- याकूब 3 - Bundeli Holy Bible

¹ हे मोरे भईया हरौ, तुम में से बिलात जनें प्रवचन करबेवारे न बनें, कायसे तुम जानत आव, कि हम जौन प्रवचन करबेवारे आंय बिलात दण्ड के भागी हुईयें।

² प्रवचन देती बेरा हम कुल्ल बेर चूक जात आंय, जो कोनऊ बोलवे में चूक नईं करत, ओई सिद्ध मान्स आय; और सबरी देयां पे सोई लगाम लगा सकत आय।

³ हम जब अपने बस में करबे के लाने घुड़वन के मों में लगाम लगात आंय, तो हम उन हां जैसो चाएं भगा सकत आंय।

⁴ तको पानू के जहाज सोई बड़े बड़े होत आंय, और तेज बैहर से चलाए जात आंय, परन्त एक हलकी सी पतवार से चलाबेवारे की मन्सा से भुमाए जात आंय।

⁵ ऊंसई जीभ सोई एक हलको सो अंग आय पर बा बड़ी बड़ी डींगें मारत आय। तको, तनक सी आगी से कितेक बड़े जंगल में आग लग जात आय।

⁶ जीभ सोई एक आग आय; जीभ हमाई देंया में पाप कौ एक संसार आय, बा सबरी देयां पे कलंक पोतत आय, बा भवचक्र में आग लगा देत आय और नरक कुण्ड की आग से बरत रैत आय।

⁷ सबरी भांत के जंगली जनावर, पंछी, रेंगवेवारे कीड़ा मकोड़ा और पानू के प्रानी मान्सन के बस में हो सकत आंय, और बे सब बस में हो सोई गए आंय।

⁸ पर जीभ हां कोनऊ मान्स बस में नईं कर सकत आय; बा एक ऐसी बला आय जौन कभऊं रुकत नईंयां; बा प्रान हां नास करबेवारे विष से भरी भई आय।

⁹ ऐई से हम पिरभु और पिता परमेसुर की जय जय करत आंय; और ऐई से मान्सन हां कोसत आंय जौन परमेसुर के बरोबर स्वरूप में पैदा भए आंय।

¹⁰ एकई मों से धन्नबाद और कोसबो दोई कड़त आंय।

¹¹ हे मोरे भईया हरौ, ऐसो नईं भओ चईये।

¹² का पानू की झिर से एकई मों से मीठो और खारो पानू दोई कड़त आंय? हे मोरे भईया हरौ; का आम के पेड़ से बेर, या दाखन की बौल में निबुआ फल सकत आंय? ऊंसई खारे पानू की झिर से मीठो पानू नईं कड़ सकत।

¹³ तुम में बुद्धमान और समजवारो को आय? जौन ऐसो होय बो साजे चलन से अपने कामन हां ऊ दीनता संग्गै दिखाबें जौन समज से होत आय।

¹⁴ जदि तुम अपने हियन में जलत आव और बुराई धरत आव, तो सत्त के बिरोद में घमण्ड न करियो, और न लबरी बात कईयो।

¹⁵ जा समज बा नईंया, जौन ऊपरै से उतरत आय पे संसारी, और अपुन की, देयां की, और शैतान छलिया की आय।

¹⁶ जिते जलन और बुराई होत आय, उते बखेड़ा और सब भांत कौ बुरओ काम होत आय।

¹⁷ पर जौन समज ऊपर से आत आय, पेंला तो बा पवित्तर फिन मेल जोल धरबेवारी, नम्र मीठो बोल, दया, साजी साजी बातन से भरो भओ पिच्छदारी और कपट के बिना होत आय।

¹⁸ जौन मेल मिलाप करात आय, बा धर्म कहात और ऊहां मेल मिलाप के संग्गै बोओ जात है।