- याकूब 2 - Bundeli Holy Bible

¹ हे मोरे भईया हरौ, हमाए पिरभु यीशु मसीह जौन जसवारे आंय, उनकौ बिसवास तुम में पिच्छदारी से न होबे।

² मान लेओ, जदि एक मन्सेलू सोने कौ छल्ला और भारी साजे उन्ना पैरें भए तुमाए भजनालय में आबै, और एक गरीब भूखो सोई मैले कुचैले उन्ना पैरें भए आबै।

³ और जदि तुम ऊ साजे उन्ना पैरे भए मान्स कौ मों तक के ऊसे कओ इते साजी जांगा बिराजो; परन्त गरीब से कओ, तें इते ठांड़ो रै, या मोरे गोड़न के ऐंगर धरती पे बैठ।

⁴ तो का तुम ने दोईयन में भेद नईं करो? का तुम बुरए सोच से न्याय करबेवारे न ठैरे?

⁵ हे मोरे प्यारे भईया हरौ, सुनो; का परमेसुर ने ई संसार के गरीबन हां नईं नबेरो, कि बे बिसवास में धनी और ऊ राज के हाकम होबें, जी कौ कौल उन ने अपने प्रेम करबे वारन से करो आय?

⁶ पर तुम ने अपने पिच्छवारी के बैवार से ऊ गरीब कौ अपमान करो: का धनी मान्स तुम पे अत्याचार नईं करत, का बेई तुम हां कचारियन में कड़ोर कड़ोर के नईं ले जात।

⁷ का बे ऊ साजे नाओं हां नईं निंदरत, जीके तुम कहात आव?

⁸ जदि तुम पवित्तर पोथी के ई बचन अनसार बैवार करत आव, कि तें अपने पड़ोसी से अपने घांई प्रेम कर, तो सांचई तुम परमेसुर के राज की नैम हां पूरो करत आव, तो साजो करत आव।

⁹ परन्त जदि तुम पिच्छदारी करत आव, तो पाप करत आव; और परमेसुर की व्यवस्था तुम हां दोषी ठैरात आय।

¹⁰ जदि कोऊ मान्स सबरी नैम हां पालन करत आय, परन्त एकई बात में चूक जाबै तो बो सबरी बातन में दोषी ठैरो।

¹¹ ई लाने जीने जौ कओ, कि तें परत्रिया संगत न करियो ओई ने जौ सोई कओ, कि तें कोई हां न मार डालिये, ई लाने जदि तेंने परत्रिया संगत नईं करी, पर मार डालो तौभी तें व्यवस्था कौ तोड़बे वारो ठैरो।

¹² तुम उन मान्सन घांई बचन बोलो, और काम करो, जिन कौ न्याव स्वतन्त्रता की व्यवस्था के अनसार हुईये।

¹³ जीने दया नईं करी, ऊकौ न्याव बिना दया हुईये, दया न्याय पे बिजय पात आय।

¹⁴ हे मोरे भईया हरौ, जदि कोई कय कि मोय बिसवास आय पर बो बिसवास के जैसे काम न करत होबै, तो ऊसे का फायदा? का ऐसो बिसवास ऊकौ तारन कर सकत आय?

¹⁵ जदि कोई भईया या बहन नंगे उगरारे होय, और उन हां रोजीना खैबे की कमी होबै।

¹⁶ और तुम उन से कओ, तुमाओ भलो होबै, तुम गरम रओ, और अफरे रओ; पर जौन बस्तें उन की देह के लाने जरूरी चाने आंय, बे उन हां न देओ तो का लाभ?

¹⁷ ऊंसई बिसवास सोई जदि करम संग्गै न होबै तो बो मरो भओ जैसो आय।

¹⁸ परन्त कोई जनो जौ कै सकत आय कि तुमाए ऐंगर बिसवास आय, मोरे ऐंगर करम आय, तें अपनो बिसवास मोय करम बिना दिखा; मैं अपनो बिसवास अपने करमों के द्वारा तोहां दिखा हों।

¹⁹ तोय बिसवास आय कि एकई परमेसुर आय: तोरो जौ बिसवास नोंनो आय, दुष्ट आत्मा सोई जौ बिसवास करत आंय, और कांपत आंय।

²⁰ हे बेसमज मान्स, का तें जौ सोई नईं जानत, कि करम बिना बिसवास अकारथ आय?

²¹ का हमाओ बाप इब्राहीम कामन से ऊ टैम धरमी नईं ठैराओ गओ, जब ऊने अपने मोंड़ा हां बेदी पे चढाओ?

²² तुम तकत आव, कि ऊकौ बिसवास और करम एकई संग्गै काम कर रय हते और जो कछु ऊने करो ऊसे ऊकौ बिसवास दिखानो।

²³ और पवित्तर पोथी कौ जौ बचन पूरो भओ, कि इब्राहीम ने परमेसुर पे बिसवास करो, और जौ उन के लाने धरम कहाओ, और बे परमेसुर के दोस्त कहाए।

²⁴ तुम ने तक लओ कि मान्स अकेले बिसवास से नईं, परन्त करमन से सोई धरमी ठैरत आय।

²⁵ ऐसई राहाब बेश्या सोई जब ऊ ने दूतन हां अपने घर में उतारो, और दूजी गैल से बिदा करो, तो का बा करमन से धरमी न ठैरी?

²⁶ जैसे देह आत्मा बिना मरी भई आय, ऊंसई बिसवास सोई करम बिना मरो भओ आय।