- यूहन्‍ना 3 - Bundeli Holy Bible

¹ फरीसियन में से नीकुदेमुस नाओं कौ एक मान्स हतो, जौन यहूदियन कौ एक हाकिम हतो।

² ऊ ने रात में यीशु के ऐंगर आके कई, हे गुरू, हम जानत आंय, कि तें परमेसुर की कोद से आओ भओ गुरू आय; कायसे इन चिन्ह हां जौन तें दिखात आय, कोऊ नईं दरसा सकत, जब लौ परमेसुर ऊके संग्गै नईं होबै।

³ यीशु ने जवाब में ऊसे कई; मैं तोसे सांची सांची कहत आंव, कि जब लौ कोऊ नए सिरे से जन्म नईं लै है, बो परमेसुर के राज्य में नईं जा सकत आय।

⁴ नीकुदेमुस ने ऊसे कई, बूढ़ो मान्स कैसे जन्म लै सकत आय? का बो अपनी मताई के गरभ में दूसरी बेर जाके जन्म लै सकत आय?

⁵ यीशु ने जवाब दओ, मैं तोसे सांची सांची कहत आंव; कि जब लौ कोऊ पानू और आत्मा से नईं जन्मे, बो परमेसुर के राज्य में नईं जा सकत।

⁶ कायसे जौन सरीर से जन्मो आय, बो सरीर आय; और जौन आत्मा से जन्मो आय, बो आत्मा आय।

⁷ अचरज नईं करियो, कि मैंने तोसे कई; जरूरी आय कि तें नओ जन्म ले।

⁸ बैहर जिते चाहत उते चलत आय, और तें ऊ को ऐरौ लेत आय, पर जौ नईं जानत, कि बो किते से आत और किते हां जात आय, जौन आत्मा से जन्म लेत आय बो ऐसो ही आय।

⁹ नीकुदेमुस ने जवाब देत भय ऊसे कई; जौ सब कैसे हो सकत आय?

¹⁰ यीशु ने जवाब देत भय ऊसे कई; तें इस्राएलियन कौ गुरू होकें भी का इन बातन हां नईं समझत?

¹¹ मैं तोसें सांची सांची कहत आंव कि हम जौन जानत आंय, ओई कहत आंय, और जीहां हमने हेरो आय, ओई की गवाही देत आंय, और तुम हमाई कई नईं मानत।

¹² जब मैंने तुम से धरती की बातें करीं, तो तुम भरोसा नईं करत, अगर मैं तुम हां सरग की बातें बताओं, तो काय भरोसा कर हौ?

¹³ और कोऊ सरग पे नईं चढ़ो, केवल ओई जौन सरग से उतरो, यानि मान्स को पूत जौन सरग में आय।

¹⁴ और जैसो मूसा ने डांग में सर्प हां ऊंचे पे टांगो, वैसई जरूरी आय कि मान्स कौ पूत भी ऊंचे पे चढ़ाओ जाबै।

¹⁵ कि जो कोऊ भरोसा करे, बो ऊ में अनन्त जीवन पाबै।

¹⁶ कायसे परमेसुर ने जगत से ऐसो प्रेम करो, कि ऊ ने अपनो एकलौतो पूत हां दे दओ, कि जो कोऊ ऊ पै भरोसा करे, बो नास न होय, बरन अनन्त जीवन पाबै।

¹⁷ कायसे परमेसुर ने अपने पूत हां जगत में ई लाने नईं पठैव, कि जगत हां दोषी ठहराए, पर ई लाने, कि जगत ऊके द्वारा उद्धार पाबै।

¹⁸ जौन ऊ पे भरोसा करत आय, बो दोषी नईं ठहराओ जात, जौन भरोसा नईं करत, बो दोषी ठहराओ जा चुको आय; कायसे ऊ ने परमेसुर के एकलौते पूत के नाओं पै भरोसा नईं करो।

¹⁹ और दोष कौ कारण जौ आय कि ज्योत जगत में आ चुकी आय, और मान्सन ने ज्योत हां अन्धयारे से बढ़के प्यारो जानो, कायसे उन के काज बुरय हते।

²⁰ कायसे हर एक जौन बुरओ करत आय, ज्योत से बैर करत आय, और ज्योत के ऐंगर नईं आत, कि कऊं ऊके काज दिखा न जाबें।

²¹ पर बो जौन सांची हां मानत आय, बो ज्योत के ऐंगर आत आय, जीसे ऐसो दिखा जाबै, कि ऊके काज परमेसुर की कोद से करे गए आंय।

²² इन बातन के बाद यीशु और ऊके चेले यहूदिया परगना में आए; और बो उतईं उन के संग्गै रह के बपतिस्मा देन लगो।

²³ यूहन्ना भी शालेम के ऐंगर ऐनोन में बपतिस्मा देत हतो। कायसे उते पानू बिलात हतो और लोग आके बपतिस्मा लेत हते।

²⁴ कायसे यूहन्ना ऊ बेरा लौ जेलखाने में नईं डालो गओ हतो।

²⁵ उते यूहन्ना के चेलन कौ कोऊ यहूदी के संग्गै शुद्ध करबे की रीत पे बतकाव होन लगो।

²⁶ और उन ने यूहन्ना के ऐंगर आके ऊसे कई, हे गुरू, जौन यरदन के ऊ पार तोरे संग्गै हतो, और जीकी तेंने गवाह दई हती, हेर, बो बपतिस्मा दे रओ आय, और सब लोगबाग ऊके ऐंगर आत आंय।

²⁷ यूहन्ना ने जबाव देत भय कई, जब लौ कोऊ मान्स हां सरग से न दओ जाबै, तब लौ बो कछु भी पा नईं सकत।

²⁸ तुम खुद मोरी गवाही देत आव, कि मैंने कई हती, मैं मसीह नईं आंव, वरन ऊके आंगू पठैव गओ आंव।

²⁹ दूल्हा ओई आय, जीकी दुल्हन आय, पर दूल्हे कौ संग्गी जौन ठांड़ो भओ ऊ की सुनत आय, दूल्हा कौ ऐरो सुनके मन में खुस होत आय; और ऐई तरहां मोरी खुसी पूरी भई आय।

³⁰ जरूरी आय कि बो बढ़े और मैं घटों।

³¹ जौन ऊ परै से आत आय, बो सबई से बढ़के आय, जौन धरती से आत आय बो धरती कौ आय; और धरती की बातें करत आय: बो जौन सरग से आत आय, बो सब से बढ़के आय।

³² जो कछु ऊ ने हेरो, और सुनो आय, ओई की गवाही देत आय; फिन भी कोऊ मान्स ऊ की गवाही नईं मानत।

³³ जीने ऊ की गवाही मान लई आय, ऊने ई बात पे छाप लगा दई, कि परमेसुर सांचो आय।

³⁴ कायसे जीहां परमेसुर ने पठैव आय, बो परमेसुर की बातें करत आय, कायसे बो बिना भेदभाव के ऊहां आत्मा देत आय।

³⁵ बाप पूत से प्रेम करत आय, और ऊ ने ओई के हाथ में सब कछु दै दओ आय।

³⁶ जौन पूत पे भरोसा करत आय, अनन्त जीवन ओई कौ आय; वरन बो जौन पूत की नईं मानत, ऊहां जीवन नईं मिल है, परन्त परमेसुर को कोप ऊ पे बनो रहत आय।