- यूहन्‍ना 8 - Bundeli Holy Bible

¹ परन्त यीशु जैतून पहरवा पे गओ।

² भुनसारे बो फिन मन्दर में आओ, सब लोग ऊके ऐंगर आन लगे; और बो बैठके उन हां सन्देस देन लगो।

³ तब फरीसी और शास्त्री एक बईयर हां लाए, जौन व्यभिचार में पकड़ी गई हती, और ऊहां बीच में ठांड़ो करोऔर यीशु से कई।

⁴ हे गुरू, जा बईयर व्यभिचार करत भए पकड़ी गई आय।

⁵ रीतियन में तो मूसा ने हम हां ऐसी बईयर हां पत्थरवाह करबे कौ हुकम दओ आय, तें ईके बारे में का कहत आय?

⁶ बे ऊहां परखबे के लाने ऐसो कह रए हते, जीसे कि ऊ पै दोष लगाबे के लाने कोऊ बात मिले, परन्त यीशु झुक के अपनी उंगरिया से धरती पे लिखन लगो।

⁷ जब बे बेर बेर ऊसे पूछत रए, तो ऊ ने सूदे ठांड़े होकें उन से कई, तुम में से जीने कछु पाप नईं करो होबे, ओई सब से पेंला ऊहां पथरा मारे।

⁸ और फिन झुक के उंगरिया से धरती पे लिखन लगो।

⁹ जब उन ने जा सुनी तो पेंला सियाने और फिन एक एक करके सब जने चले गए और बो अकेलो रह गओ, और बईयर उतईं बीच में ठांड़ी रह गई।

¹⁰ तब यीशु ने सूदे ठांड़े होकें ऊसे कई, हे बईयर, बे किते गए? का कोऊ ने तोय दण्ड कौ हुकुम नईं दओ?

¹¹ ऊ ने कई, कोऊ ने भी नईं प्रभु, तब यीशु ने कई, मैं भी तोय दण्ड कौ हुकुम नईं देत; जा, अब फिन पाप न करियो।

¹² यीशु ने फिन लोगन से कई, जगत की ज्योत मैं आंव; जौन मोरे पाछें चल है, बो अन्धयारे में नईं निंग है, परन्त जीवन की ज्योत पा है।

¹³ फरीसियन ने ऊसे कई; तें अपनी गवाही खुद दे रओ आय; तोरी गवाही सांची नईंयां।

¹⁴ यीशु ने उन से कई; जदि अपनी गवाही मैं खुद देत आंव, तौभी मोरी गवाही ठीक आय, कायसे मैं जानत आंव, कि मैं किते से आओ हों और किते जा रओ आंव? परन्त तुम नईं जानत कि मैं किते से आओ या किते जात आंव।

¹⁵ तुम लोग सरीर के अन्सार न्याव करत आव; मैं कोऊ कौ न्याव नईं करत।

¹⁶ अगर मैं न्याव करों भी, तो मोरो न्याव सांचो आय; कायसे मैं अकेलो नईंयां, परन्त ऊ में आंव, और मोरो पठैबेवालो भी आय।

¹⁷ तुमाई रीतियन में लिखो है, कि दो मान्स की गवाही मिल के ठीक होत आय।

¹⁸ एक तो मैं अपनी गवाही खुद देत आंव, और दूसरो आय बाप जीने मोय पठैव और मोरे बारे में गवाही देत आय।

¹⁹ तब बे ऊसे कैन लगे, तोरो बाप किते आय? यीशु ने उन से कई, तुम न तो मोय जानत आव, और न मोरे बाप हां, अगर तुम मोय जानते, तो मोरे बाप हां सोई जानते।

²⁰ जे बातें ऊ ने मन्दर में उपदेस देत भए खजाने घर में कईं, और कोऊ ने ऊहां नईं पकड़ो; कायसे ऊ की बेरा अबै लौ नईं आई हती।

²¹ ऊ ने फिन उन से कई, मैं जानत आंव और तुम मोय ढूंड़ हौ और अपने पापन में मर हौ: जिते मैं जा रओ आंव, उते तुम नईं आ सकत।

²² ईपे यहूदी कैन लगे, कहूं बो अपने आप हां मार तो न डाल है, बो कहत आय; जिते मैं जा रओ आंव उते तुम नईं आ सकत?

²³ ऊ ने उन से कई, तुम खालें के आव, मैं ऊ परै कौ आंव; तुम ई जगत के आव, मैं ई जगत कौ नईंयां।

²⁴ ई लाने मैं ने तुम से कई, कि तुम अपने ही पापन में मर हौ; कायसे जब लौ तुम भरोसा न कर हौ कि मैं ओई आंव, तुम अपने पापन में मर हौ।

²⁵ बे ऊसे कैणन लगे, तें को आय? यीशु ने उन से कई, ओई आंव जौन मैं तुम से पेंला से कहत आ रओ आंव।

²⁶ मोय तुमाए बारे में बिलात बातें कैने और न्याव करने आय, परन्त जीने मोय पठैव बो सांचो आय; और बे बातें जौन मैंने ऊसे सुनी, बे ही मैं जगत से कहत आंव।

²⁷ बे जा नईं समझे कि बो उन से बाप के बारे में कह रओ हतो।

²⁸ तब यीशु ने उन से कई, जब तुम मान्स के पूत हां ऊंचे पे चढ़ा हौ, तब तुम जान जै हौ कि मैं ओई आंव, और मैं अपने से कछु नईं करत, पर जैसो बाप ने मोय सिखाओ, मैं वैसई बातें कैत आंव।

²⁹ जीने मोय पठैव बो मोरे संग्गै आय; ऊ ने मोय अकेलो नईं छोड़ो; कायसे मैं सदा बे ही काज करत आंव, जीसे बो खुस होत आय।

³⁰ जब ऊ ने जे बातें कईं, तो बिलात ने ऊ पै भरोसा करो।

³¹ तब यीशु ने उन यहूदियन से जिन ने ऊ पे भरोसा करो हतो, कहन लगे, जदि तुम मोरे कहबे जैसो कर हौ, तो सांची में मोरे चेले कहा हौ।

³² और तुम सत्य हां जान हौ, सत्य तुम हां छुटकारो दै है।

³³ उन ने ऊसे कई; हम तो इब्राहीम के कुल से आंय और अब लौ कोऊ के चाकर नईं भए, तो फिन तें कैसे कहत आय, तुम छुट्टा हो जै हौ?

³⁴ यीशु ने उन से कई; मैं तुम से सांची सांची कहत आंव, जौन पाप करत आय, ऊ पाप कौ चाकर आय।

³⁵ चाकर सदा घरै नईं रहत; पूत सदा रहत आय।

³⁶ ई लाने अगर पूत तुम हां छुट्टा कर है, तो तुम सांची में छुट्टा हो जै हौ।

³⁷ मैं जानत आंव कि तुम इब्राहीम के कुल के आव; तौभी मोरो कहबो तुमाए मन में नईं बैठत, ई लाने तुम मोय मार डालबो चाहत आव।

³⁸ मैं बेई बातें कहत आंव, जिन हां अपने बाप के इते तको आय; ऐसई तुम भी बेई काज करत आव जिन हां, तुम ने अपने बाप से सुनो आय।

³⁹ उन ने ऊसे कई हमाओ बाप तो इब्राहीम आय, यीशु ने उन से कई; अगर तुम इब्राहीम की लड़ेर होते, तो इब्राहीम की घांई काज करते।

⁴⁰ परन्त अब तुम मोय जैसे मान्स हां मार डालबो चाहत आव, जीने तुम हां ऊ सत्य हां बताओ जौन मैंने परमेसुर से सुनो, ऐसो तो इब्राहीम ने नईं करो हतो।

⁴¹ तुम अपने बाप के काज हां कर रए आव: उन ने ऊसे कई, हम व्यभिचार से नईं जन्मे; हमाओ एक बाप आय यानि परमेसुर।

⁴² यीशु ने उन से कई; जदि परमेसुर तुमाओ बाप होतो, तो तुम मोसे प्रेम रखते; कायसे मैं परमेसुर से कड़ के आओ हों; मैं अपनी मनसा से नईं आओ, परन्त ओई ने मोय पठैव आय।

⁴³ जौन मैं कह रओ आंव ऊहां तुम काय नईं समझत? ई लाने कि तुम मोरो बचन नईं सुन सकत।

⁴⁴ तुम अपने बाप शैतान से आव, और अपने बाप की मनकी बात हां पूरो करबो चाहत आव। बो तो शुरु से हत्यारो आय, और सत्य पे टिको नईं रओ, कायसे सत्य ऊ में हैई नईंयां: जब बो झूट बोलत आय, तो अपने गुन से बोलत आय; कायसे बो झूटो आय, और झूट कौ बाप आय।

⁴⁵ मैं सांची बोलत आंव, ई लाने तुम मोरो भरोसा नईं करत।

⁴⁶ तुम में से को मोय पापी ठहरात आय? अगर मैं सांची बोलत आंव, तो तुम मोरो भरोसा काय नईं करत?

⁴⁷ जौन परमेसुर कौ आय, बो परमेसुर की बातें सुनत आय, तुम ई लाने उन हां नईं सुनत कायसे तुम परमेसुर के नईं आव।

⁴⁸ जा सुनके यहूदियन ने यीशु से कई; का हम सही नईं कहत, कि तें सामरी आय, और तो में दुष्ट आत्मा आय?

⁴⁹ यीशु ने उन से कई, मोय में दुष्ट आत्मा नईंयां; परन्त मैं अपने बाप कौ मान करत आंव, और तुम मोरो अपमान करत आव।

⁵⁰ मैं अपनो मान नईं चाहत, एक आय, जौन चाहत आय, और न्याव करत आय।

⁵¹ मैं तुम से सांची सांची कहत आंव, अगर कोऊ मोरो बचन कौ पालन कर है, तो बो कभऊं मृत्यु हां न तक है।

⁵² यहूदियन ने ऊसे कई, अब हम जान गए आंय कि तो में दुष्ट आत्मा आय: इब्राहीम मर गओ, और अगमवकता सोई मर गए और तें कहत आय, कि अगर कोऊ मोरे बचन कौ पालन कर है, तो बो कभऊं मृत्यु कौ स्वाद नईं चख है।

⁵³ सही में तें हमाए बाप इब्राहीम से बड़ो नईंयां, जौन मर गओ, अगमवकता भी मर गए, तें अपने खुद हां का समझत आय?

⁵⁴ यीशु ने उन से कई; जदि मैं खुद की बड़ाई करों, तो मोरो मान कछु भी नईंयां, मोय मान देबेवालो मोरो बाप आय, जीके बारे में तुम कहत आव, कि बो हमाओ परमेसुर आय।

⁵⁵ तुम ने तो ऊहां नईं चीनो, परन्त मैं ऊहां चीनत आंव; अगर मैं कहों कि मैं ऊहां नईं चीनत, तो मैं तुमाए घांई झूठो ठहर हों: परन्त मैं ऊहां चीनत और ऊके बचन को मानत आंव।

⁵⁶ तुमाओ बाप इब्राहीम मोरो दिन तकबे की आस में खुस हतो, ऊ ने तको भी और खुस भओ।

⁵⁷ यहूदियन ने ऊसे कई, तें अबै पचास बरस कौ नईंयां; फिन भी तेंने इब्राहीम हां तको आय?

⁵⁸ यीशु ने उन से कई; मैं तुम से सांची सांची कहत आंव; ईसे पेंला कि इब्राहीम पैदा भओ मैं आंव।

⁵⁹ तब उन ने ऊहां मारबे के लाने पत्थरा उठाए, परन्त यीशु लुक के मन्दर से बायरें कड़ गओ।