- उत्पत्ति 42 - Bundeli Holy Bible

यूसुफ के भईयों कौ मिस्र में आबो

¹ जब याकूब ने सुनो कि मिस्र में अन्‍न आय, तब ऊने अपने मोंड़ों सें कई, “तुम एक दूसरे कौ मों काए तक रए आव?”

² फिन ऊने कई, “मैंने सुनो आय कि मिस्र में अन्‍न आय; ई लाने तुमोंरें उतै जाकें हमाए लाने अन्‍न खरीदकें ल्‍याओ, जीसें हम नें मरें, बल्‍कि जियत रएं।”

³ सो यूसुफ के दस भईया अन्‍न खरीदबे के लाने मिस्र हों गए।

⁴ परन्‍त यूसुफ के भईया बिन्‍यामीन हों याकूब ने जौ सोचकें भईयों के संगै नें पठैओ कि कहूं एैसो नें होए कि ऊपै कोऊ बिपत आन पड़े।

⁵ ई तरहां जो मान्‍स अन्‍न खरीदबे आए उनके संगै इस्राएल के मोंड़ा भी आए; कायसे कनान देस में भी भारी अकाल हतो।

⁶ यूसुफ तौ मिस्र देस कौ परधान अधकारी हतो, और ऊ देस के सबरे मान्‍सन के हाथ ओई अन्‍न बेंचत हतो; ई लाने जब यूसुफ के भईया आए तब जमीन पै मों के बल गिरकें ऊहों दंडवत करो।

⁷ उनहों हेरकें यूसुफ ने चीन तौ लओ, परन्‍त उनके सामूं सूदो बनकें कड़ाई सें उनसें पूंछो, “तुमोंरें कितै सें आए आव?” उनोंरन ने कई, “हमोंरें तौ कनान देस सें अन्‍न खरीदबे के लाने आएहें।”

⁸ यूसुफ ने अपने भईयों हों चीन लओ, परन्‍त उनोंरन ने ऊहों नें चीनो।

⁹ तब यूसुफ ने अपने उन सपनों हों याद करके जो ऊने उनके बारे में हेरो हतो, उनसें कैन लगो, “तुमोंरें भेदिये आव; ई देस की दुरदसा हेरबे के लाने आए आव!”

¹⁰ उनोंरन ने ऊसें कई, “नईं-नईं, हे पिरभु, तोरे दास भोजनबस्‍त खरीदबे के लाने आएहें।

¹¹ हमोंरें एकई बाप के मोंड़ा आंय, हम सूदे मान्‍सन आंय; तोरे दास भेदिये नईंया।”

¹² ऊने उनसें कई, “नईं-नईं तुमोंरें ई देस की दुरदसा हेरबेई हों आए आव।”

¹³ उनोंरन ने कई, “हमोंरें तोरे दास बारह भईया आंय, और कनान देसवासी एकई मान्‍स के मोंड़ा आंय, और लौरो ई बेरा हमाए बाप के लिगां आय, और एक जात रओ।”

¹⁴ तब यूसुफ ने उनसें कई, “मैंने तुमसें कै दओ कि तुम भेदिये आव;

¹⁵ सो ई तरहां तुमोंरें परखे जैहौ, राजा फिरौन के जीवन की कौल, जब लौ तुमाओ लौरो भईया इतै नें आहै तब लौ तुम इतै सें नें कड़ पाहौ।

¹⁶ ई लाने अपने में सें एक हों पठै देओ कि ऊ तुमाए भईया हों ल्‍याए, और तुमोंरें बन्‍दी रैहौ; ई तरहां तुमाई बातें परखी जैहें कि तुम में सच्‍चाई आय कि नईंया। जदि सांचे नें कड़े तब तौ फिरौन के जीवन की कौल तुम पक्‍के भेदिये समझे जैहौ।”

¹⁷ तब ऊने उनहों तीन दिना लौ जेलखाने में रखो।

¹⁸ तीसरे दिना यूसुफ ने उनसें कई, “एक काम करो तब जिन्‍दा रैहौ; कायसे मैं यहोवा परमेसुर कौ भय मानत आंव;

¹⁹ जदि तुम सूदे मान्‍स आव, तौ तुम सबरे भईयों में सें एक जन ई जेलखाने में बंधुआ रए; और तुमोंरें अपने घरवारों की भूंख मिटाबे के लाने अन्‍न लै जाओ,

²⁰ और अपने लौरे भईया हों मोरे लिगां ल्‍याओ; ई तरहां तुमाई बातें सांची ठैरहें, और तुम मार डाले नें जैहौ।” तब उनोंरन ने बैसई करो।

²¹ उनोंरन ने आपस में कई, “पक्‍कौ हमोंरें अपने भईया के बारे में दोसी आंय, कायसे जब ऊने हमसें गिड़गिड़ाकें बिनती करी, तब भी हमने जौ हेरकें कि ऊकौ जीवन कैसे संकट में पड़ो आय, ऊकी नें सुनी; ऐई कारन हम सोई अब ई संकट में पड़े आंय।”

²² रूबेन ने उनसें कई, “का मैंने तुमसें नें कई हती कि मोंड़ा के अपराधी नें बनो? परन्‍त तुमने नें सुनी। हेरो, अब ऊके खून कौ बदला लओ जात आय।”

²³ यूसुफ कौ और उनकौ बतकाओ एक दोभासिया के द्वारा होत हती; ईसें उनहों पता नईं पड़ो कि ऊ उनकी बोली जानत आय।

²⁴ तब ऊ उनके लिगां सें हटकें रोन लगो; फिन उनके लिगां लौटकें और उनसें बतकाओ करके उनमें सें शिमोन हों छांटकें काड़ो और उनके सामूं बन्‍दी बना लओ।

यूसुफ के भईयों कौ कनान लौटबो

²⁵ तब यूसुफ ने हुकम दओ कि उनके बोरा अन्‍न सें भरो और एक-एक जन के बोरा में उनके रुपईया भी रख देओ, फिन उनकी गैल के लाने भोजनबस्‍त देओ। सो उनके संगै एैसई करो गओ।

²⁶ तब बे अपनो अन्‍न गधों पै लादकें उतै सें चल दए।

²⁷ सराय में जब एक ने अपने गधा हों चारा दैबे के लाने अपनो बोरा खोलो, तब ऊकौ रुपईया बोरे के मों पै रखो दिखाई पड़ो।

²⁸ तब ऊने अपने भईयों सें कई, “मोरो रुपईया तौ लौटा दओ गओ आय; हेरो, ऊ मोरे बोरा में आय,” तब उनके जी में जी नईं रओ, और बे एक-दूसरे कोद डरकें हेरन लगे, और कैन लगे, “यहोवा परमेसुर ने हमसें जौ का करो आय?”

²⁹ तब बे कनान देस में अपने बाप याकूब के लिगां आए, और अपनो पूरो बृतांत ऊहों ई तरहां सुनाओ:

³⁰ “जो मान्‍स ऊ देस कौ मालक आय, ऊने हमसें कड़ाई सें बातें करीं, और हमें देस के भेदिये कई।

³¹ तब हमने ऊसें कई, ‘हम सूदे मान्‍स आंय, भेदिये नईंया।

³² हमोंरें बारह भईया एकई बाप के मोंड़ा आंय; एक तौ चल बसो, परन्‍त लौरो ई बेरा कनान देस में हमाए बाप के लिगां आय।’

³³ तब ऊ मान्‍स ने, जो ऊ देस कौ मालक आय, हमसें कई, ‘ईसें पता पड़ जैहै कि तुम सूदे मान्‍स आव; तुम अपने में सें एक हों मोरे लिगां छोड़कें अपने घरवारों की भूंख मिटाबे के लाने कछु अन्‍न लै जाओ।

³⁴ अपने लौरे भईया हों मोरे लिगां ल्‍याओ। तब मोहों बिस्‍वास हो जैहै कि तुम भेदिये नईंया, सूदे मान्‍स आव। फिन मैं तुमाए भईया हों तुमहों सौंप दैहों, और तुम ई देस में लेन-देन कर पाहौ’।”

³⁵ जौ कहकें बे अपने-अपने बोरे सें अन्‍न काड़न लगे, तब का हेरो कि एक-एक जन के रुपईया की थैली उनईं के बोरों में रखी आय, तब रुपईया की थैलियों हों हेरकें बे और उनकौ बाप बेजा डर गए।

³⁶ तब उनके बाप याकूब ने उनसें कई, “तुमने तौ मोहों अपने बच्‍चों सें बंचित कर दओ, हेरो, यूसुफ नईं रओ, और शिमोन नईं आओ, और अब तुमोंरें बिन्‍यामीन हों भी संगै लै जाबो चाहत आव। जे सब बिपदाएं मोरे ऊपर आन पड़ी आंय।”

³⁷ रूबेन ने अपने बाप सें कई, “जदि मैं ऊहों तोरे लिगां नें लाओं, तौ मोरे दोई मोंड़ों हों मार डालियो, तें ऊहों मोरे हाथ में सौंप दे, मैं ऊहों तोरे लिगां फिन पोंचा दैहों।”

³⁸ याकूब ने कई, “मोरो मोंड़ा तुमाए संगै नें जैहै; कायसे ऊकौ भईया मर गओ और ऊ अब अकेलो रै गओ आय: ई लाने जौन गैल सें तुम जैहौ, ऊमें जदि ऊपै कोऊ बिपत आन पड़े, तब तौ मैं तुमाए कारन ई बुढ़ापे की दसा में दुख के संगै अधोलोक में चलो जैहों।”