- इब्रानियों 13 - Bundeli Holy Bible

¹ एक दूजे की खबर राखो।

² कोऊ बाहर से आबै तो अपने घर में रोटी खिलाईयो, कायसे ऐसो करके कछु जन ने बिना जाने सरगदूतन हां खिलाओ आय।

³ जौन जेहल में आय, उनको ध्यान रखियो जौ मानके कि तुमई जेहल में आव; जीके संग्गै बुरओ होबे उनकी सोई चिन्ता करियो, जौ सोच के तुम उन के संग्गै आव।

⁴ ब्याव हां आदर की बात सोचो, और ब्याव में अपनी संग्गी हां धोखो न दईयो; कायसे एक दिना परमेसुर परतिरिया संगत करबेवारन को न्याय कर हैं।

⁵ रुपईया पईसा को लालच न करियो, और जो कछु तुम लौ आय, ऊ पै सन्तोष करियो; कायसे पिरभू ने कई आय, कि बे तुम हां कभऊं न छोड़ है।

⁶ तुम हां सोई ऐसो कहो चईये, परमेसुर मोरी मदद कर है; मैं काय हां डरों, मान्स मोरो कछु नईं बिगाड़ सकत।

⁷ अपने गुरू जन हां जीने तुम हां परमेसुर की कथा सुनाई, उन हां न बिसराईयो; और ध्यान धरियो कि उन को जीवन कैसो हतो और उनके बिसवास की बातन हां पकड़े रहियो।

⁸ यीशु मसीह बदलत नईंयां, बे जैसे कल हते सो आज सोई आंय, और कल ऊंसई बने रै हैं।

⁹ दूसरे परचार की बातन से नईं बिलुरियो, और अपने मन हां पक्को बनाए रखियो, खाबे की बस्तन पै भौत ध्यान न धरियो, कायसे खाबे से जादा कछु नईं होत।

¹⁰ हमाई एक बेदी आय, जीसे खाबे को अधकार उन हां लौ नईंयां, जौन वेदी की सेवा करत आंय।

¹¹ कायसे जिन जानवरन को रकत महायाजक पाप बलि के काजें भीतरे ले जात आंय, ऊ जानवर की देह हां जिते मान्स रैत आंय, ऊके बायरें बार दईयो।

¹² ऐई से पिरभू यीशु मसीह ने मान्सन हां अपने रकत से साजो करबे हां गांव के बायरें क्रूस पै दुख उठाओ।

¹³ सो आओ, अपन यीशु मसीह लौ बायरें चलें कि उनके अपमान में उनके संग्गै रैबें।

¹⁴ कायसे संसार में कोई ऐसी नगरी नईंयां, जौन हमेसा लौ बनी रै है हम तो ऊं सई नगर की राह तकें बैठे आंय।

¹⁵ सो हम परमेसुर के गुनगान, यीशु मसीह के नाओं से चढात रएं।

¹⁶ भलो करबो, और दया करबो न छोड़ियो, कायसे ऐसे काम से परमेसुर खुस रैत आय।

¹⁷ अपने गुरु जनों की मानो बे तुमाए जीवन हां तकें रैत आंय; कायसे बे परमेसुर हां तुमाए लाने लेखो दै हैं, बे जो काज खुसी से करें, बोझो न समझें, कायसे ऐसी सेवा से तुम हां कोई फायदा न हुईये।

¹⁸ हमाए काजें बिन्तवारी करत रईयो, हमाओ जी ठीक ठाक आय; और हम अपने जीवन में अच्छो रहो चाहत आंय।

¹⁹ मैं तुम हां जौ सोई कहो चाहत आंव, कि बिन्तवारी करो कि मैं फिन के तुम लौ आके भेंट करों।

²⁰ परमेसुर जौन सान्ति देबेवारे आंय, जिन ने हमाए पिरभू यीशु मसीह हां जौन गाड़र के बड़े रखनवारे आंय, अपने रकत से अपने लोगन हां पाप की मौज से बचाओ।

²¹ बे तुम हां उनकी अज्ञा मानबे और जौन अच्छो होबे, ऊहां करबे को मन हमाए भीतरे बनाबे, कि उनको मान सम्मान होत रैबे। आमीन।

²² भईया हरौ, मैं तुम से बिन्तवाई करत आंव, कि जौन बातें मैंने तुम हां लिखी आंय उन पै ध्यान धरियो।

²³ तुम हां पता चलो हुईये हमाओ भईया तीमुथियुस जेहल से छूट गओ आय, बो इते समय पै आ गओ, तो मैं ऊहां लैके तुम लौ आहों।

²⁴ अपने सबरे गुरु जनों और सबरे बिसवासियन हां नमस्कार कईयो, इतालियावारे तुम हां नमस्कार कैत आंय।

²⁵ मोरी जा बिन्ती आय कि परमेसुर तुम सबन पै दया करे। आमीन।