- उत्पत्ति 40 - Bundeli Holy Bible

बन्‍दियों के सपनों कौ मतलब बताबो

¹ इन बातों के बाद एैसो भओ, कि मिस्र के राजा के पिलाबेवारे और पकाबेवारे ने अपने मालक के बिरुद्ध कछु अपराध करो।

² तब राजा फिरौन ने अपने दोई हाकमों, मतलब पिलाबेवारों के परधान और पकाबेवारों के परधान पै गुस्‍सा होकें,

³ उनहों बन्‍दी बनाकें अंगरक्‍छकों के परधान के घर के ओई जेलखाने में, जितै यूसुफ बन्‍दी हतो, डलवा दओ।

⁴ तब अंगरक्‍छकों के परधान ने उनहों यूसुफ के हाथ में सौंपो, और ऊ उनकी सेवा-टहल करन लगो; बे कछु दिना लौ जेलखाने में रए।

⁵ मिस्र के राजा कौ पिलाबेवारो और पकाबेवारो, जो जेलखाने में बन्‍द हते, उन दोई ने एकई रात में, अपने-अपने भविस्‍य में होबेवारे सपना हेरे।

⁶ भुन्‍सारे जब यूसुफ उनके लिगां भीतर गओ, तब उन पै नजर डाली तौ का हेरत आय कि बे उदास आंय।

⁷ ई लाने ऊने फिरौन के उन हाकमन सें, जो ऊके संगै ऊके मालक के घर के जेलखाने में हते, पूंछो, “आज तुमोंरों के मों काए लटके आंय?”

⁸ उनोंरन ने ऊसें कई, “हम दोई ने सपना हेरो आय, और उनके फल कौ बताबेवारो कोऊ भी नईंया।” यूसुफ ने उनसें कई, “का सपनों कौ फल कहबो यहोवा परमेसुर कौ काम नईंया? मोहों अपनो-अपनो सपना बताओ।”

⁹ तब पिलाबेवारों कौ परधान अपनो सपना यूसुफ हों एैसे बतान लगो: “मैंने सपने में हेरो कि मोरे सामूं एक दाख की बेल आय;

¹⁰ और ऊ दाख की बेल में तीन डालें आंय; और ऊमें मानो कलियां लगीं आंय, और बे फूली और ऊके गुच्‍छों में दाखें लगकें पक गईं।

¹¹ फिरौन कौ कटोरा मोरे हाथ में हतो; और मैंने उन दाखों हों लैकें फिरौन के कटोरा में निचोड़ो, और कटोरा हों फिरौन के हाथ में दओ।”

¹² तब यूसुफ ने उनसें कई, “ईकौ फल जौ आय: तीन डालियों कौ मतलब तीन दिना आंय;

¹³ ई लाने अब सें तीन दिना के भीतर फिरौन तोरी मूंड़ हों ऊंचो करहै, और फिन सें तोरे पद पै तोहों रखहै, और तें पैलां जैसो फिरौन कौ पिलाबेवारो होकें ऊकौ कटोरा ऊके हाथ में फिन दओ करहै।

¹⁴ सो जब तोरो भलो हो जाए तब मोहों याद करियो, और मोए पै किरपा करके फिरौन सें मोरी चरचा करियो, और ई घर सें मोहों छुड़वा दईयो।

¹⁵ कायसे सांचऊं में इब्रानियों के देस सें मोहों चुराकें लाओ गओ आय; और इतै भी मैंने कोऊ एैसो गलत काम नईं करो, जीके कारन मैं ई जेलखाने में डालो जाओं।”

¹⁶ जौ हेरकें कि ऊके सपने कौ फल अच्‍छो कड़ो, पकाबेवारों के परधान ने यूसुफ सें कई, “मैंने भी सपना हेरो आय, ऊ जौ आय: मैंने हेरो कि मोरी मूंड़ पै सफेद रोटी की तीन टुकनियां आंय;

¹⁷ और ऊपर की टुकनिया में फिरौन के लाने सब तरहां की पकी-पकाई बस्‍तें आंय; और चिरईयां मोरी मूंड़ पै की टुकनिया में सें उन बस्‍तों हों खा रईं आंय।”

¹⁸ यूसुफ ने कई, “ईकौ फल जौ आय: तीन टुकनियों कौ मतलब तीन दिना आंय।

¹⁹ अब सें तीन दिना के भीतर फिरौन तोरी मूंड़ कटवाकें तोहों एक पेड़ पै टंगवा दैहै, और पक्‍छी तोरो मांस नोंच-नोंचकें खाहें।”

²⁰ तीसरे दिना फिरौन कौ जनम दिन हतो, ऊने अपने सबरे करमचारियन हों भोज दओ, और उनमें सें पिलाबेवारों के परधान और पकाबेवारों के परधान दोई हों जेलखाने सें कड़वाओ।

²¹ पिलाबेवारों के परधान हों तौ पिलाबेवारे की जागां पै फिन सें रख दओ, और ऊ फिरौन के हाथ में कटोरो दैन लगो।

²² परन्‍त पकाबेवारों के परधान हों ऊने टंगवा दओ, जैसो कि यूसुफ ने उनके सपनों कौ फल उनसें कओ हतो।

²³ फिन भी पिलाबेवारों के परधान ने यूसुफ हों याद नें रखो; परन्‍त ऊहों भूल गओ।