- उत्पत्ति 47 - Bundeli Holy Bible

¹ तब यूसुफ ने राजा फिरौन के लिगां जाकें जौ संदेसो दओ, “मोरो बाप और मोरे भईया, और उनकी गाड़र-छिरियां, गईया-बैला और जो कछु उनकौ आय, सब कनान देस सें आ गओ आय; और अबै तौ बे गोशेन देस में आंय।”

² फिन ऊने अपने भईयों में सें पांच जन लैकें फिरौन के सामूं ठांड़े कर दए।

³ फिरौन ने ऊके भईयों सें पूंछो, “तुमाओ ब्‍योपार का आय?” उनोंरन ने फिरौन सें कई, “तोरे दास चरवाहा आंय, और हमाए पुरखा भी एैसई रए।”

⁴ फिन उनोंरन ने फिरौन सें कई, “हम ई देस में परदेसी जैसे रैबे के लाने आएहें; कायसे कनान देस में बड़ो अकाल होबे के कारन तोरे दासों हों गाड़र-छिरियों के लाने चारा नें रओ; ई लाने अपने दासों हों गोशेन देस में रैबे कौ हुकम दे।”

⁵ तब फिरौन ने यूसुफ सें कई, “तोरो बाप और तोरे भईया तोरे लिगां आ गए आंय।

⁶ मिस्र देस तोरे सामूं पड़ो आय; ई देस कौ जो सब सें अच्‍छो भाग होए, ऊमें अपने बाप और भईयों हों बसा दे; मतलब बे गोशेन देस मेंई रएं; और जदि तें जानत होए, कि उनमें सें मेहनती मान्‍स आंय, तौ उनहों मोरे पसुओं के अधकारी बना दे।”

⁷ तब यूसुफ ने अपने बाप याकूब हों ल्‍याकें फिरौन के सामूं ठांड़ो करो; और याकूब ने फिरौन हों आसीरवाद दओ।

⁸ तब फिरौन ने याकूब सें पूंछो, “तोरी उमर कितेक दिना की भई आय?”

⁹ याकूब ने फिरौन सें कई, “मैं एक सौ तीस साल परदेसी होकें अपने जीवन बिता चुको आंव; मोरे जीवन के दिना थोड़े और दुख सें भरे भए सोई हते, और मोरे बाप-दादा परदेसी होकें जितेक दिना लौ जियत रए उतेक दिना कौ मैं अबै नईं भओ।”

¹⁰ याकूब, फिरौन हों आसीरवाद दैकें ऊके सामूं सें चलो गओ।

¹¹ तब यूसुफ ने अपने बाप और भईयों हों बसा दओ, और फिरौन के हुकम अनसार मिस्र देस के अच्‍छे सें अच्‍छे भाग में, मतलब रामसेस नाओं प्रदेस में, जमीन उनहों सौंप दई।

¹² यूसुफ अपने बाप कौ, और अपने भईयों कौ, और बाप के पूरे घरबार कौ, एक-एक के बाल-बच्‍चों की गिनती के अनसार, भोजन दिला-दिलाकें उनहों पालत-पोसत रओ।

अकाल और यूसुफ कौ प्रबन्‍ध

¹³ ऊ पूरे देस में खाबे हों कछु नें रओ; कायसे अकाल बिलात बड़ो हतो, और अकाल के कारन मिस्र और कनान दोई देस परेसान हो गए।

¹⁴ जितेक रुपईया मिस्र और कनान देस में हतो, सबहों यूसुफ ने ऊ अन्‍न के बदले, जो उतै के रैबेवारे खरीद लेत हते, इकट्ठो करके फिरौन के भवन में पोंचा दओ।

¹⁵ जब मिस्र और कनान देस कौ रुपईया खतम हो गओ, तब सबरे मिस्री यूसुफ के लिगां आ-आकें कैन लगे, “हमें भोजनबस्‍त दे; का हम रुपईया के नें रैत भए और तोरे रैत भए मर जाएं?”

¹⁶ यूसुफ ने कई, “जदि रुपईया नें होएं तौ अपने पसु दै दो, और मैं उनके बदले तुमहों खाबे हों दैहों।”

¹⁷ तब बे अपने पसु यूसुफ के लिगां ल्‍याए; और यूसुफ उनहों घोड़ों, गाड़र-छिरियों, गईया-बैलों और गधों के बदले खाबे हों दैन लगो: ऊ साल में बौ सबरी जाति के पसुओं के बदले भोजन दैकें उनहों पलत-पोसत रओ।

¹⁸ ऊ साल तौ एैसई कट गओ; तब अगले साल में उनोंरन ने ऊके लिगां आकें कई, “हम अपने पिरभु सें जा बात छिपा नें रखहें कि हमाओ रुपईया बड़ा गओ आय, और हमाए सब तरहां के पसु हमाए पिरभु लौ आ चुके आंय; ई लाने अब हमाए पिरभु के सामूं हमाए सरीर और हमाई जमीन छोड़कें और कछु नईं रओ।

¹⁹ हम तोरे हेरत काए मरें, और हमाई जमीन काए उजड़ जाए? हमें और हमाई जमीन हों भोजनबस्‍त के बदले खरीद ले, कि हम अपनी जमीन संगै फिरौन के बंधुआ हो जाएं: और हमें बीज दे कि हम मर नें पाएं, बल्‍कि जियत रएं, और जमीन नें उजड़े।”

²⁰ तब यूसुफ ने मिस्र की सबरी जमीन हों फिरौन के लाने खरीद लओ; कायसे ऊ भयंकर अकाल पड़बे सें मिस्रियों हों अपने-अपने खेत बेंचने पड़े। ई तरहां सबरी जमीन फिरौन की हो गई;

²¹ और एक छोर सें दूसरे छोर लौ पूरे मिस्र देस में जो परजा रैत हती, ऊहों ऊने नगरों में ल्‍याकें बसा दओ।

²² परन्‍त याजकों की जमीन ऊने नें खरीदी; कायसे याजकों के लाने फिरौन कुदाऊं सें रोजई भोजन कौ बन्‍दोबस्‍त हतो, रोजई जो भोजन फिरौन उनहों देत हतो ओई बे खात हते, ई कारन उनहों अपनी जमीन नें बेंचने पड़ी।

²³ तब यूसुफ ने परजा के मान्‍सन सें कई, “सुनो, मैंने आजई के दिना तुमहों और तुमाई जमीन हों भी फिरौन के लाने खरीद लओ आय; हेरो, तुमाए लाने इतै बीज आय, ईहों खेत में बोओ।

²⁴ जो कछु उपजे ऊकौ पांचवों हींसा फिरौन हों दईयो, बाकी चार हींसा तुमाए रैहें कि तुम ऊसें अपने खेतों में बोओ, और अपने अपने बाल-बच्‍चों और घरवारों समेंत खाए करियो।”

²⁵ उनोंरन ने कई, “तेंने हमें बचा लओ आय; हमाए पिरभु की किरपा दृस्‍टि हम पै बनी रए, और हम फिरौन के बंधुआ होकें रैहें।”

²⁶ ई तरहां यूसुफ ने मिस्र की जमीन के बारे में एैसो नियम बना दओ, जो आज लौ चलो आत आय कि पांचवों हींसा फिरौन हों मिलो करे; केवल याजकों ही की जमीन फिरौन की नें भई।

याकूब की अखीरी इच्‍छा

²⁷ इस्राएली मिस्र के गोशेन प्रदेस में रैन लगे; और उतै की जमीन उनके बस में हती; और बे फूले-फले, और बिलात बढ़ गए।

²⁸ मिस्र देस में याकूब सत्रह साल लौ जियत रओ; ई तरहां याकूब की पूरी उमर एक सौ सैंतालीस साल की भई।

²⁹ जब इस्राएल के मरबे कौ दिना लिगां आ गओ, तब ऊने अपने मोंड़ा यूसुफ हों टेरकें कई, “जदि तोरी किरपा मोए पै होए, तौ अपनो हाथ मोरी जांघ के खालें रखकें कौल खा कि तें मोरे संगै किरपा और सच्‍चाई कौ जौ काम करहै कि मोहों मिस्र में माटी नें दैहै।

³⁰ जब मैं अपने बाप-दादों के संगै सो जैहों, तब तें मोहों मिस्र सें उठा लै जाकें उनईं के कब्रिस्‍तान में रखहै।” तब यूसुफ ने कई, “मैं तोरे बचन के अनसार करहों।”

³¹ फिन ऊने कई, “मोए सें कौल कर।” सो ऊने ऊसें कौल खाई। तब इस्राएल ने खटिया के सिरहाने कुदाऊं मूंड़ झुकाकें बिन्‍तवाई करी।