- इब्रानियों 4 - Bundeli Holy Bible

¹ सो उनके विश्राम में जाबे की बात अबै सोई आय, हम हां डर के चलो चईये, ऐसो न होबै, कि कोई रै जाबै।

² हम हां सोई जेई बातें बताई हतीं, परन्त उनहां जौन बातें सुनाईं, उनसे उन ने कछु बिसवास नईं धरो।

³ जीने बिसवास धरो, बे विश्राम में पोंचे; जैसो पोथी में लिखो आय, कि परमेसुर ने उन मान्सन से गुन्सया के कई कि तुम मोरे आराम की जांगा में न पहुंच हौ।

⁴ और उनकी पोथी में एक जांगा ऐसो आओ आय, कि सातें दिना परमेसुर ने संसार हां बना के आराम करो।

⁵ और पोथी में एक जांगा ऐसो सोई लिखो आय, कि बे सरग में जिते मैं रैत आंव उते न जै हैं।

⁶ ऐसो सोई कहो आय, कि जिन ने परचार की बातन को नईं मानो बे मोरी जांगा न जै हैं।

⁷ ईके बाद तो दाऊद की पोथी में ऐसो सोई कैत आय, जैसो पैले कहो हतो कि जब तुम मोरी बातें सुनो तो अपने मन हां कर्रो न करियो।

⁸ यदि यहोशू अपने लोगन हां विश्राम में ले जातो, तो परमेसुर फिन के ई दिना की न कैते।

⁹ सो ध्यान धरौ कि परमेसुर पै बिसवास धरबेवारन के लाने विश्राम को दिनअबै आबेवारो आय।

¹⁰ सो जिन ने परमेसुर के जैसे अपने काज पूरे करे आंय, बे ऊंसई अपने कामन से विश्राम कर हैं।

¹¹ हम हां ऊ विश्राम में जैबे की कोसस करने आय, कहूं ऐसो न होबै, कि हम उनकी कई न करके उते न पहुंच पाबें।

¹² कायसे परमेसुर के बचन जीयत, और बली आंय, जैसी दोई तरपेवारी तलवार, उनके बचन से आत्मा और जीव, और एक एक गांठ हां तोड़त आय, जब लौ हिये में का आय जौ न जान लैबे।

¹³ कछु भी परमेसुर से लुको छिपो नईंयां बे सब जानत आंय, और उनकी आंखन से कछु नईं बरको आय।

¹⁴ हमाओ ऐसो बड़ो महायाजक आय, जौन सरग चलो गओ, बे आंय पिरभू यीशु मसीह; जौन परमेसुर के पुत्तर आंय, सो अपन ने जिन बातन पै चित्त लगाओ आय उन में पक्के होत जाबें।

¹⁵ पिरभू यीशु मसीह हमाई उन बातन हां जी में हम कच्चे आंय; उनहां जानत आंय, कायसे एक एक बात में उनकी परख भई, परन्त उन में कोई पाप नईं कड़ो।

¹⁶ सो हम जब बिन्तवारी करें, तो अपने परमेसुर से ऐसे मांगें, कि बे हमाई सुनें और जो कछु हमें चाने होबै बो हम हां दैबें।