- इब्रानियों 12 - Bundeli Holy Bible

¹ ई लाने जब इतने सबरे जनों की गवाह हम जानत आंय, तो अब सबरी रोकबेवारी बस्तन और उलझाबेवारे पाप और बुरई बातन हां छोड़ के, जैसी दौड़ हम हां दौड़ने आय ऊहां संभल के दौड़ें।

² और हम अपनी नजर हां यीशु मसीह पै लगाबें; जौन हमें आगे लै चलत आय, जिन ने क्रूस पै चढ़ाए जाबे की निन्दा सई; और आज मजे से अपने बाप के संग्गै सरग में सिंहासन पै बिराजे आंय।

³ सो यीशु मसीह पै ध्यान करो, जीने अपने लाने पापियन से बुरई बातें सुनी, कि जब मान्सन तुमाए लाने कछु कएं तो हिम्मत न हारियो।

⁴ तुम में से कोऊ पाप से लड़त भओ ऐसो नईं लड़ो कि तुमाओ रकत बहो।

⁵ तुम बिसर गए आव कि पोथी में ऐसो लिखो हतो, कि पिरभू की बातन हां हलके न लेओ, और बो जब तुम हां सुधारे तो हिम्मत न हारियो।

⁶ पिरभू जीसे प्रेम करत आंय, उन हां सुधारत सोई आंय; और जीहां अपनो बना लेत उन हां कोड़ा सोई लगात आय।

⁷ जब तुम हां सुधारो जाबै, तो धीरज धरियो जैसे सबरे बाप मताई अपने लड़का वारन हां सीख देत आंय।

⁸ परमेसुर अपने लड़का वारन हां सीख देत आंय, तुम हां ऐसी सीख न मिली होबै तो तुम उनके बाल बच्चा नईंयां।

⁹ जब हमाए मताई बाप हम हां सीख देत आंय, तो अपन उन हां मान देत आंय, पिता परमेसुर से सीख लेबें कि अपने बिलात दिना जियत रैबें।

¹⁰ हमाए मताई बाप तनक बेरा हां हम हां सीख देत आंय, परन्त परमेसुर हमें सीख देत आय कि हम ओई जैसे पवित्तर बनें।

¹¹ जा तो सांची आय कि अबै की सीख से हम हां पिरातो होत आय, परन्त सीख से हम सुधर जाबें तो हम भले रै हैं।

¹² सो अब अपने हाथन हां मजबूत और अपने घुटने के बल ठांड़े होओ।

¹³ और सूदी गैल पै चलो तो लंगड़ा ठीक से चल है, और अच्छो हो जै है।

¹⁴ सबरे जनों से मेल राखो, और साजे रओ ईके बिना तुम परमेसुर हां न तक पा हौ।

¹⁵ और ध्यान धरो कि कोई परमेसुर की दया से न बच पाबै, और तकत रओ कि कोई करऔ होकें दूसरे जन हां परेसान न करे।

¹⁶ एसव घांई बुरओ और अधरमी मान्स न कड़े, जीने तनक से भोजन के लाने अपनी आबेवारी आसीस हिरा दई।

¹⁷ तुम हां पता आय कि पाछें आसीस चाहत हतो परन्त ऊहां नईं मिली, और अंसुआ बहाबे पै ऊहां फिन के मौका नईं मिलो।

¹⁸ तुम ऊ पहरवा जीहां छियो नईं जात जौन आगी से बरत हतो, काली घटा, अंधियारे और बड़ी बैहर ऊसे आत हती।

¹⁹ और तुरही की आवाज, और बोलबेवारे के ऐंगर नईं गए, उते जौन उन की सुनत हते, बोले कि अब और हम से न बोलो।

²⁰ कायसे बे उनकी कही न कर पाए, कि कोई जनावर पहाड़ हां छी लेबे, तो ऊहां पथरन से मार डालियो।

²¹ बो सब जौन दिखात हतो बड़ो डरबेवारो हतो, मूसा तो डर के मारे कंपत हतो।

²² परन्त तुम सिय्योन के पहरवा और जियत परमेसुर के नगर यरूशलेम ऐंगर।

²³ जिते लाखों सरगदूत के संग्गै परमेसुर के प्यारे जनें जीके नाओं सरग में लिखे आंय; और परमेसुर जौन न्यायी आय उन के संग्गै आय, और अच्छे मान्सन की आत्मा जीने पापन की छिमा पाई आय।

²⁴ और उतईं पिरभू यीशु मसीह आंय, जीने अपने रकत से जौन हाबिल के रकत से भलो आय एक नई गैल बनाई आय।

²⁵ संभल के रहो, और जे बातें कहबेवारे की सुनो, जब मान्सन ने कैबेवारे की बात न मानी जौन सिय्योन पहरवा से बोलत हतो, तो का तुम उन की बात जौन सरग से बोलत आय बच पाहौ।

²⁶ ऊ बेरा तो उनके बोल से धरती कंपन लगी हती, परन्त उन ने कई आय कि ई बेरा मोरे बोले से धरती और आकास कांपन लग हैं।

²⁷ “एक बेर फिन के” को मतलब आय कि जौन बस्तें हलत आंय, बे बनाई गईं हतीं सो बे तो हल जै हैं, और बे बस्तें जौन हलाई नईं जात बे सब बनी रै हैं।

²⁸ सो हम परमेसुर की जय मानें, कि हम हां ऐसो राज मिलो जौन हल नईं सकत, उनके राज में हम उनको गुनगान करें, और उन हां मान देबें जीसे बे खुस रैबें।

²⁹ कायसे हमाओ परमेसुर सब भसम करबेवारी आगी जैसो आय।