- इब्रानियों 9 - Bundeli Holy Bible

¹ पहलो कौल जौन भओ हतो ऊके अपने नैम हते; और धरती पै ध्यान मनन करबे हां तम्बूवारो मन्दर हतो।

² जानो कि पेंला वारो मन्दर हाथन से बनो हतो, ऊ में दियादान, एक मेज, भेंट करबेवारी रोटी हती; बो पवित्तर जांगा कहात हती।

³ और परदा के पछाऊं हती परम पवित्तर जांगा।

⁴ उते सुन्ने की धूपदानी और बाचा को बक्सा जौन चारऊ ओर सुन्ने से मढ़ो हतो, जीमें मन्ना से भरो सुन्ने को मर्तबान, हारून की छड़ी जीमें फूल कड़ आए हते, और पथरा की पटिया जी पै दसई अग्यां लिखी हतीं।

⁵ ऊके ऊ परै दोई चमचमात करूब हते, जिनके पंख दया की जांगा के ऊपर छायरो करें हते।

⁶ ऐसो हतो उते, तम्बू में जिते याजक जाके अपनो काम करत हते।

⁷ परन्त आगेवारी जांगा में याजक बरस भर में एक बेर रकत लेके जात हतो, कि मान्सन की भूल चूक के काजें बलदान करें।

⁸ इन बातन से पवित्तर आत्मा ऐसो कैत आय, कि जब लौ पेंलावारो तम्बू मैं ध्यान मनन होत हतो, जब लौ पवित्तर जांगा को रास्ता सबरन हां नईं पता चलो।

⁹ ऊ तम्बू में ऐसी भेंट और बलि चढ़ाई जात आय, कि ऊसे बली चढाबेवारे मान्सन को मन साजो न होत हतो।

¹⁰ सो बे नैम खाबे पीबे और सपरबे के हते, जौन मान्स के लाने हते, उन हां बेरा आबे पै सुधारो जात आय।

¹¹ परन्त पिरभू यीशु मसीह ई संसार की अच्छी बस्तन को महायाजक होकें आओ, सो बे अबई से बढ़िया तम्बू जौन मान्स के हाथन की बनी नईंयां, मानो ई संसार जैसो नईंयां।

¹² परन्त पिरभू यीशु मसीह ने अपने बलदान के रकत के संग्गै एकई बेर पवित्तर जांगा में पहुंच के हमेसा के लाने तरन तारन करो, जौन बकरन और बछड़न के रकत से न हो सको।

¹³ कायसे बकरा और बैलवा को रकत और कलोर की राख मान्सन की देह हां साफ करत आय।

¹⁴ तो पिरभू यीशु मसीह को रकत जौन बिलकुल बिन पाप हते, परमेसुर के सामूं निषपाप बलदान चढाओ, तो बो तुम हां बुरय काज से पूरे मन से काय न पवित्तर कर है, कि तुम जीयत परमेसुर की सेवा करो।

¹⁵ पिरभू यीशु मसीह ने उन हां बनाओ, जीने पुराने नैम हां नईं मानो अब उन ने नए नैम से अपने लाने मान्सन हां बुलाओ, कि बे सरग की जायजाद के मालक हो जाबें।

¹⁶ कायसे जब नओ नैम चलो तो नैम चलाबेवारे हां मरबो चईये, कि ऊ नैम को फायदा दूसरन हां मिले।

¹⁷ कायसे ऐसो नैम मरबे पै पक्को होत आय, जौ लौ कौल करबेवारो जियत आय, तौ बो कौल कछु मतलब को नईं होत।

¹⁸ पैली कौल सोई रकत से बंधी हती।

¹⁹ कायसे जब मूसा ने नैम की सबरी बातन हां सबरे मान्सन हां सुना दईं, तो उन ने बकरन और बछड़न को रकत लैके, पानू और लाल ऊ न, और जूफा की झाडू से सबरे मान्सन पै छिटक दओ।

²⁰ और कहो, कि परमेसुर की अग्यां से जौ रक्त कौल हां पक्को करत आय।

²¹ और ऐसई उन ने तम्बू के भीतर सेवा में आबेवारे सबरे सामान पै रकत छींटो।

²² मूसा के नैम से सबरी बस्तें रकत से साजी होत आंय; और रकत बहाए बिना पापन की छिमा नईं होत।

²³ जे बस्तें, सरग पै की छाया आंय उन हां इन बलदान से पवित्तर करो जात आय; परन्त सरग की बस्तें और अच्छे बलदान चईये।

²⁴ कायसे पिरभू यीशु मसीह ऊ पवित्तर जांगा में नईं गए, जौन सांचे पवित्तर जांगा को नमूना जैसो आय, बे तो सरग चले गए कि हमाए काजें परमेसुर के सामूं बने आंय।

²⁵ जौ नईंयां कि पिरभू यीशु मसीह हां बेर बेर बलदान करो चईये, जैसो महायाजक हर साल जनावर को रकत लैके पवित्तर जांगा मैं जात हतो।

²⁶ ऐसो तो उन हां संसार के बने से बेर बेर बलदान होने होतो; परन्त अबई जुग के खतम होबे पै बे एक बेर जगत मैं आके, और अपने बलदान से पाप हां दूर कर दओ।

²⁷ और मान्सन हां एक बेर मरके उनको न्याय हुईये।

²⁸ ऊंसई पिरभू यीशु मसीह बिलात जनों के पापन हां हरबे हां एकई बेर बलदान भए, और जब बे फिन के संसार में आहें तो पाप हां हरबे हां नईं, परन्त जौन उनकी आस लगाए आंय उनको तरन तारन कर हैं।