- लूका 19 - Bundeli Holy Bible

¹ यीशु यरीहो में पिड़ के जा रओ हतो।

² और तको, जक्कई नाओं एक मान्स हतो जौन चुंगी लेबेवारन कौ सरदार और धनी हतो।

³ बो यीशु हां तकबो चाहत हतो कि बो को आय? बो भीड़ के काजें तक न सकत हतो! कायसे ऊ नाटो हतो।

⁴ तब ऊहां तकबे के लाने बो आंगू दौड़ के एक गूलर के पेड़ पे चढ़ गओ, कायसे यीशु ओई गैल से जाबेवारो हतो।

⁵ जब यीशु ऊ जांगा पोंचो, तो ऊहां तक के जक्कई से बोलो; हे जक्कई झट उतर आ; कायसे आज मोय तोरे घर में रैबो जरूरी आय।

⁶ बो तुरतऊं उतर के खुसी से ऊ ए अपने घरै ले गओ।

⁷ जौ तक के सबरे मान्स कुड़कुड़ा के कैन लगे, बो तो एक पापी मान्स के घरै जा उतरो आय।

⁸ जक्कई ने ठांड़े होकें पिरभु यीशु से कओ; हे पिरभु, तक, मैं अपनी आधी सम्पत्ति गरीब गुरवन हां देत आंव, और जदि कोऊ को कछु बेईमानी से लै लओ आय तो ऊ ए चौगुना फेर देत आंव।

⁹ तब यीशु ने ऊसे कओ; आज ई घर में उद्धार आओ आय, ई लाने कि जौ सोई इब्राहीम कौ एक पूत आय।

¹⁰ कायसे मान्स कौ पूत हिराने भयन हां ढूढ़बे और उन कौ उद्धार करबे हां आओ आय।

¹¹ जब बे औरें जे बातें सुन रए हते, तो यीशु ने एक कनौत कई, ई लाने कि बो यरूशलेम के ऐंगर हतो, और बे समजत हते, कि परमेसुर कौ राज अबई उजागर होन चाहत आय।

¹² सो ऊ ने कओ, एक धनी मान्स दूर देस हां गओ कि राज पद पाके वापस आबै।

¹³ सो ऊने अपने दस चाकर बुला के उन हां दस मोहरें दईं, और उन से कओ, मोरे लौट आबे लौ लेन देन करियो।

¹⁴ पर ऊके नगर के रैबेवारे ऊसे जलत हते, और ऊके पांछू दूतन के द्वारा कहबे पठैओ, कि हम नईं चाहत, कि जौ हम पे राज करे।

¹⁵ जब बो राजपद पा के लौट आओ, तो ऐसो भओ कि ऊ ने अपने चाकरन हां जिन हां रकम दई हती, अपने ऐंगर बुलाओ, कि मालूम करे कि उन ने लेन-देन से का कमाओ।

¹⁶ तब पेंले ने आके बताओ, हे मालक तोरी मोहर से मैं ने दस और मोहरें कमाई आंय।

¹⁷ मालक ने ऊ चाकर से कओ; धन्न आय हे भौतई साजे चाकर, तें तनक में बिसवासी कड़ो अब दस नगरों पे अधकारी हो जा।

¹⁸ दूसरे ने आन के कओ; हे मालक मैं ने तोरी मोहर से पांच और मोहरें कमाई आंय।

¹⁹ मालक ने ऊसे सोई कओ, तें सोई पांच नगरों कौ अधकारी हो जा।

²⁰ तीसरे ने आके कओ; हे मालक हेर, तोरी मोहर जे आंय, जिए मैं ने अंगोछा में बान्ध धरो आय।

²¹ कायसे मैं तोसे डरत हतो, ई लाने कि तें कठोर मान्स आय: जौन तेंने नईं धरो बो तें उठा लेत आय, और जौन तेंने नईं बोओ बो तें काटत आय।

²² मालक ने ऊसे कओ; हे दुष्ट चाकर, मैं तोरे ही मों से तोहां दोषी ठैराऊत आंव: तें मोय जानत हतो कि मैं कठोर मान्स आंव, जौन मैं ने नईं धरो ऊ ए उठा लेत आंव, और जौन मैं ने नईं बोओ, ऊ ए काटत आंव।

²³ तो तेंने मोरे रुपईया बैंक में काय नईं धर दए, कि मैं आन के ब्याज समेंत ले लेतो?

²⁴ और जौन मान्स ऐंगर ठांड़े हते, मालक ने उन से कओ, ऊ मोहर ऊसे ले लेओ, और जी लौ दस मोहरें आंय ऊ ए दे दो।

²⁵ (उन ने मालक से कओ; हे मालक, ऊके ऐंगर तो दस मोहरें आंय)।

²⁶ मैं तुम से कैत आंव, कि जीके ऐंगर आय, ऊ ए और दओ जै है; और जीके ऐंगर नईंयां ऊसे ऊ सोई जौन ऊके ऐंगर आय ऊसे ले लओ जै है।

²⁷ पर मोरे उन बैरियन हां जौन न चाहत हते कि मैं उन पे राज करों, उन हां इते लै आके मोरे सामूं घात करो।

²⁸ जे बातें कै कें बो यरूशलेम कुदाऊं उन के आंगू आंगू चलो।

²⁹ जब यीशु जैतून नाओं पहरवा पे बैतफगे और बैतनियाह के ऐंगर पोंचो, तो ऊ ने अपने चेलन में से दो हां जौ कै कें पठैओ,

³⁰ सामूं के गांव में जाओ, ऊ में पोंचतई एक गधी कौ बच्चा जौन पे कभऊ कौनऊं सवार नईं भओ, बन्धो भओ तुम हां मिल है, ऊ ए ढ़ील के ले आओ।

³¹ जदि कौनऊं तुम से पूंछे, कि काय ढ़ीलत आव, सो जौ कै दईयो, कि पिरभु हां ईकी जरूरत आय।

³² जौन पठैय गए हते, उन ने जाके जैसो यीशु ने उन से कओ हतो, ऊंसई पाओ।

³³ जब बे गधे के बच्चा हां ढ़ील रए हते, तो ऊके मालिकन ने उन से पूंछो; ई बच्चे हां काय ढ़ीलत आव?

³⁴ उन ने कओ पिरभु हां ईकी जरूरत आय।

³⁵ बे ऊहां यीशु के ऐंगर ले आए, और अपने उन्ना ऊ बच्चा पर डाल के यीशु हां ऊ पे बैठा दओ।

³⁶ जब बो जा रओ हतो, तो बे अपने उन्ना गैल में बिछात जात हते।

³⁷ और ऐंगर आत भए जब बो जैतून पहरवा की ढलान पे पोंचो, तो चेलन की सबरी भीड़ उन सब आश्चर्य कामों के काजें जौन उन ने तके हते, खुस होकें चिल्या के परमेसुर कौ जस गान लगी।

³⁸ कि धन्न आय बो राजा, जौन पिरभु के नाओं से आत आय; सरग में सान्ति और आकास मण्डल में मईमा होबे।

³⁹ तब भीड़ में से कछु धरम पण्डत यीशु से कैन लगे, हे गुरू अपने चेलन हां डांट।

⁴⁰ यीशु ने उत्तर दओ, कि मैं तुम से कैत आंव, जदि जे चिमाने रएं, तो पत्थरा चिल्या उठ हैं।

⁴¹ जब बो ऐंगर आओ तो नगर हां तक के ऊ पे रोओ।

⁴² और कओ, का ही भलो होतो, कि तें; हओ, तेंई, ऐई दिना में कुशल की बातें जानतो, पर अब बे तोरी आंखन से लुक गईं आंय।

⁴³ कायसे बे दिना तो पे आ हैं, कि तोरे बैरी मोर्चा डाल के तोहां घेर लें हैं, और चारऊं कोद से तोहां दबा हैं।

⁴⁴ और तोय और तोरे बच्चन हां जौन तो में आंय, माटी में मिला हैं, और तो में पत्थरा पे पत्थरा लौ न छोड़ हैं; कायसे तेंने ऊ मौका हां जब तो पे दया किरपा करी गई न चीनो।

⁴⁵ तब यीशु मन्दर में जाके उते से लेन-देन करबेवारन हां बायरें काड़न लगो।

⁴⁶ और उन से कओ, लिखो आय; मोरो घर बिन्तवाई कौ घर हुईये: पर तुम ने ऊहां डांकुअन की खोह बना दओ आय।

⁴⁷ और यीशु रोज के रोज मन्दर में उपदेस करत हतो: और धरम महा पण्डत और शास्त्र ज्ञाता और मान्सन के मुखिया ऊहां मार डालबे कौ मौका ढूंढत हते।

⁴⁸ पर कौनऊं उपाय न खोज सके; कि यीशु हां कौन भांत मार डालें, कायसे सबरे मान्स बड़ी चाह से ऊ की सुनत हते।