- यूहन्‍ना 13 - Bundeli Holy Bible

¹ फसह के परब के पेंला यीशु ने जौ जानके, कि मोरी घड़ी आ पहुंची आय, कि मैं संसार हां छोड़ के बाप के ऐंगर जाओं, तो अपनों से जौन संसार में हते, जैसो प्रेम ऊ रखत हतो, उन से अन्त लौ वैसई प्रेम धरें रओ।

² और खाबे की बेरा, जब शैतान पेंलईं से शमौन के पूत यहूदा इस्करियोती के मन में जौ डाल चुको हतो, कि बो ऊहां दगा से पकड़वाबै।

³ तो यीशु जौ जानत भओ कि बाप ने सब कछु मोरे अधकार में कर दओ आय, और मैं परमेसुर के ऐंगर से आओ आंव, और परमेसुर के ऐंगर लौट के जा रओ आंव।

⁴ खाबे पे से उठो और अपने उन्ना उतार दए, और गमछा लेके अपनी करयाई बांधी।

⁵ तब ऊ ने एक बासन में पानू भरो और चेलन के गोड़े पखारे, और जौन गमछा ऊ ने करयाई में बांध रखो हतो, ऊसे उन के गोड़े पोंछन लगो।

⁶ और जब बो शमौन पतरस के ऐंगर आओ, पतरस ने ऊसे कई, हे पिरभू, काय तें मोरे गोड़े पखारत आय?

⁷ यीशु ने ऊसे कई, मैं जो करत आंव, तें ऊहां अबै नईं समझत, परन्त तें ईके पछारूं जान है।

⁸ पतरस ने ऊसे कई, तें मोरे गोड़े कभऊं नईं पखार पे है, यीशु ने ऊसे कई, जदि मैं तोय न पखारों, तो मोरे संग्गै तोरो कछु भी नाता नईं।

⁹ शमौन पतरस ने ऊसे कई, तो हे पिरभू, मोरे गोड़े अकेले नईं, हाथ और मूड़ हां भी धो दे।

¹⁰ यीशु ने ऊसे कई, जीने सपर लओ आय, ऊहां तो अपने गोड़े ही पखारबे की जरूरत आय; कायसे बो पूरो शुद्ध आय और तुम शुद्ध आव; परन्त सब के सब नईं।

¹¹ बो तो ऊहां जानत हतो जौन ऊहां पकड़वाबे वारो हतो, ईसें ऊ ने कई, तुम सब के सब शुद्ध नईंयां।

¹² और जब बो उन के गोड़े पखार चुको, और अपने उन्ना पैर के बैठ गओ, तो ऊ ने उन से कई, का तुम समझे कि मैंने तुमाए संग्गै का करो आय?

¹³ तुम मोय गुरू और प्रभु कहत आव, तुम सही कहत आव, कायसे मैं ओई आंव।

¹⁴ जदि मैंने प्रभु और गुरू होत भय तुमाए गोड़े पखारे; तो तुम सोई एक दूसरे के गोड़े पखारियो।

¹⁵ कायसे मैंने तुम हां नमूना दिखा दओ आय, कि तुम सोई वैसई करियो, जैसो मैंने तुमाए संग्गै करो।

¹⁶ मैं तुम से सांची सांची कहत आंव, कि चाकर अपने मालक से बड़ो नईं; और न पठैव भओ अपने पठैबेवाले से बड़ो होत आय।

¹⁷ तुम इन बातन हां जानत आव, और जदि उन पे चलो, तो तुम धन्य आव।

¹⁸ मैं तुम सब के बारे में नईं कहत, मैं उन हां जानत आंव जिन हां मैंने चुन लओ आय, पर जौ ई लाने भओ, कि पवित्र शास्त्र कौ बचन पूरो होबै, कि जौन मोरी रोटी खात हतो, ऊ ने मोरे ऊपर लात उठाई।

¹⁹ ऐसो होबे से पेंलई मैं तुम हां बता रओ आंव, कि जौ जब पूरो हो जाबै तो तुम भरोसा करो, कि मैं ओई आंव।

²⁰ मैं तुम से सांची सांची कहत आंव, कि जीहां मैं पठैत आंव ऊहां जौन अपनाबै, बो मोय अपनात आय; और जौन मोय अपनात आय, बो मोरे पठैबेवाले हां अपनात आय।

²¹ जब यीशु जौ कह चुको तो आत्मा में बेचैन भओ और जा गवाही देके कई, मैं तुम से सांची सांची कहत आंव, कि तुम में से एक मोय पकड़वा है।

²² चेले एक दूसरे हां ताकन लगे, कायसे जान नईं सके, कि बो की के लाने कह रओ आय।

²³ ऊके चेलन में से एक जीसे यीशु प्रेम करत हतो, यीशु की कोद झुको बैठो हतो।

²⁴ तब शमौन पतरस ने ऊ की कोद इसारो करके ऊसे कई, हम हां बता, बो को आय जीके बारे में तें कह रओ आय?

²⁵ ऊने यीशु की छाती की कोद ओई तरहां झुके भय ऊसे पूछो, हे प्रभु, बो को आय? तब यीशु ने ऊसे कई, जीहां मैं रोटी को टुकड़ा डुबो के देहों, ओई आय।

²⁶ तब ऊ ने रोटी को टुकड़ा डुबो के शमौन इस्करियोती के पूत यहूदा हां दओ।

²⁷ और टुकड़ा लेतई शैतान ऊ में समा गओ, तब यीशु ने ऊसे कई, जो तोहां करने आय, तुरतईं कर।

²⁸ पर जौन मेज पे खाबे हां बैठे हते उन में से कोऊ नईं जान पाओ कि ऊ ने की मतलब से ऐसी कई हती।

²⁹ यहूदा के ऐंगर रुपईयन कौ थैला रहत हतो, ई लाने कछु जा सोच रय हते, कि यीशु ऊसे कह रओ आय, कि परब के लाने जरूरी चीज बस्त हां मोल ले ले, या जा कि कंगालन हां कछु दै दे।

³⁰ तब टुकड़ा लेबे के बाद बो तुरतईं बायरै चलो गओ, और रात की बेरा हती।

³¹ जब बो बायरें चलो गओ तो यीशु ने कई; अब मान्स के पूत की महिमा भई, और परमेसुर की महिमा ऊ में भई आय।

³² अगर ऊ में परमेसुर की महिमा होत आय, तो परमेसुर भी अपने में ऊ की महिमा कर है और तुरतईं कर है।

³³ हे लड़को, मैं और तनक देर तुमाए संग्गै आंव, फिन तुम मोय ढूंढ़ हौ, और जैसो मैंने यहूदियन से कई, तुम से सोई कैत आंव, कि जिते मैं जाबेवालो आंव, उतै तुम नईं आ पा हौ।

³⁴ मैं तुम हां एक नओ हुकम देत आंव, कि तुम एक दूसरे से प्रेम करो: जैसो मैंने तुम से प्रेम करो आय, वैसई तुम भी एक दूसरे से प्रेम करो।

³⁵ जदि तुम आपस में प्रेम कर हौ तो ऐई से सब जान हैं, कि तुम मोरे चेले आव।

³⁶ शमौन पतरस ने ऊसे कई, हे प्रभु, तें किते जात आय? यीशु ने ऊसे कई, जिते मैं जात आंव, तें अबै मोरे पाछें नईं आ सकत! परन्त ईके बाद तें मोरे पाछें आ है।

³⁷ पतरस ने ऊसे कई, हे प्रभु मैं अबै तोरे पाछें काय नईं आ सकत? मैं तो तोरे लाने अपनी जान भी दे दै हों।

³⁸ यीशु ने ऊसे कई, का तें मोरे लाने अपनी जान दै है? मैं तोसे सांची सांची कहत आंव, कि जब लौ तें तीन बेर मोय चीनबे से मना न कर लै है, मुरगा बांग न दै है।