- उत्पत्ति 9 - Bundeli Holy Bible

यहोवा परमेसुर कौ नूह के संगै बाचा बांधबो

¹ फिन यहोवा परमेसुर ने नूह और ऊके मोंड़ों हों आसीस दई और उनसें कई, “फूलो-फलो, बढ़ो और पृथ्‍वी में फैल जाओ।

² तुमाओ डर और भय पृथ्‍वी के सबरे पसुओं, और आकास के सबरे पक्‍छियों, और जमीन पै के सबरे रेंगबेवारे जन्‍तुओं, और समंदर की सबरी मछरियों पै बनो रैहै: जे सब तुमाए बस में कर दए जात आंय।

³ सबरे चलबेवारे जन्‍तु तुमाओ भोजन हुईयें; जैसे तुमें हरे-भरे छोटे पौधे दए हते, बैसई अब सब कछु देत आंव।

⁴ परन्‍त मांस हों प्रान समेंत मतलब खून के समेंत तुम नें खाईयो।

⁵ पक्‍कौ मैं तुमाए खून मतलब प्रान कौ बदला लैहों: सबरे पसुओं और मान्‍सन, दोई सें मैं ऊहों लैहों; मान्‍स के प्रान कौ बदला मैं एक-एक के भईया बन्‍दों सें लैहों।

⁶ जो कोऊ मान्‍स कौ खून बहाए ऊकौ खून मान्‍स सेंई बहाओ जैहै, कायसे यहोवा परमेसुर ने मान्‍स हों अपनेई स्‍वरूप के अनसार बनाओ आय।

⁷ तुम फूलो-फलो, बढ़ो और पृथ्‍वी पै मुतके मोंड़ा-मोंड़ी पैदा करकें ऊमें भर जाओ।”

⁸ फिन यहोवा परमेसुर ने नूह और ऊके मोंड़ों सें कई,

⁹ “सुनो, मैं तुमाए संगै और तुमाए बाद जो तुमाओ बंस हुईये, ऊके संगै भी बाचा बांधत आंव;

¹⁰ और सबरे जियत प्रानियों सें भी जो तुमाए संगै आंय, का पक्‍छी, का घरेलू पसु, का पृथ्‍वी के सबरे बनैले पसु, पृथ्‍वी के जितेक जीवजन्‍तु जहाज सें कड़े आंय।

¹¹ मैं तुमाए संगै अपनी जा बाचा बांधत आंव कि सबरे प्रानी फिन जल-प्रलय सें नास नें हुईयें: और पृथ्‍वी कौ नास करबे के लाने फिन जल-प्रलय नें हुईये।”

¹² फिन यहोवा परमेसुर ने कई, “जो बाचा मैं तुमाए संगै, और जितेक जियत प्रानी तुमाए संगै आंय उन सबई के संगै भी जुग-जुग की पीढ़ियों के लाने बांधत आंव, ऊकौ जौ चिन्‍ह आय:

¹³ मैंने बादल में अपनो धनुस रखो आय, ऊ मोरे और पृथ्‍वी के मजारें बाचा कौ चिन्‍ह हुईये।

¹⁴ जब मैं पृथ्‍वी पै बादल फैलाओं तब बादल में धनुस दिखाई दैहै।

¹⁵ तब मोरी जो बाचा तुमाए और सबरे जियत प्रानियों के संगै बंधी आय; ऊहों मैं याद करहों, तब एैसो जल-प्रलय फिन नें हुईये जीसें सबरे प्रानियों कौ बिनास होए।

¹⁶ बादल में जो धनुस हुईये मैं ऊहों हेरकें जा सदा की बाचा याद करहों, जो यहोवा परमेसुर के और पृथ्‍वी पै के सबरे जियत प्रानियों के मजारें बंधी आय।”

¹⁷ फिन यहोवा परमेसुर ने नूह सें कई, “जो बाचा मैंने पृथ्‍वी में रैबेवारे सबरे प्रानियों के संगै बांधी आय, ऊकौ चिन्‍ह जौई आय।”

नूह और ऊके मोंड़ा

¹⁸ नूह के जो मोंड़ा जहाज में सें कड़े, बे शेम, हाम और येपेत हते; और हाम कनान कौ बाप भओ।

¹⁹ नूह के तीनईं मोंड़ा जेई आंय, और इनकौ बंस पूरी पृथ्‍वी पै फैल गओ।

²⁰ नूह किसानी करन लगो। ऊने दाख की बारी लगाई;

²¹ और ऊ दाखमधु पीकें मतवारो भओ; और अपने तम्‍बू के भीतर नंगो हो गओ।

²² तब कनान के बाप हाम ने अपने बाप हों नंगो हेरो, और बायरें कड़कें अपने दोई भईयों हों बता दओ।

²³ तब शेम और येपेत दोई ने उन्‍ना लैकें अपने कन्‍धों पै रखो, और पाछें कोद उल्‍टे निंगकें अपने बाप के नंगे सरीर हों ढंक दओ, और बे अपने मों पाछें करे भए हते, ई लाने उनोंरन ने अपने बाप हों नंगो नें हेरो।

²⁴ जब नूह कौ नसा उतर गओ, तब ऊ समझ गओ कि ऊके छोटे मोंड़ा ने ऊके संगै का करो आय।

²⁵ ई लाने ऊने कई: “कनान स्रापित हो, ऊ अपने भाई बन्‍दों के दासों कौ दास होए।”

²⁶ फिन ऊने कई, “शेम कौ यहोवा परमेसुर धन्‍य आय, और कनान शेम कौ दास होए।

²⁷ यहोवा परमेसुर येपेत के बंस हों फैलाए; और ऊ शेम के तम्‍बुओं में बसे; और कनान ऊकौ दास होए।”

²⁸ जल-प्रलय के बाद नूह साढ़े तीन सौ साल लौ जियत रओ।

²⁹ ई तरहां नूह की पूरी उमर साढ़े नौ सौ साल की भई; ईके बाद ऊ मर गओ।