- उत्पत्ति 41 - Bundeli Holy Bible

फिरौन के सपनों कौ मतलब बताबो

¹ पूरे दो साल बीतबे पै राजा फिरौन ने जौ सपना हेरो कि ऊ नील नदिया के किनारे पै ठांड़ो आय;

² ऊ नदिया में सें सात नोंनी और मोंटी मोंटी गईयां कड़कें कछार की घांस चरन लगीं;

³ और का हेरो कि उनके पाछें और सात गईयां, जो कुरूप और कमजोर आंय, नदिया में सें कड़ीं, और दूसरी गईयों के लिगां नदिया के तट लौ जाकें ठांड़ी भईं।

⁴ तब जे कुरूप और कमजोर गईयां उन सात नोंनी और मोंटी मोंटी गईयों हों खा गईं, तब फिरौन जग गओ;

⁵ ऊ फिनकें सो गओ और ऊने दूसरो सपना हेरो कि एक डंठल में सें सात मोंटी और नोंनी-नोंनी बालें कड़ीं;

⁶ और का हेरो कि उनके पाछें-पाछें सात बालें पतली और पुरवाई सें मुरझाईं भईं कड़ीं।

⁷ इन पतली बालों ने उन सातई मोटी और अन्‍न सें भरी भईं बालों हों निगल लओ। तब फिरौन जगो, और ऊहों पता पड़ो कि जौ सपनई हतो।

⁸ भुन्‍सारे हों फिरौन कौ मन घबराओ और ऊने मिस्र के सबरे ज्‍योतिसियों और पंडितों हों बुलवाओ; और उनहों अपने सपने बताए; परन्‍त उनमें सें कोऊ भी उनकौ फल फिरौन हों नें बता पाओ।

⁹ तब पिलाबेवारों कौ परधान फिरौन सें बोल उठो, “मोरे अपराध आज मोहों याद आए।

¹⁰ जब फिरौन अपने सेवकों सें गुस्‍सा भओ हतो, और मोहों और पकाबेवारों के परधान हों कैद कराकें अंगरक्‍छकों के परधान के घर के जेलखाने में डाल दओ हतो;

¹¹ तब हम दोई ने एकई रात में अपने-अपने भविस्‍य में होबेवारे सपना हेरे;

¹² उतै हमाए संगै एक इब्री जवान हतो, जो अंगरक्‍छकों के परधान कौ दास हतो; सो हमने ऊहों बताओ और ऊने हमाए सपनों कौ मतलब हमें बताओ, हम में सें एक-एक के सपने कौ मतलब ऊने बता दओ;

¹³ और जैसो-जैसो मतलब ऊने हमें बताओ हतो, बैसई भओ सोई, मतलब मोए हों तौ मोरो पद फिन मिलो, परन्‍त पकाबेवारों के परधान हों फांसी पै लटकाओ गओ।”

¹⁴ तब फिरोन ने यूसुफ हों बुलवाओ; और ऊ झट्टई जेलखाने सें बायरें काड़ो गओ, और बाल बनवाकें और उन्‍ना बदलकें फिरौन के सामूं आओ।

¹⁵ फिरौन ने यूसुफ सें कई, “मैंने एक सपना हेरो आय, और ऊकौ मतलब बताबेवारो कोऊ भी नईंया; और मैंने तोरे बारे में सुनो आय कि तें सपना सुनतई ऊकौ मतलब बता देत आय।”

¹⁶ यूसुफ ने फिरौन सें कई, “मैं तौ कछु नईं जानत: यहोवा परमेसुरई फिरौन के लाने सुभ बचन दैहै।”

¹⁷ फिन फिरौन यूसुफ सें कैन लगो, “मैंने अपने सपने में हेरो कि मैं नील नदिया के किनारे ठांड़ो आंव;

¹⁸ फिन का हेरो, कि नदिया में सें सात मोंटी और नोंनी-नोंनी गईयां बायरें कड़कें कछार की घांस चरन लगीं।

¹⁹ फिन का हेरो, कि उनके पाछें सात और गईयां कड़ीं, जो दुबली और बेजा कुरूप आंय; मैंने पूरे मिस्र देस में एैसी बेड़ौल गईयां कभऊं नईं हेरीं।

²⁰ इन मरियल और बेड़ौल गईयों ने उन सातई मोंटी-मोंटी गईयों हों खा लओ;

²¹ और जब बे उनहों खा गईं तब जौ पता नें हतो कि बे उनहों खा गईं आंय, कायसे बे पैलां के जैसी जस की तस बेड़ौल रईं। तब मैं जग गओ।

²² फिन मैंने दूसरो सपना हेरो, कि एकई डंठल में सात नोंनी-नोंनी और अन्‍न सें भरी भईं बालें कड़ीं।

²³ फिन का हेरत आंव, कि उनके पाछें और सात बालें छूंछी-छूंछी और पतली और पुरवाई सें मुरझाई भईं कड़ीं,

²⁴ और इन पतली बालों ने उन सात नोंनी-नोंनी बालों हों निगल लओ। ईसें मैंने ज्‍योतिसियों हों बताओ, परन्‍त ईकौ समझाबेवारो कोऊ नईं मिलो।”

²⁵ तब यूसुफ ने फिरौन सें कई, “फिरौन कौ सपना एकई आय, यहोवा परमेसुर जो काम करबो चाहत आय, ऊहों ऊने फिरौन हों बता दओ।

²⁶ बे सात नोंनी-नोंनी गईयां सात साल आंय; और बे सात नोंनी-नोंनी बालें भी सात साल आंय; सपना एकई आय।

²⁷ फिन उनके पाछें मरियल और बेड़ौल गईयां कड़ीं, और जो सात छूंछी और पुरवाई सें मुरझाई भईं बालें कड़ीं, बे आकाल के सात साल हुईयें।

²⁸ जा ओई बात आय, जौन मैं फिरौन सें कै चुको आंव कि यहोवा परमेसुर जो काम करबो चाहत आय, ऊहों ऊने फिरौन हों दिखाओ आय।

²⁹ सुन, पूरे मिस्र देस में सात साल तौ मुतकी उपज हुईये।

³⁰ ऊके बाद सात साल अकाल के आहें, और पूरे मिस्र देस में मान्‍सन ई पूरी उपज हों बिसर जैहें; और अकाल सें देस नास हुईये।

³¹ मुतकी उपज कौ देस में फिन याद नें करो जैहै, कायसे अकाल बेजा भयानक हुईये।

³² फिरौन ने जो सपना दो बेर हेरो आय ईकौ मतलब जौई आय कि जा बात यहोवा परमेसुर कुदाऊं सें तय हो चुकी आय, और यहोवा परमेसुर ईहों जल्‍दी पूरो करहै।

³³ ई लाने अब फिरौन कौनऊं समझदार और ज्ञानी मान्‍स हों ढूंढ़कें ऊहों मिस्र देस कौ परधान अधकारी ठैराए।

³⁴ फिरौन जौ करै कि देस पै अधकारियों हों तैनात करे, और जब लौ मुतकी उपज के सात साल रएं तब लौ ऊ मिस्र देस की उपज कौ पांचवों हींसा लओ करे।

³⁵ बे इन अच्‍छे सालों में सब तरहां की भोजन बस्‍तें इकट्ठो करें, और नगर-नगर में भोजन बस्तों के लाने गोदाम बनवाएं, और फिरौन के बस में करके ऊकी रक्‍छा करें।

³⁶ बे भोजनबस्‍तें अकाल के उन सात सालों के लाने, जो मिस्र देस में आहें, देस के भोजन के लाने रखी रएं, जीसें देस कौ ऊ अकाल सें सत्‍यानास नें हो जाए।”

यूसुफ कौ परधान अधकारी बनाओ जाबो

³⁷ जा बात फिरौन और ऊके सबरे करमचारियन हों अच्‍छी लगी।

³⁸ ई लाने फिरौन ने अपने करमचारियन सें कई, “का हमें एैसो मान्‍स, जैसो जौ आय जीमें यहोवा परमेसुर कौ आत्‍मा रैत आय, मिल सकत आय?”

³⁹ फिन फिरौन ने यूसुफ सें कई, “यहोवा परमेसुर ने जो तोहों सबरी बातें बता दई आंय, सो तोरे बरोबर कोऊ समझदार और बुद्धिमान नईंया;

⁴⁰ ई कारन तें मोरे घर कौ अधकारी हुईये, और तोरे हुकम के अनसार मोरी पूरी परजा चलहै, केवल राजगद्दी के बारे में मैं तोए सें बड़ो ठैरहों।”

⁴¹ फिन फिरौन ने यूसुफ सें कई, “सुन, मैं तोए हों मिस्र के पूरे देस के ऊपर परधान अधकारी बना देत आंव।”

⁴² तब फिरौन ने अपने हाथ सें अंगूठी काड़कें यूसुफ के हाथ में पैरा दई; और ऊहों मखमल के नोंने उन्‍ना पैरा दए, और ऊकी घींच में सोने की चैन डाल दई;

⁴³ और ऊहों अपने दूसरे रथ पै चढ़वाओ; और मान्‍सन ऊके आंगू-आंगू जा मुनादी करत चले कि “घुटनें टेककें दंडवत करो”, और ऊने ऊहों मिस्र के पूरे देस के ऊपर परधान अधकारी ठैराओ।

⁴⁴ फिन फिरौन ने यूसुफ सें कई, “फिरौन तौ मैं आंव; और पूरे देस में कोऊ भी तोरे हुकम के बगैर हाथ-पैर नें हिलाहै।”

⁴⁵ तब फिरौन ने यूसुफ कौ नाओं सापन-तपानेह रखो; और ओन मंदिर के याजक पोतीपेरा की मोंड़ी आसनत सें ऊकौ ब्‍याव करा दओ, और यूसुफ पूरे मिस्र देस में दौरा करन लगो।

⁴⁶ जब यूसुफ मिस्र के राजा फिरौन कौ परधान अधकारी ठैराओ, तब ऊ तीस साल कौ हतो। ऊ फिरौन के सामूं सें कड़कें पूरे मिस्र देस में दौरा करन लगो।

⁴⁷ अच्‍छे सात सालों में धरती खूब उपज देत रई,

⁴⁸ और यूसुफ उन सात साल में सब तरहां की भोजनबस्‍तें, जो मिस्र देस में होत हतीं, जमा करके नगरों में रखत गओ; और हरेक नगर की चारऊं कोद के खेतों की भोजनबस्‍तों हों ऊ ओई नगर में इकट्ठो करत गओ।

⁴⁹ ई तरहां यूसुफ ने अन्‍न हों समंदर की रेत के जैसो अन्‍न कौ भंडार करकें रखो, इतै लौ कि ऊने उनहों गिनबो छोड़ दओ कायसे बे अनगिनत हो गईं।

⁵⁰ अकाल के पहले साल आबे के पैलां यूसुफ के दो मोंड़ा, ओन मंदिर के याजक पोतीपेरा की मोंड़ी आसनत सें पैदा भए।

⁵¹ यूसुफ ने अपने जेठे मोंड़ा कौ नाओं जौ कहकें मनश्‍शे रखो, कि “यहोवा परमेसुर ने मोए सें मोरो पूरो दुख, और मोरे बाप कौ पूरो घराना भुला दओ आय।”

⁵² दूसरे कौ नाओं ऊने जौ कहकें एप्रैम रखो, कि “मोहों दुख भोगबे के देस में यहोवा परमेसुर ने फलवन्‍त करो आय।”

⁵³ मिस्र देस के अच्‍छे सात साल पूरे हो गए;

⁵⁴ और यूसुफ के कैबे के अनसार सात सालों के लाने अकाल सुरू हो गओ। सबरे देसों में अकाल पड़न लगो, परन्‍त पूरे मिस्र में अन्‍न हतो।

⁵⁵ जब मिस्र कौ पूरो देस भूंखो मरन लगो; तब परजा टेर-टेरकें फिरौन सें रोटी मांगन लगी; और ऊ सबरे मिस्रियों सें कैत रैत हतो, “यूसुफ के लिगां जाओ; और जो कछु ऊ तुम सें कए, ओई करो।”

⁵⁶ ई लाने जब अकाल पूरी पृथ्‍वी पै फैल गओ, और मिस्र देस में अकाल कौ रूप भयंकर हो गओ, तब यूसुफ सबरे भण्‍डारों हों खोल-खोलकें मिस्रियों के हाथ अन्‍न बेंचन लगो।

⁵⁷ ई लाने पूरी पृथ्‍वी के मान्‍सन मिस्र में अन्‍न खरीदबे के लाने यूसुफ के लिगां आन लगे, कायसे पूरी पृथ्‍वी पै भयंकर अकाल हतो।