- यूहन्‍ना 2 - Bundeli Holy Bible

¹ तीसरे दिना गलील के काना में एक ब्याव हतो, और यीशु की मताई उतईं हती।

² यीशु और ऊके चेले सोई ब्याव के बुलौआ में आए हते।

³ जब दाखरस नईं बचो, तो यीशु की मताई ने ऊसे कई, उन के ऐंगर दाखरस नईंयां।

⁴ तब यीशु ने ऊसे कई, हे नारी मोय तोसे का काम? मोरी बेरा अबै नईं आई।

⁵ ऊ की मताई ने चाकरन से कई, जो कछु बो तुम से कय, ओई करियो।

⁶ उतंई यहूदियन के शुद्ध करबे की रीत के अन्सार पत्थरा के छ: मटका धरे हते, हर एक में करीब सत्तर अस्सी लीटर समाउत हतो।

⁷ यीशु ने उन से कई, मटकन हां पानू से भर देओ, और उन ने उन हां मोंह लौ भर दओ।

⁸ ऊ ने उन से कई, अब कछु काड़ के ब्यारी के मुखिया के ऐंगर लै जाओ, और बे ले गए।

⁹ जब ब्यारी के मुखिया ने बो पानू चीखो, जो दाखरस बन गओ हतो, ऊहां पता नईं हतो, कि किते से आओ आय (पर जिन चाकरन ने पानू काड़ो हतो, बे जानत हते) तब ब्यारी के मुखिया ने दूल्हे हां टेरो, और ऊसे कई।

¹⁰ सब जने मान्स पेंला उमदा दाखरस देत आय और जब लोगबाग पीके अफर जात आंय, तब घटिया देत आंय; तेंने तो उमदा दाखरस अबै लौ धरें रओ।

¹¹ गलील के काना में यीशु ने अपने अदभुत चिन्ह दिखा के अपनी महिमा दरसाई, और ऊके चेलन ने ऊ पे भरोसा करो।

¹² ईके बाद यीशु और ऊ की मताई, ऊके भईया और ऊके चेले कफरनहूम गए और उते कछु दिना रए।

¹³ यहूदियन कौ फसह कौ परब ऐंगर हतो और यीशु यरूशलेम हां गओ।

¹⁴ और मन्दर में ऊ ने बैल, गाड़रें और परेवा बेंचबेवालन और सुनारन हां बैठे भओ हेरो।

¹⁵ और गिरमा कौ एक कोड़ा बनाओ, और उन सब गाड़रन और बैल के संग्गै, मन्दर से बायरें काड़ दओ, और सुनारन के पईसा बिथरा दए, और उन की मेज हां उलट दओ।

¹⁶ और ऊ ने परेबा बेंचबेवालन से कई; इन हां इते से लै जाओ, मोरे बाप के घर हां हाट कौ घर नईं बनाओ।

¹⁷ तब ऊके चेलन हां खबर आई कि लिखो आय, तोरे मकान कौ घुन मोय खा जै है।

¹⁸ तब यहूदियन ने यीशु से कई, तें जौन जौ करत आय, तो हम हां कौन सौ चिन्ह दिखाऊ त आय?

¹⁹ यीशु ने उन से कई; ई मन्दर हां ढाह देओ, मैं ईहां तीन दिना में फिन ठांड़ो कर देंहों।

²⁰ ईपे यहूदियन ने कई; ई मन्दर हां बनाबे में छियालीस साल लगे आंय, का तें ईहां तीन दिना में ठांड़ो कर दै है?

²¹ पर बो तो अपनी देह के मन्दर के बारे में कै रओ हतो।

²² ई लाने जब बो मरे भयन में से जी गओ, तो ऊके चेलन हां खबर आई, कि ऊ ने ऐसी कई हती; भरोसा करो।

²³ जब बो फसह के परब की बेरा यरूशेलेम में हतो, तो बिलात लोगन ने उन चिन्ह हां जिन हां बो दरसात हतो, हेर के ऊके नाओं पे भरोसा करो।

²⁴ मगर जिते लौ यीशु समझत हते, ऊ ने अपने खुदई हां उन के भरोसे पे नईं छोड़ो, कायसे बो सबरन हां चीनत हतो।

²⁵ ई लाने ऊहां ई बात की जरूरत नईं हती, कि कोऊ जनो, कोऊ मान्स के बारे में गवाही देबे, कायसे बो खुद जानत हतो, कि मान्स के मन में का आय।