- इब्रानियों 6 - Bundeli Holy Bible

¹ सो अब हमें समझवारो हो जाओ चईये, जौन पिरभू मसीह की पेंला की बातें नईं, परन्त बड़े हो जाबो चईये, कि समझें कि हम ने कैसे अपने बुरय कामन हां छोड़ के अपनो चित्त परमेसुर की बातन पै लगाओ।

² और अब फिरके बपतिस्मा और हाथ धरबे, और मरे भए कैसे जी उठ हैं, और आबेवारे न्याय जैसी पेंला की शिक्षा में आगे बढें।

³ सो परमेसुर की मरजी जैसो अपने आगे बढत जाबें।

⁴ कायसे जीने परमेसुर की जोत पाई, और जिन हां परमेसुर ने बरदान दए और जिन ने पवित्तर आत्मा पाओ।

⁵ जीने परमेसुर के बचन हां सुनो, और आबेवारे दिना में हमाओ का हुईये ईहां समझ लओ।

⁶ ऐसे जनें अच्छी बातन हां छोड़ देबें; और औरई गैल धर लेबें तो उन हां फिरके ओई सांची गैल पै लै आबो मुसकल आय; मानो ऐसे जन पिरभू यीशु मसीह हां फिन से क्रूस पै ठोकत आंय, और सब के सामूं उनके नाओं पै बट्टा लगात आंय।

⁷ अच्छी धरती जी पै पानू बरसो होबै, और जौन खेती हां तईयार होबै, कि मान्सन के लाने खैबे हां पजे, ऐसी धरती हां परमेसुर आसीस देत आय।

⁸ परन्त ऊ धरती पै जरियां और भटकटई ऊगत आय, तो बेकार आय ऊ पै परमेसुर को श्राप आहै, और बा आगी में बारी जै है।

⁹ भईया हरौ, हम ऐसो कैत तो आंय परन्त हमाओ सोच आय, कि तुम उनके जैसे काज करत आव जीको तरन तारन हो गओ आय।

¹⁰ हम जौ सोई कैत आंय कि परमेसुर अच्छे न्यायी आंय, बो तुमाई याद कर है, कि तुम कैसे उन सबरे जन जिन ने यीशु मसीह हां पकड़ लओ आय, उन की सेवा खुसामद करत आव।

¹¹ परन्त हमाई जा अभलाखा आय, कि तुम अपनी आबेवारी बातन की आस धरो और ऊ में बढत जाओ।

¹² सो आलसी न बनो; परन्त अपने बिसवास में बने रओ, और जब लौ परमेसुर ने उन हां बे बातें न दईं जी की उन ने कई हती धीरज धरो।

¹³ परमेसुर ने जब इब्राहीम हां असीसो, तो और कोऊ के नाओं से नईं कहो कायसे कोई परमेसुर से बड़ो नईंयां।

¹⁴ कि मैं तोहां और तोरे वंस परवार हां आसीस दैहों।

¹⁵ परन्त अब्राहीम ने धीरज धरो जब लौ जौन परमेसुर ने ऊसे कई हती पूरी न भई।

¹⁶ मान्स अपने से बड़े को कौल खाके बात पक्की करत आय, और उनकी सबरी बातें कौल खाके पूरी होत आंय।

¹⁷ सो जब परमेसुर ने जौन बात कई आय, ऊहां पूरो करो सो अब जौन हमाई आस आय जीहां हमें पाने आय ऊहां पक्को धरें रैत आंय।

¹⁸ परमेसुर झूटो नईं कात, सो जब बे कौल खात और वचन देत तो ऊ बात हां कभऊ नईं बदलत, सो अब जौन हमाई आस आय जी हां हमें पाने आय ऊहां पक्को धरें रैत आंय।

¹⁹ ओई आस पे हम कर्रे के बिसवास धरें आय, कायसे बा आस अबै मानो परदा के पांछे होबे।

²⁰ पिरभू यीशु मसीह हमाए आंगू गए आंय, जैसे मलिकिसिदक सबरे दिना हां हमाओ याजक हतो, ऊं सई यीशु मसीह सोई हमाए याजक आंय।