- योना 3 - Bundeli Holy Bible

हुकम कौ मानबो

¹ तब यहोवा परमेसुर कौ जौ बचन दूसरी बेरां योना के लिगां पोंचो,

² “उठकें ऊ बड़े नगर नीनवे हों जा और जौन बात मैं तोहों बताहों, ऊकौ ऊमें परचार कर।”

³ तब योना यहोवा परमेसुर के बचन के अनसार नीनवे हों गओ। नीनवे एक भौत बड़ो नगर हतो, ऊमें घूमबे के लाने तीन दिना लगत हते।

⁴ योना ने नगर में पोंचकें एक दिना कौ सफर पूरो करो और जौ परचार करत गओ, “अब सें चालीस दिना बीतबे पै नीनवे कौ नास हो जैहै।”

⁵ तब नीनवे के मान्‍सन ने यहोवा परमेसुर के बचन की बात पै बिसवास करो; और उपासे रैबे कौ परचार करो और बड़े सें लेकें छोटे लौ सबई ने टाट ओढ़ो।

⁶ जब जौ समाचार नीनवे के राजा के कान में पोंचो तो ऊने सिंहासन पै सें उठकें, राजसी उन्‍ना उतारकें टाट ओढ़ लओ और राख पै बैठ गओ।

⁷ और ऊने परधानों संगै पूरे नीनवे में ढ़िंढोरा पिटवाओ: “का मान्‍स, का गईया-बैलवा, का गाड़र-छिरियां, और सबरे पसु, कोऊ भी कछु नें खाबै; और कछु नें पियें।

⁸ मान्‍स और पसु दोई टाट ओढ़ें, और बे यहोवा परमेसुर की दुहाई चिल्‍या-चिल्‍याकें देबें; और अपने कुकर्म सें पलटें; और ऊ उपद्रे, जौन बे करत आंय, पछताबो करें।

⁹ हो सकत आय, यहोवा परमेसुर दया करे और अपनी इच्‍छा बदल देबें और उनको भड़को भओ खुन्‍स सान्‍त हो जाबै, और हमोंरें नास होबे सें बच जाबैं।”

¹⁰ जब यहोवा परमेसुर ने उनके कामन हों तको, कि बे कुमार्ग सें फिर रए आंय, तब ऊने अपनी इच्‍छा बदल दई और उनोंरन की जो हानि करबे की ठानी हती, ऊहों नें करो।