- यहोशू 1 - Bundeli Holy Bible

यहोशू हों यहोवा परमेसुर कौ हुकम

¹ यहोवा परमेसुर के दास मूसा के मरबे के बाद यहोवा परमेसुर ने ऊके सेवक यहोशू सें जौन नून कौ मोंड़ा हतो, कई,

² “मोरो दास मूसा मर गओ आय; ई लाने अब तें उठ, ई पूरी परजा समेंत यरदन के ऊ पार होकें ऊ देस हों जा जीहों मैं ऊहों मतलब इस्राएलियन हों देत आंव।

³ ऊ बचन के अनसार जौन मैंने मूसा सें कई, मतलब कि जौन-जौन जागां पै तुम गोड़े धरहौ ऊ पूरी मैं तुमहों दे देत आंव।

⁴ जंगल और ऊ लबानोन सें लैकें फरात महानद लौ, और पच्‍छिम कुदाऊं महासमंदर लौ हित्तियों कौ पूरो देस तुमाओ भाग ठैरहै।

⁵ तोरे जीवन भर कोऊ तोरे सामूं ठैर नें पाहै; जैसे मैं मूसा के संगै रओ बैसई तोरे संगै भी रैहों; और नें तौ मैं तोए छोड़हों, और नें तोए हों त्यागहों।

⁶ ई लाने हिम्‍मत बांधकें पक्‍को हो जा; कायसे जौन देस के देबे की कौल मैंने इन मान्‍सन के पुरखों सें करी हती ऊकौ अधकार तें इनहों दिलाहै।

⁷ इतनों होए कि तें हिम्‍मत बांधकें और बेजा पक्‍को होकें जौन ब्‍यवस्‍था मोरे दास मूसा ने तोहों दई आय उन सबके अनसार करबे में चौकसी करियो; और ऊसें नें तौ दायने मुड़ियो और नें बांए, तब जितै-जितै तें जैहै उतै-उतै तोरो काम सफल हुईये।

⁸ ब्‍यवस्‍था की जा पोथी तोरी जीभ सें कभऊं नें उतरने पाए, ऐई में दिन-रात ध्‍यान दए रईयो, ई लाने कि जो कछु ऊमें लिखो आय ऊके अनसार करबे की तें चौकसी करे; कायसे एैसई करबे सें तोरे सबरे काम सफल हुईयें, और तें प्रभावसाली हुईये।

⁹ का मैंने तोए हुकम नईं दओ? हिम्‍मत बांधकें पक्‍को हो जा; डरियो नें, और तोरो मन कच्‍चो नें होए; कायसे जितै-जितै तें जैहै, उतै-उतै तोरो यहोवा परमेसुर तोरे संगै रैहै।”

यहोशू कौ मान्‍सन हों हुकम दैबो

¹⁰ तब यहोशू ने परजा के सरदारों हों जौ हुकम दओ,

¹¹ “छावनी में इतै-उतै जाकें परजा के मान्‍सन हों जौ हुकम देओ, कि अपने-अपने लाने भोजन तईयार करके रखौ; कायसे तीन दिना के भीतर तुमहों ई यरदन के पार उतरकें ऊ देस हों अपने अधकार में लैबे के लाने जाने आय जीहों तुमाओ यहोवा परमेसुर तुमाए अधकार में दैबेवारो आय।”

¹² फिन यहोशू ने रूबेनियों, गादियों और मनश्‍शे के आधे गोत्र के मान्‍सन सें कई,

¹³ “जौन बात यहोवा परमेसुर के दास मूसा ने तुम सें कई हती कि ‘तुमाओ यहोवा परमेसुर तुमहों आराम देत आय, और जौई देस तुमहों दैहै, ऊकी सुध करो।’

¹⁴ तुमाई बईयरें, बाल-बच्‍चे, और पसु तौ ई देस में रएं जौन मूसा ने तुमहों यरदन के ऐई पार दओ, परन्‍त तुम जौन सूरवीर आव पांति बांधे भए अपने भईयों के आंगू-आंगू पार उतर चलो, और उनकी मदद करो;

¹⁵ और जब यहोवा परमेसुर उनहों एैसो आराम दैहै जैसो ऊ तुमहों दै चुको आय, और बे सोई तुमाए यहोवा परमेसुर के दए भए देस के अधकारी हो जैहें; तब तुम अपने अधकार के देस में, जौन यहोवा परमेसुर के दास मूसा ने यरदन के ई पार पूरब कोद तुमहों दओ आय, लौटकें ईके अधकारी हुईयो।”

¹⁶ तब उनोंरन ने यहोशू हों जवाब दओ, “जो कछु तेंने हमें करबे कौ हुकम दओ आय ऊ हम करहें, और जितै कऊं तें हमें पठैय उतै हम जैहें।

¹⁷ जैसे हम पूरी बातों में मूसा की मानत हते बैसई तोरी सोई मानहें; इतनौ होए कि तोरो यहोवा परमेसुर जैसो मूसा के संगै रैत हतो बैसई तोरे संगै भी रए।

¹⁸ कोऊ काए नें होए जौन तोरे बिरुद्ध बलवा करे, और जितेक हुकम तें दैबे उनहों नें मानें, तौ ऊ मार डालो जैहै। परन्‍त तें पक्‍को और हिम्‍मत बांधे रै।”