बे औरें यरूशलेम हां लौट गए, और उन ग्यारहों और उन के संगियन हां जुड़ो पाओ।

³⁴ बे औरें कैत हते, पिरभु सांचई में जी उठो आय, और शमौन हां दिखो आय।

³⁵ तब उन ने गैल की बातें उन हां बता दईं और जौ सोई कि उन ने यीशु हां रोटी तोड़त बेरा कौन भांत चीनो।

³⁶ बे औरें जे बातें कैई रए हते, कि यीशु खुद उन के मजारें आ ठांड़ो भओ; और उन से कओ, तुम हां सान्ति मिले।

³⁷ पर बे औरें घबरा गए, और डरा गए, और समजे, कि हम कौनऊं भूत हां तकत आंय।

³⁸ यीशु ने उन से कओ; काय घबरात आव? और तुमाए हियन में संका काय उठत आय?

³⁹ मोरे हाथ और मोरे गोड़े तको, कि मैं ओई आंव; मोहां छी के तको; आत्मा के हड्डी मांस नईं होत जैसो मो में तकत आव।

⁴⁰ जौ कै कें यीशु ने उन हां अपने हाथ पांव दिखाए।

⁴¹ जब खुसी के मारे उन हां बिसवास न भओ, और बे औरें चकित हते, तो यीशु ने उन से पूंछो; का तुमाए ऐंगर कछु खैबे हां आय?

⁴² चेलन ने यीशु हां भुंजी मछरिया कौ एक टुकड़ा दओ।

⁴³ यीशु ने लेके उन के सामूं खाओ।

⁴⁴ फिन यीशु ने उन से कओ, जे मोरी बे बातें आंय, जौन मैं ने तुमाए संग्गै रैत भए तुम से कईं हतीं, कि जरूरी आय, कि जितेक बातें मूसा की नैम व्यवस्था और आगमवकतन और भजनों की पोथी में, मोरे लाने लिखी आंय, सबरी पूरी होबें।

⁴⁵ तब यीशु ने पवित्तर धर्म पोथी समजबे के लाने उन की बुद्धि खोल दई।

⁴⁶ और उन से कओ, ऐसो लिखो आय; कि मसीह पीड़ा झेल है; और तीसरे दिना मरे भयन में से जी उठ है।

⁴⁷ और यरूशलेम से लेके सबरी जातन में हिया फेरबे कौ और पापन की छिमा कौ परचार, ओई के नाओं से करो जै है।

⁴⁸ तुम इन बातन के गवाय आव।

⁴⁹ और तको, जी कौ कौल मोरे बाप ने करो आय, ऊहां मैं तुम पे उतार हों और जब लौ सरग से बल शक्ति न पाओ, तब तक तुम ऐई नगर में ठैरे रओ।

⁵⁰ तब बो उन हां बैतनिय्याह लौ बायरें ले गओ, और अपने हाथ उठा के उन हां आसीष दई।

⁵¹ उन हां आसीष देत भए बो उन से अलैदा हो गओ और सरग पे उठा लओ गओ।

⁵² चेले ऊहां दण्डवत कर के बड़ी खुसी से यरूशलेम लौट गए।

⁵³ और लगातार मन्दर में जाके परमेसुर की स्‍तुति भजन करत हते।