- यूहन्‍ना 1 - Bundeli Holy Bible

¹ शुरू में बचन हतो, और बचन परमेसुर के संग्गै हतो, और बचन परमेसुर हतो।

² जौई पेंला से परमेसुर के संग्गै हतो।

³ सब कछु ऊके द्वारा पैदा भओ और जो कछु पैदा भओ आय, ऊ में से कछु भी ऊके बिना पैदा नईं भओ।

⁴ ऊ में जीवन हतो, और बो जीवन मान्सन की ज्योत हती।

⁵ और ज्योत अन्धयारे में चमकत आय; पर अन्धयारे ने ऊहां नईं अपनाओ।

⁶ परमेसुर की कोद से पठैव भओ एक मान्स आओ जीको नाओं यूहन्ना हतो।

⁷ बो ई लाने आओ, कि ऊ ज्योत कौ गवाह बनै, कि सब ऊके द्वारा भरोसा करें।

⁸ बो खुद तो ज्योत नईं हतो, पर ई लाने आओ, कि ज्योत की गवाही देबे।

⁹ बो सांची ज्योत जौन हरएक मान्स हां उजयारो करत आय, जगत में आबेवारी हती।

¹⁰ बो जगत में हतो, और जगत ऊके द्वारा पैदा भओ, और जगत ने ऊहां नईं चीनो।

¹¹ बो अपने घरै आओ और ऊके घरवारन ने ऊहां नईं अपनाओ।

¹² पर जीने ऊहां अपनाओ, ऊ ने इन हां परमेसुर की लड़ेर होबे कौ हक्क दओ, यानि उन हां जौन ऊके नाओं पे भरोसा करत आय।

¹³ बे न तो खून से, और न सरीर की मनसा से, और न ही मान्स की मनसा से, पर परमेसुर की मनसा से पैदा भय आंय।

¹⁴ और बचन जौन कृपा और सच्चाई से भरपूर हतो रूपवान भओ; और हमाए बीच में डेरा करो, और हम ने ऊ की ऐसी कृपा हेरी, जैसे बाप के एकई मोंड़ा की कृपा।

¹⁵ यूहन्ना ने ऊके बारे में गवाही दई, और जोर से कई, जौ ओई आय, जीके बारे में मैंने कई, बो जौन मोरे पाछें आबेवालो आय, मोय से आंगू रै है, कायसे बो मोय से पेंला हतो।

¹⁶ कायसे ऊ की भरपूरी में से हम सबई ने पाओ यानि भारी दया।

¹⁷ कायसे रीतियां मूसा के द्वारा दईं गईं; पर तरस, और सच्चाई तो यीशु मसीह के द्वारा मिली।

¹⁸ परमेसुर हां कोऊ ने कभऊं नईं तको, एकलौतो पूत जौन बाप की कंईयां में आय, ओई ने ऊहां दरसाओ।

¹⁹ यूहन्ना की गवाही जा आय, जब यहूदियन ने ऊके ऐंगर यरूशलेम से याजकन और लेवियन हां पूंछबे पठैव, तें को आय?

²⁰ तो ऊ ने जौ मान लओ, और मैटो नईं बल्कि मान लओ कि मैं मसीह नईं आंव।

²¹ तबई उन ने ऊसे पूछो, तो फिन तें को आय? का तें एलिय्याह आय? ऊ ने कई, मैं नईं आंव: का तें बो अगमवक्ता आय? ऊ ने बताओ, नईं।

²² तब उन ने ऊसे पूंछी, तो फिन तें को आय? कि हम अपने पठैबेवाले हां बता देबें; तें अपने बारे में का कहत आय?

²³ ऊ ने कई, मैं डांग में एक चिल्लाबेवाले कौ ऐरो आंव, प्रभु की गैल सूदी करियो, जैसो यशायाह अगमवक्ता ने कई हती।

²⁴ जे फरीसियन की कोद से पठैव गओ हतो।

²⁵ तबई उन ने ऊसे पूछी, जब तें न तो मसीह आय, न एलिय्याह आय, और न तो अगमवक्ता, तब तें बपतिस्मा काय देत आय?

²⁶ यूहन्ना ने उन हां बताओ, मैं तो पानू से बपतिस्मा देत आंव; पर तुमाए बीच में एक जन ठांड़ो आय, जीहां तुम नईं चीनत आव।

²⁷ जे ओई आय जौन मोरे पाछें आबे वालो हतो, और जी की पनईयां के बन्ध मैं खोलबे के लायक नईंयां।

²⁸ जे बातें यरदन के पार बैतनिय्याह में भईं, जिते यूहन्ना बपतिस्मा देत हतो।

²⁹ दूसरे दिना ऊ ने यीशु हां अपनी कोद आत तक के कई, हेरो, परमेसुर को मेमना आय, जौन जगत कौ पाप उठा लै जात आय।

³⁰ जौ ओई आय, जीके बारे में मैंने कई हती, कि मोरे पाछें एक जन आबेवारो है, जौन मोय से आंगू हो गओ आय, कायसे बो मोय से पेंला हतो।

³¹ और मैं भी ऊहां नईं चीनत हतो, पर मैं ई लाने पानू से बपतिस्मा देत भओ आओ, कि बो इस्राएल पे दरसाव जाबै।

³² और यूहन्ना ने जा कहत भए गवाही दई, मैंने आकास से आत्मा हां कपोत की घांई उतरत तको आय, और बो ऊ पै थम गओ।

³³ और मैं तो ऊहां नईं चीनत हतो, पर जीने मोय पानू से बपतिस्मा दैबे पठैव, ओई ने मोय से कई, जीपे तें आत्मा हां उतरत और ठहरत हेरे; पवित्र आत्मा से बपतिस्मा देबेवालो ओई आय।

³⁴ और मैंने हेरो, और गवाही दई आय, कि जौई परमेसुर कौ पूत आय।

³⁵ फिन दूसरे दिना यूहन्ना अपने चेलन में से दो के संग्गै ठांड़ो हतो।

³⁶ और ऊ ने यीशु हां जात भओ हेर के कई, तकौ, जौ परमेसुर कौ मेम्ना आय।

³⁷ तब दोई चेला ऊ की बात सुनके यीशु के पाछें हो लय।

³⁸ यीशु ने मुड़के उन हां अपने पाछें आत हेरो और उन से कई, तुम कौन की खोज में आव? उन ने कई, हे गुरू तें किते रैत आय? ऊ ने उन से कई, आओ तो देख लै हौ।

³⁹ तब उन ने जाके हेरो कि बो किते रैत आय, और ऊ दिना ऊके संग्गै रए; कायसे संझा के चार बज चुके हते।

⁴⁰ उन दोनऊ में से एक तो शमौन पतरस कौ भईया अन्द्रियास हतो।

⁴¹ ऊ ने पेंला अपने सगे भईया शमौन से मिलके ऊसे कई, हम हां मसीह मिल गओ आय।

⁴² और बो ऊहां यीशु के ऐंगर ले आओ, यीशु ने ऊ पै नजर डालके कई, तें यूहन्ना कौ पूत शमौन आय, तें कैफा यानि पतरस कहला है।

⁴³ दूसरे दिना यीशु ने गलील हां जाबे की ठानी; और फिलिप्पुस हां पाके ऊसे कई, मोरे पाछें चले आ।

⁴⁴ फिलिप्पुस तो अन्द्रियास और पतरस के नगर बैतसैदा कौ हतो।

⁴⁵ फिलिप्पुस ने नतनएल हां पाके ऊसे कई, जीके बारे में मूसा ने रीतियन में और अगमवकतन ने सोऊ लिखो आय, बो हम हां मिल गओ आय; बौ यूसुफ कौ पूत यीशु नासरी आय।

⁴⁶ नतनएल ने ऊसे कई, भला नासरत से भी कोई उमदा बसत कड़ सकत आय? फिलिप्पुस ने ऊसे कई, आके तक ले।

⁴⁷ यीशु ने नतनएल हां अपनी कोद आत हेर के ऊके बारे में कई, तको, सही में एक इस्राएली आय: जी में कोऊ छल नईंयां।

⁴⁸ नतनएल ने ऊसे कई, तें मोय कैसे जानत आय? यीशु ने ऊसे कई; ईसे पेंला कि फिलिप्पुस ने तोय टेरो, जब तें अंजीर के पेड़ तरें हतो, मैंने तोय तको हतो।

⁴⁹ नतनएल ने ऊसे कई, हे गुरू, तें परमेसुर कौ पूत आय; तें इस्राएल कौ राजा आय।

⁵⁰ यीशु ने ऊसे कई; कि मैंने तोय अंजीर के पेड़ तरें तको, का तें ई लाने भरोसा करत आय? तें ईसे भी बड़े बड़े काज देख है।

⁵¹ ऊ ने फिन कई, मैं तुम से सांची सांची कहत आंव, कि तुम सरग हां खुलो भओ, और परमेसुर के सरगदूतन हां मान्स के पूत के संग्गै, खालें आत और ऊ परे चढ़त हेर हौ।