- यूहन्‍ना 4 - Bundeli Holy Bible

¹ फिन जब प्रभु हां पता पड़ो, कि फरीसियन ने सुनो आय, कि यीशु यूहन्ना से बढ़कें चेला बनात आय, और उन हां बपतिस्मा देत आय।

² (जबकि यीशु खुद नईं बल्कि ऊके चेला बपतिस्मा देत हते)।

³ तब बो यहूदिया हां छोड़ के फिन गलील हां चलो गओ।

⁴ और ऊहां सामरिया में होकें जाबो जरूरी हतो।

⁵ ई लाने बो सामरिया के सूखार नाओं के एक नगर में आओ, जौन ऊ जमीन के ऐंगर आय, जीहां याकूब ने अपने पूत यूसुफ हां दई हती।

⁶ और याकूब कौ कु आं उतईं हतो; ई लाने निंगत निंगत थक के यीशु कुआं के ऊपर ऐंसई बैठ गओ, ऊ बेरा करीब बारह बजे हते।

⁷ इतेक में एक सामरी बईयर पानू भरबे आई, यीशु ने ऊसे कई, मोय पानू पिला।

⁸ कायसे ऊके चेले खाबे हां मोल लेबे के लाने नगर में गए हते।

⁹ ऊ सामरी बईयर ने ऊसे कई, तें यहूदी होकें मोय से पानू काय मांगत आय? (कायसे यहूदी सामरियन के संग्गै कोई तरहां को ब्यौहार नईं धरत)।

¹⁰ यीशु ने ऊसे कई, अगर तें परमेसुर के बरदान हां चीनती, और जौ भी कि बो को आय जो तोसे कैत आय; मोय पानू पिला तो तें ऊसे मांगती, और बो तोय जीवन कौ पानू देतो।

¹¹ बईयर ने ऊसे कई, हे प्रभु, तोरे ऐंगर पानी भरबे हां कछु नईंयां, और कुआं गहरो आय, तो बो जीवन कौ पानू तोरे ऐंगर किते से आओ?

¹² का तें हमाए बाप याकूब से भी बढ़के आय, जीने हम हां जौ कुआं दओ; और जी में से ऊ ने पियो और ऊ की लड़ेरन और ऊके ढोरन ने सोई पियो।

¹³ यीशु ने जवाब देत भए ऊसे कई, कि जो कोनऊं ई पानू में से पी है बो फिन प्यासो हुईये।

¹⁴ पर जो कोनऊं ऊ पानू में से पी है, जौन मैं ऊहां दै हों, बौ कभऊं प्यासो नईं हुईये, कायसे बो पानू ऐसो दैहों, ऊ में सदा लौ जीबे के लाने उमड़बे वालो पानू कौ सोता बन जै है।

¹⁵ बईयर ने ऊसे कई, हे प्रभु, बौ पानू मोय भी दे जीसे मैं फिन प्यासी न होऊं, और न पानू भरबे इते लौ आने पड़े।

¹⁶ यीशु ने ऊसे कई, जाके अपने घरवारे हां इते टेर ला।

¹⁷ बईयर ने ऊसे कई, मोरो कोऊ घरवारो नईंयां: यीशु ने ऊसे कई, तेंने सांची कई, तोरो कोऊ घरवारो नईंयां।

¹⁸ कायसे तोरे पांच घरवारे भए आंय, और अबै जौन तोरे ऐंगर आय बो भी तोरो घरवारो नईंयां; जे तेंने सांची कई आय।

¹⁹ ऊ बईयर ने ऊसे कई, हे प्रभु, मोय लगत आय कि तें अगमवकता आय।

²⁰ हमाए पुरखन ने ई पहरवा पे प्रार्थना करी, और तुम कहत आव कि यरूशलेम बो जांगह आय, जिते मान्सन हां प्रार्थना करो चईये।

²¹ यीशु ने ऊसे कई, हे बईयर, मोरो भरोसा कर कायसे बेरा आ रई आय, जब तुम न ई पहरवा पे और न यरूशलेम में बाप की प्रार्थना कर हौ।

²² तुम ऊ की प्रार्थना करत आव, जीहां नईं चीनत; हम ऊ की प्रार्थना करत आंय जीहां हम चीनत आंय; कायसे तरन तारन यहूदियन में से आय।

²³ पर बो बेरा आ रई आय, बल्कि आई गई आय, जब सांचे भक्त बाप की प्रार्थना आत्मा और सच्चाई से कर हैं, कायसे बाप अपने लाने ऐंसई भक्त चाहत आय।

²⁴ परमेसुर आत्मा आय, और जरूरी आय कि ऊके भक्त आत्मा और सच्चाई से ऊ की प्रार्थना करें।

²⁵ बईयर ने ऊसे कई, मैं जानत आंव कि मसीह जौन ख्रीष्ट कहलात आय, आबेवालो है; जब बो आ है, तो हम हां सब कछु बता दै है।

²⁶ यीशु ने ऊसे कई, मैं जौन तोसे बोल रओ आंव, ओई आंव।

²⁷ इतेक में ऊके चेले आ गए, और ऊहां एक बईयर से बतकाव करत अचरज में पड़ गए; फिन भी कोऊ ने जा नईं पूंछी, कि तें का चाहत आय?

²⁸ ऊ बईयर ने अपनो मटका उतईं छोड़ दओ, और नगर में जाके लोगन से कई।

²⁹ आओ, एक मान्स हां तको, जीने बो सब कछु जौन मैंने करो, ऊ ने मोय बता दओ: कहूं जौई तो मसीह नईंयां?

³⁰ बे नगर से निकल के ऊके ऐंगर आन लगे।

³¹ ओई बेरा ऊके चेलन ने ऊसे बिनती करी, हे गुरू, कछु खा ले।

³² पर यीशु ने उन हां बोलो, मोरे ऐंगर खाबे हां ऐसी रोटी आय, जीके बारे में तुम नईं जानत आव।

³³ चेले आपस में कहन लगे, कहूं कोऊ ऊके लाने रोटी तो नईं लाओ?

³⁴ यीशु ने उन से कई, मोरी रोटी जा आय कि अपने पठैबेवाले की मन की बात पूरी करों और ऊ को काज पूरो करों।

³⁵ का तुम जा नईं कहत, अबै कटनी होबे में चार महिना रह गए आंय? तको, मैं तुम से कहत आंव, अपनी आंखें उठाके खेतन पे नजर डालो, बे कटनी के लाने पक गए आंय।

³⁶ काटबे वारन हां मजूरी मिलत आय, और बो अनन्त जीवन के लाने फल बटोरत आय; कि बोबेवारो और काटबेवाले दोई मिलके खुसी मना सकें।

³⁷ कायसे इते जे कनौत सांची बैठत आय, एक बोत है और दूसरो काटत आय।

³⁸ मैंने तुम हां बो खेत काटबे पठैव, जी में तुम ने मेहनत नईं करी, दूसरन ने मेहनत करी और तुम ऊ की मेहनत के फल में संग्गी भय।

³⁹ ऊ नगर के कितेक सामरियन ने यीशु पे भरोसा करो, कायसे ऊ बईयर ने गवाही दई हती, की जो कछु मैंने करो, बो सब ऊ ने मोय बता दओ।

⁴⁰ सामरियन ने आके ऊसे बिनती करी, कि बो उन के संग्गै रय, तो बो दो दिना उन के संग्गै रहो।

⁴¹ ऊके बोलबे से बिलात दूसरे जनों ने सोई ऊ पै भरोसा करो।

⁴² और ऊ बईयर से कहन लगे, अब हम तोरे कहबे से भरोसा नईं करत; कायसे हम ने खुद सुन लओ आय, और हम जान गए आंय कि जौई सांची में जग कौ मुक्ति देबेवालो आय।

⁴³ दो दिना के पाछें बो उते से निकल के गलील हां चलो गओ।

⁴⁴ कायसे यीशु ने खुद गवाही दई, कि अगमवकता अपने देस में मान नईं पात।

⁴⁵ जब बो गलील में पहुंचो, तो गलीलियन ने ऊ को मान करो; बे तो उन सबई काजन हां देख चुके हते, जौन ऊ ने परब के दिना में यरूशलेम में करे हते, कायसे बे परब में उतईं गए हते।

⁴⁶ तब बो गलील के काना में आओ, जिते ऊ ने पानू हां दाखरस बना दओ हतो, उतईं राजा कौ एक चाकर हतो जीको पूत कफरनहूम में बीमार हतो।

⁴⁷ जब ऊ ने सुनी कि यीशु यहूदिया से गलील में आ गओ आय, तो बो ऊके ऐंगर गओ और ऊसे बिनती करन लगो, कि चलकें मोरे लरका हां साजो कर दे: कायसे बो मरबे पे हतो।

⁴⁸ यीशु ने ऊसे कई, जब लों तुम चिन्ह और चमत्कार नईं देख लैहौ तब लौ भरोसा नईं कर हौ।

⁴⁹ राजा के चाकर ने ऊसे कई, हे प्रभु, मोरे लड़का के मरबे के पेंला चल।

⁵⁰ यीशु ने ऊसे कई, जा, तोरो लरका जीयत आय: ऊ मान्स ने यीशु के कैबे पे भरोसा करो और चलो गओ।

⁵¹ जब बो गैल में हतो, तो ऊके चाकर ने आके ऊसे कई तोरो लड़का जीयत आय।

⁵² ऊ ने उन से पूंछी बो कितनी बेरा साजो होन लगोे हतो? उन ने कई, कल दिन के एक बजे ऊ को ताप उतर गओ।

⁵³ तब बाप समझ गओ, कि जा ओई बेरा आय, जब यीशु ने कई हती, तोरो लड़का जीयत आय, और खुद ऊ ने और ऊके पूरे घरवारन ने भरोसा करो।

⁵⁴ जौ दूसरो चिन्ह हतो, जौन यीशु ने यहूदिया से आके गलील में करो हतो।