- यूहन्‍ना 17 - Bundeli Holy Bible

¹ यीशु ने जे बातें कह के अपनी आंखन हां आकास कोद उठा के कई, हे बाप, बो बेरा आ पहुंची आय, अपने पूत की बड़ाई कर, कि पूत भी तोरी बड़ाई करे।

² कायसे तेंने तो ऊहां सब प्राणियों पे हक दओ आय, कि बो उन सब हां जिन हां तेंने ऊहां दओ आय, उन सब हां अनन्त जीवन देबे।

³ और अनन्त जीवन जौ आय, कि बे तोय जौन एकई सांचो परमेसुर और यीशु मसीह हां जानें, जीहां तेंने पठैव आय।

⁴ जौन काज तेंने मोय करबे हां दओ हतो, ऊहां पूरो करके मैंने धरती पे तोरी महिमा करी आय।

⁵ और हे बाप, अब तें अपने संग्गै मोरी महिमा, ऊ महिमा से कर जौन जगत के जन्म से पेंला, तोरे संग्गै मोरी हती।

⁶ मैंने तोरो नाओं उन मान्सन हां बताओ जिन हां तेंने संसार में से मोय दओ हतो: बे तोरे हते और तेंने उन हां मोय दओ और उन ने तोरे बचन हां मान लओ आय।

⁷ अब बे जान गए आंय, कि जौन कछु तेंने मोय दओ आय, बो सब तोरी कोद से आय।

⁸ कायसे जो बातें तेंने मोय दईं, मैंने उन हां कै दओ आय, और उन ने उन बोलन हां मान लओ और सही में जान लओ आय, कि मैं तोसें कड़ो आंव, और उन ने भरोसा करो आय कि तेंने ही मोय पठैव आय।

⁹ मैं उन के लाने बिनती करत आंव, जगत के लाने बिनती नईं करत आंव परन्त उन के लाने जिन हां तेंने मोय दओ आय, कायसे बे तोरे आंय।

¹⁰ और जो कछु मोरो आय बो सब तोरो आय, और जौन तोरो आय, बो मोरो आय; और इन से मोरी महिमा दिखात आय।

¹¹ अब मैं संसार में नईं रै हों, परन्त बे संसार में रै हैं, और मैं तोरे ऐंगर आत आंव; हे पवित्र बाप, अपने ऊ नाओं से जौन तेंने मोय दओ आय, उन की सुध ले, कि जैसे हम एक आंय बे सोई एक होबें।

¹² जब मैं उन के संग्गै हतो, तो मैंने तोरे ऊ नाओं से, जौन तेंने मोय दओ आय, उन की सुध लई, और नास के (शैतान) पूत हां छोड़ उन में से कोऊ नास नईं भओ, ई लाने कि पवित्र शास्त्र की बात पूरी होबै।

¹³ परन्त अब मैं तोरे ऐंगर आत आंव, और जे बातें जगत में कहत आंव, कि बे अपने में मोरी खुसी पूरी पाबें।

¹⁴ मैंने उन हां तोरो बचन कै दओ आय, और संसार ने ऊहां नईं मानो, कायसे जैसो मैं संसार कौ नईंयां, वैसई बे सोई संसार के नईंयां।

¹⁵ मैं तोसे जा बिनती नईं करत हों, कि तें उन हां संसार से उठा ले, परन्त जौ कि तें उन हां ऊ दुष्ट से बचाए रखिये।

¹⁶ बे संसार के नईं आंय, जैसो कि मैं भी संसार कौ नईं आंव।

¹⁷ सत्य से उन हां पवित्र कर, तोरो बचन सत्य आय।

¹⁸ जैसे तेंने मोय संसार में पठैव, मैंने सोई उन हां संसार में पठैव आय।

¹⁹ और उन के लाने मैं अपने खुद हां पवित्र करत आंव, कि बे सत्य के द्वारा पवित्र करे जाबें।

²⁰ मैं केवल इनई के लाने बिनती नईं करत, परन्त उन के लाने भी जौन इन के बचन सुन के मोपे भरोसा कर हैं, कि बे सब एक होबें।

²¹ जैसो हे बाप तें मोय में आय, और मैं तोय में आंव, वैसई बे भी हम में होबें, जीसे कि संसार भरोसा करे, कि तेंने मोय पठैव आय।

²² और बो महिमा जौन तेंने मोय दई आय, मैंने उन हां दई आय कि बे वैसई एक होंय, जैसे हम एक आंय।

²³ मैं उन में और तें मोय में, कि बे सिद्ध होकें एक हो जाबें, जीसे संसार जानें कि तेंने मोय पठैव, और जैसो तेंने मोय से प्रेम करो, वैसई उन से भी प्रेम करो।

²⁴ हे बाप, मोरी चाहना आय कि जिन हां तेंने मोय दओ आय, जिते मैं आंव, उते सोई मोरे संग्गै रएं कि बे मोरी ऊ महिमा हों तक सकें, जीहां तेंने मोय दई आय, कायसे तेंने संसार के जन्म से पेंला मोय से प्रेम करो।

²⁵ हे धर्म बाप, संसार ने तोय नईं जानो, परन्त मैंने तोय जानो और इन ने सोई तोय जानो कि तेंने ही मोय पठैव आय।

²⁶ और मैंने तोरो नाओं इन हां बताओ और बतात रै हों की जो प्रेम तेंने मोय से करो, बो प्रेम उन में रैबे और मैं उन में रहों।