- इब्रानियों 5 - Bundeli Holy Bible

¹ महायाजक मान्सन में से होत हतो, कि बो मान्सन के पापन की छिमा के लाने भेंट चढाए, और बलि करै।

² बो पापी मान्सन के अज्ञान हां जानत आय, कायसे बो मान्सन में से होबे से उनके पापन हां समझत आय।

³ ऐई लाने बो जैसे दूसरे जन के लाने, ऊंसई अपने काजें सोई बली चढ़ाबे।

⁴ परन्त मान को जौ पद कोई हां अपने से नईं मिलत, जैसो हारून हां जो काज परमेसुर ने दओ हतो।

⁵ ऊंसई पिरभू यीशु मसीह ने जौ मान देबेवारो पद अपने से नईं लै लओ, जौ तो उन हां उनईं ने दओ, और कहो कि जौ मोरो बिटवा और मैं ई को बाप आओं।

⁶ पोथी में जौ लिखो आय, कि तें मलिकिसिदक जैसो हमाए लाने हमेसा लौ को याजक आय।

⁷ ऊ ने अपने जीयत गुहार लगा के और अंसुआ बहात कई, कि मोहां आबेवारी मौत से बचा लेओ, और उनकी जैसी लगन से बे बच गए।

⁸ परन्त परमेसुर के लड़का होबे पै भी, उन ने अपने मरबे लौ परमेसुर की कई करी।

⁹ और सबरे दुख हां सह के, अपने सबरे मानबेवारन को तरन तारन करो।

¹⁰ और उन हां परमेसुर ने न्यारो करके मलिकिसिदक जैसो महायाजक बना दओ।

¹¹ ईके लाने और बहुत कछु कहो जा सकत आय, जीहां हम अबै नईं समझ सकत; कायसे तुम अब तनक ऊं चो सुनन लगे आओ।

¹² अबै लौ तो तुम हां सिखाबेवारो होने हतो, परन्त ऐसो लगत आय, कि तुम हां बे बातें जौन पेंला बताईं हतीं फिन के बताबें? तुम अबै लौ दूध पीबो चाहत आव, तुम हां तो अबै रोटी खैबेवारो हो जाने हतो।

¹³ परन्त जैसे दूध पियत बच्चा परमेसुर की बातें नईं समझत कि का अच्छो आय, कायसे बो अबै हल्को बच्चा आय।

¹⁴ कायसे बड़े जनें रोटी खात आंय, जानो बे अच्छे बुरय हां चीनत आंय।