- इब्रानियों 8 - Bundeli Holy Bible

¹ अब बड़ी बात जा आय, कि हमाए महायाजक महाबली परमेसुर के दांय हाथ पै बिराजे आंय।

² और बे महा पवित्तर जांगा सरग मैं मानो ऊ तम्बू में सेवा करत आंय, जौन मान्सन के हाथन को बनो नईंयां, परन्त पिरभू ने खुद बनाओ आय।

³ कायसे याजक भेंट और बलिदान करत हते, ईसे पिरभू यीशु मसीह लौ सोई कछु चढाबे हां होबो चईये।

⁴ जदि बो इते धरती पै होतो, तो कभऊं याजक नईं कहाते, कायसे इते दूसरे याजक होत आंय जौन बली चढात आंय।

⁵ कायसे धरती पै को तम्बू सरग पै के तम्बू की छाप आय, जब मूसा ने जो तम्बू बनाओ, तो ऐसो बनाओ जैसो ऊ ने पहरवा पै तको हतो।

⁶ पर यीशु मसीह हां अच्छी सेवा मिली, जीमें बे मान्सन के लाने परमेसुर से बिन्तवारी करत आय, जा और भी अच्छी बात आय।

⁷ कायसे बा पैली वाचा साजी होती, तो दूसरी वाचा की कछु चाहना न होती।

⁸ परन्त परमेसुर ने ई वाचा में कमी पाके कई, मैं तुम से कैत आंव कि ऐसे दिना आ हैं कि मैं एक नओ कौल इस्राएल के लोगन से कर हों।

⁹ जो ऊ कौल घांई नईंयां, जौन मैंने उन के बाप दादन से बांधी हती, जब मैं उनको हाथ पकड़ के उन हां मिसर देस से काड़ के ले आओ हतो, परन्त बे अपने कौल में सांचे नईं कड़े, सो मैंने उन हां छोड़ दओ।

¹⁰ पिरभू कैत आय, कि अब जौन कौल मैं उन के संग्गै बांध हों, बा ऐसी आय, कि मैं अपने नैम हां उनके हिये और जी में डाल हों, और बे औरें मोरे जनें हुईयें और मैं उन को परमेसुर हुईयों।

¹¹ और कोई हां मोरे लाने न बता हैं, कायसे बे सबरे मोहां हिये से चीन हैं।

¹² मैं उन पै दया कर हों, और उनके अधरम और पापन की छिमा कर दै हों।

¹³ नये कौल से अब पुरानो कौल छूट गओ, कायसे जौन बस्त पुरानी होकें बेकाम हो जात बा छूट जात आय।