- इब्रानियों 7 - Bundeli Holy Bible

¹ मलिकिसिदक सालेम को राजा और परमेसुर को याजक हतो, जब इब्राहीम राजाओं हां हरा के लौटो, तो ऐई ने ऊहां असीसो हतो।

² और ऐई हां इब्राहीम ने सबरी बस्तन को दसवों भाग दओ हतो: मलिकिसिदक नाओं को मतलब आय धरम कौ राजा, और सालेम मतलब सान्ति कौ राजा आय।

³ जी को न बाप आय न मताई और न वंस परवार आय, पता नईंयां कि बे कब से आंय और कब लौ रै हैं, परन्त बे परमेसुर के पूत जैसे आंय।

⁴ तनक ध्यान धरौ उन पै जौन बड़े हते और जिन हां हमाए बूढ़े पुराने जनें इब्राहीम ने अच्छे लूट के माल कौ दसवों भाग दओ।

⁵ लेवी के वंस के लोगन हां जौन याजक को काज करत आय, ऐसो कओ गओ हतो, कि बे इब्राहीम के वंस वारन से भी व्यवस्था अनसार दसवांस लैबे।

⁶ परन्त इन ने जौन लेवी परवार के न हते, इब्राहीम से दसवांस लओ, और जिन हां प्रतिज्ञाएं मिलीं हतीं उन हां आसीसें दईं।

⁷ जा बात सांची आय, कि छोटो जनो बड़े से आसीस पात आय।

⁸ धरती पै तो दसवांस लैबेवारे मान्स मर जात आंय, परन्त मलिकिसिदक के लाने कहो आय कि बो जीयत आय।

⁹ ऐसो कैत आंय कि लेवी जौन दसवांस लेत आय, परन्त उन ने इब्राहीम में होकें दसवांस दओ।

¹⁰ कायसे लेवी जौन इब्राहीम के वंस में जन्मो, जीने मलिकिसिदक हां दसवांस दओ।

¹¹ मूसा के नैम से लेवी के वंसवारे याजक होत हते, (जी से मान्सन हां नैम मिले) तो फिन दूसरे याजक को का काज, जैसे मलिकिसिदक जौन हारून के वंस को न हतो।

¹² कायसे जब याजक की जांगा बदलत आय, तो फिन नैम सोई बदलबो चईये।

¹³ कायसे जी के लाने हम कैत आंय बे हमाए पिरभू यीशु मसीह आंय, जौन यहूदा के गोत्र के हते जिन ने कभऊ परमेसुर की बेदी की सेवा नईं करी।

¹⁴ सो अब जौ खुलासा हो गओ, कि हमाए पिरभू यीशु मसीह यहूदा के गोत्र के हते, और ई गोत्र में से याजक होबे की चरचा मूसा ने नईं करी।

¹⁵ मलिकिसिदक जैसो एक और याजक होबेवारो हतो।

¹⁶ जो याजक अपने गोत्र से नईं, परन्त अपने न मरबेवारे जीवन से हतो।

¹⁷ कायसे उन के लाने गवाह दई गई, कि तें मलिकिसिदक की रीत पे जुगानुजुग याजक आय।

¹⁸ सो जौन आज्ञा पेंला मिली हती; बा काम की नईं रई परन्त बा लोप हो गई।

¹⁹ (कायसे मूसा के नैम काम के नईं रए) और ऊ की जांगा एक और अच्छी आस मिली, जीसे हम परमेसुर के ऐंगर जा सकत आंय।

²⁰ पिरभू यीशु मसीह परमेसुर की मरजी से याजक बने।

²¹ (कायसे बे सबरे याजक बिना बचन के भए, जिनके लाने पोथी में ऐसो लिखो आय, कि मैं परमेसुर ऐसो कैत आंव कि तुम हमेसा लौ याजक बने रै हौ, ईहां मैं अब न बदल हों कि तें हमेसा को याजक आय)।

²² सो यीशु मसीह में होकें हम हां एक अच्छी बात मिली।

²³ बे तो बिलात याजक भए, कायसे बे सबरे मर जात हते।

²⁴ परन्त जे तो हमेसा जीयत रै हैं; ईसे उनकौ याजक को काम हमेसा हां रै है।

²⁵ सो जौन पिरभू यीशु मसीह पै बिसवास धरके परमेसुर लौ पोंच हैं; बे उनको पूरो पूरो तरन तारन करत आय, और परमेसुर के सामूं उनके लाने बिन्तबारी करत आंय।

²⁶ हम हां ऐसई महायाजक चानें हतो, जौन पवित्तर, सूदे और बिना पाप के होबें, और पापी मान्सन जैसे न होबें, परन्त सरग लौ ऊंचे उठे होबें।

²⁷ और उन महायाजकन घांई उन हां रोजीना पेंला अपने लाने और दूसरे मान्सन के लाने बलदान चढाबें; कायसे पिरभू यीशु मसीह ने खुद बलदान होकें एकई बेर में सबरो काम निपटा दओ।

²⁸ कायसे मूसा के नैम से जौन याजक बनाए जात हते बे मान्सन घांई कमजोर हते; परन्त बा बात जौन मूसा के नैम के बाद आई, जीने उनसे अपने लरका पिरभू यीशु मसीह हां याजक बना दओ, जौन अच्छे याजक कड़े।