- इब्रानियों 10 - Bundeli Holy Bible

¹ मूसा के नैम आबेवारी बातन की छाया आय, जा छाया अपने में अच्छी नईंयां, कायसे इन से मान्स पाप से नईं छूटत, जौन बलदान हर बरस करने पड़त आंय, उन मान्सन हां कभऊं सुद्ध नईं कर सकत।

² जौन जनें बलदान चढ़ात हते उन के पाप छिमा हो जाते, तो फिन बलदान चढ़ाबे कौ काम नईं होतो, कायसे उनको जी उन हां पापी न कैतो।

³ कायसे उन हां हर बरस अपने पापन के लाने बलदान करबो होत आय।

⁴ बैल और बछड़न के रकत से मान्सन के पाप धुलबो मुसकल आय।

⁵ ऐई से जब उन ने देह धारन करी तो कहो, कि बलदान और भेंट तुम ने नईं मांगी।

⁶ होमबली और पापन के लाने बली चढ़ाबे से परमेसुर खुस नईं भए।

⁷ तब पिरभू यीशु मसीह ने कहो, कि मैं इ धरती पै आ गओ आंव, (धर्म पोथी में मोरे काजें ऐसो लिखो आय) कि परमेसुर तुमाई मरजी पूरी करें।

⁸ पेंला उन ने कहो, कि बलदान और भेंट और होमबली, और पाप की बली मोहां नईं भात; मूसा के नैम हां पूरो करबे हां बलदान चढाए जात आंय।

⁹ जौ सोई कैत आंय, कि मैं संसार में आ गओ आंव, कि तुमाई इच्छा पूरी करों; ईसे बे पेंलावारे बलदान बन्द कर देत आय।

¹⁰ उनकी मरजी से यीशु मसीह के एक बेर बलदान से हमाए पापन की छिमा भई।

¹¹ याजक रोजीना सेवा को काज करत आंय, परन्त बे बेर बेर बलदान से पापन हां दूर न कर सके।

¹² पर पिरभू यीशु मसीह ने पापन के बदले एकई बेर सदा के लाने अपनो बलदान करके, परमेसुर के दांय हाथ जा बैठे।

¹³ और जे जब लौ उतईं बैठ हैं, जब लौ उनके सबरे बैरी उनके गोड़न तरें न हो जाबें।

¹⁴ कायसे उन ने एकई बलदान से उन हां पापन से छुड़ाके परमेसुर के जनें बना दओ।

¹⁵ पवित्रात्मा सोई ऐसो कैत आय; कि पेंला ऐसो कहो गओ।

¹⁶ समय आबे पै मैं उनसे एक कौल कर हों, बो ऐसो आय कि मैं अपने नैम उनके हिये में लिख हों और उन के जी में डाल हों।

¹⁷ (फिन बो ऐसो कैत आय) कि उन के बुरय कामन हां, और उन के पापन हां कभऊं याद न कर हों।

¹⁸ जब उन के पापन की छिमा हो गई, तो पापन के लाने बलदान करबे की कोई जरूरत नईंयां।

¹⁹ सो भईया हरौ, पिरभू यीशु मसीह के रकत के जोर से महापवित्तर जांगा में जाबे को हियाव हो गओ आय।

²⁰ ई नई गैल से हम जीवन में पोंच हैं, और जा गैल जौन यीशु मसीह आय हम हां परदा में से लै जै हैं।

²¹ और हमाओ ऐसो बड़ो याजक आय, जो परमेसुर के घर को मुखिया आय।

²² सो परमेसुर लौ साफ हिये, और बिसवास से, और अपने मन हां शुद्ध करके और अपने मन हां बुरई बातन से दूर करके, और अपनी देह हां साफ पानू से सपर के आओ।

²³ और हमाई जौन आसा आय ऊहां कर्रे से पकड़े रओ, जीने अपन हां जा आसा दई आय, बो सांचो आय।

²⁴ हम दूसरन हां प्रेम करबे हां, और पुण्य के अच्छे काम करबे हां बढ़ावा देबें।

²⁵ कई मान्स एक संग्गै जुड़के आराधना नईं करत ऐसो अच्छो नईंयां, एक दूजे हां अच्छी सला देओ; पिरभू को आबो जल्दी होने आय, सो उनईं एक दूजे के संग्गै जुड़त रओ।

²⁶ जिन ने सांचो बचन हिये में धर लओ हतो, परन्त जान के पाप में पड़ जाबें, तो अब उनके लाने कोई और बलदान काम न आहें।

²⁷ ऐसे जन पै आबेवारो न्याय पड़ है और बे नरक कुण्ड की आग में तड़पें, कायसे बे बचन हां नईं मानत।

²⁸ मूसा के नैम में एक जनों जौन कई नईं करत दो तीन जन के कैबे पे, बिना दया के मार डालो जात हतो।

²⁹ सो सोच लेओ कि जीने परमेसुर के लड़का यीशु मसीह को तिरस्कार करो, और उनके रकत जीसे मान्सन के पाप कटत ऊहां नईं मानो, ऐसन हां बहुतई दण्ड मिल है, कायसे उन ने ऊ दया जौन उन पै होने हती ऊहां नईं मानो।

³⁰ कायसे हम उन हां चीनत आंय, जीने कई, कि न्याय करबो मोरा काज आय, मैं ऊहां दण्ड दै हों: और ऐसो सोई लिखो आय, कि पिरभू अपने मानबेवारन को सोई न्याय कर हैं।

³¹ जीयत परमेसुर के हाथ में पड़बो भयंकर बात आय।

³² पेंला के दिना हां याद करो, जब तुम ने पिरभू की जोत पाई तो तुम ने बड़ी पीड़ा सही परन्त पक्के बने रए।

³³ सोचो कि तुम में से कछु जनें तो मान्सन के सामूं निंदरत गए, और तुम में से कछु जन की भारी दुरदसा करी गई।

³⁴ जौन जनें जेहल में डाले गए उन पै तुम ने दया करी, और जब मान्सन ने तुमाई चीज बस्तें ले लईं; तब तुम चिमाने रए, कायसे तुम हां पता हतो कि तुमें ईसे बढ़िया और हमेसा बनी रैबैवारी बस्तें मिल हैं।

³⁵ सो हिम्मत न हारो कायसे तुमाए काजें एक बड़ो इनाम धरो आय।

³⁶ धीरज धरबो सीखो कि तुम परमेसुर हां खुस राखो, और ध्यान धरो कि पिरभू से तुम हां ईको बड़ो फल मिल है।

³⁷ जैसो पोथी में कड़ो, कि परमेसुर अब झट्टई आहै, और अब और बेरा न हुईये।

³⁸ मोरो नाओं लैबेवारो अपने बिसवास से जी है, परन्त जौन पिछल जात आय उन से परमेसुर खुस नईं हुईयें।

³⁹ हम उन मान्सन घांई नईंयां, जो पिछल के बिगड़ गए परन्त हम अपने बिसवास में पक्के रै हैं, कि तरन तारन पाबें।