- लूका 15 - Bundeli Holy Bible

¹ सबरे चुंगी लेबेवारे और अधरमी यीशु के ऐंगर आत हते कि ऊ की बातें सुनें।

² और धरम पण्डत और शास्त्र पण्डत कुड़कुड़ा के कै न लगे, कि जौ तो अधरमी मान्सन से मिलत आय और उन के संग्गै खात सोई आय।

³ तब यीशु ने उन से जा कनौत कई।

⁴ तुम में से कौन ऐसो मान्स आय जी की सौ गाड़रें होबें, और उन में से एक हिरा जाबै; तो निन्नानबे हां हार में छोड़ के, ऊ हिरानी भई हां जब लग मिल न जाबे ऊ ए ढूंढ़त रए?

⁵ और जब ऊहां मिल जात आय, तब बो बड़ी खुसी से ऊ गाड़र हां कन्धा पे उठा लेत आय।

⁶ और घर में आके मित्रों और पड़ोसियन हां जोड़ के कैत आय, मोरे संग्गै खुसी मनाओ, कायसे मोरी हिरानी भई गाड़र मिल गई आय।

⁷ मैं तुम से कैत आंव; ऐई भांत एक हिया फेरबेवारे अधरमी के लाने सोई सरग में इतनी खुसी होत आय, जितनो के निन्नानबे ऐसे धरमियन के लाने नईं होत, जिन हां हिया फेरबे की जरूरत नईंयां।

⁸ या कौन ऐसी बईयर हुईये, जीके ऐंगर दस सिक्के होबें, और उन में से एक हिरा जाबै; तो बो दिया बार के और घर झाड़ बुहार के जब लौ हिरानो भओ सिक्का मिल न जाबे, ढूंढ़त न रैबे?

⁹ और जब मिल जात आय, तो बा अपनी सखियों और पड़ोसन हां जोड़ के कैत आय, मोरे संग्गै खुसी मनाओ, कायसे मोरो हिरानो भओ सिक्का मिल गओ आय।

¹⁰ मैं तुम से कैत आंव; कि ऐई भांत से एक हिया फेरबेवारे अधरमी के विषय में परमेसुर के सरगदूतन के सामूं खुसी मनाई जात आय।

¹¹ फिन यीशु ने कओ, कोऊ मान्स के दो पूत हते।

¹² उन में से हल्के ने अपने बाप से कओ, घर के मालपानू में से जौन मोरो हींसा होय, बो मोहां दे देओ। ऊ ने उन में अपनो मालपानू बांट दओ।

¹³ बिलात दिना न कड़ पाए हते कि हल्को पूत अपनो सब कछु लेके दूर परदेस हां चलो गओ, और उते बुरए कामन में अपनो मालपानू उड़ा दओ।

¹⁴ जब बो सब कछु गंवा चुको, तो ऊ देस में अकाल पड़ो, और ऊ कंगाल हो गओ।

¹⁵ और बो ऊ देस के रैबेवारन में से एक के इते जा पोंचो: ऊ ने ऊहां अपने खेतन में सुअर चराबे हां पठैओ।

¹⁶ और ऊ चाहत हतो, उन फलियन से जौन सुअर खात हते अपनो भेट भरे; और ऊहां कोई कछु न देत हतो।

¹⁷ जब ऊ अपने होस में आओ, तब कैन लगो, मोरे बाप के कितेक मजूरन हां जितनी चाने ऊसे अधक रोटी मिलत आय, और मैं इते भूखो मर रओ आंव।

¹⁸ मैं अब उठ के अपने बाप के ऐंगर जै हों और ऊसे कैहों कि मैंने सरग के बिरोध में और तोरे बिरोध में सोई पाप करो आय।

¹⁹ अब मैं कोनऊं भांत से तोरो पूत नईं रओ, मोहां अपने एक मजूर की घांई धर ले।

²⁰ तब ऊ उठ के, अपने बाप के ऐंगर जाबे हां चलो: बो अबै दूरई हतो, कि ऊके बाप ने ऊहां तक के तरस खाओ, और दौड़ के ऊहां गले से लगाओ, और कुल्ल बेर चूमो।

²¹ पूत ने ऊसे कओ, मैं ने सरग के बिरोध में और तोरे तकत पाप करो आय; और अब ई जोग नईं रओ, कि तोरो पूत कहाओं।

²² पर बाप ने अपने चाकरन से कओ; तुरतऊं बढ़िया से बढ़िया उन्ना ऊ ऐ पैराओ, और ऊके हाथ में छल्ला, और गोड़न में पनईंयां पैराओ।

²³ और पलो भओ बकरा लाके मारो कि हम खाबें और खुसी मनाबें।

²⁴ कायसे मोरो जौ पूत मर गओ हतो, फिन जी गओ आय: हिरा गओ हतो, अब मिल गओ आय: और बे खुसी मनाऊन लगे।

²⁵ पर ऊकौ जेठो पूत खेत में हतो: और जब आत भओ बो घर के ऐंगर पोंचो, तो ऊ ने गाबे बजावे और नाचबे के बोल सुने।

²⁶ ऊ ने एक चाकर हां बुला के पूंछो; जौ का हो रओ आय?

²⁷ ऊ ने ऊसे कओ, तोरो भईया आओ आय; और तोरे बाप ने घर कौ पलो भओ बकरा कटवाओ आय, ई लाने कि ऊहां भलो साजो पाओ आय।

²⁸ जौ सुन के बो खुन्स से भर गओ, और घर के भीतर न जाबो चाहो: पर ऊकौ बाप बायरें आन के उए मनान लगो।

²⁹ ऊ ने बाप हां उत्तर दओ, कि तक; मैं इतने बरसन से तोरी सेवा कर रओ आंव, और कभऊं तोरो हुकम नईं टालो, तौ भी तेंने मोय एक बकरी को बच्चा लौ न दओ, कि मैं दोस्तन के संग्गै खुसी मनातो।

³⁰ पर जब तोरो जौ पूत, जीने तोरो मालपानू वेश्याओं में उड़ा दओ, आओ आय, तो तेंने ऊके लाने पलो भओ बकरा कटवा दओ।

³¹ ऊ ने ऊसे कओ; बेटा, तें हमेसा मोरे संग्गै आय; और जौन कछु मोरो आय बो सब तोरो आय।

³² अब खुसी मनाबो और मगन होबो चईये, कायसे जौ तोरो भाई मर गओ हतो फिन जी गओ आय; हिरा गओ हतो, अब मिल गओ आय।