- उत्पत्ति 39 - Bundeli Holy Bible

यूसुफ और पोतीपर की बईयर

¹ जब यूसुफ मिस्र में पठैओ गओ, तब पोतीपर नाओं एक मिस्री ने जौन राजा फिरौन कौ हाकम और अंगरक्‍छक कौ परधान हतो, ऊहों इश्‍माएलियों के हाथ सें, जो ऊहों उतै लै गए हते, खरीद लओ।

² यूसुफ अपने मिस्री मालक के घरै रैत हतो, और यहोवा परमेसुर ऊके संगै हतो ई लाने ऊ भाग्‍यवान मान्‍स हो गओ,

³ और यूसुफ के मालक ने हेरो कि यहोवा परमेसुर ऊके संगै रैत आय, और जो काम ऊ करत आय ऊहों यहोवा परमेसुर ऊके हाथ सें सफल कर देत आय।

⁴ तब ऊकी किरपादृस्‍टि ऊपै भई, और ऊ ऊकी सेवा-टहल करबे के लाने ठैराओ गओ; फिन ऊने ऊहों अपने घर कौ अधकारी बनाकें अपनो सब कछु ऊके हाथ में सौंप दओ।

⁵ जब सें यूसुफ हों अपने घर कौ और अपनी पूरी सम्‍पत्ति कौ अधकारी बनाओ, तब सें यहोवा परमेसुर यूसुफ के कारन ऊ मिस्री के घर पै आसीस दैन लगो; और का घर में, का मैंदना में, ऊकौ जो कछु हतो सब पै यहोवा परमेसुर की आसीस होन लगी।

⁶ ई लाने ऊने अपनो सब कछु यूसुफ के हाथ में इतै लौ छोड़ दओ कि अपने खाबे की रोटी हों छोड़, ऊ अपनी सम्‍पत्ति के बारे में कछु नें जानत हतो। यूसुफ सुन्‍दर और रूपवान हतो।

⁷ इन बातों के बाद एैसो भओ कि ऊके मालक की बईयर ने यूसुफ कोद अपनी आंख लगाई और कई, “मोरे संगै सो।”

⁸ परन्‍त ऊने मना करत भए अपने मालक की बईयर सें कई, “सुन, जो कछु ई घर में आय ऊ मोरे हाथ में आय; ऊहों मोरो मालक कछु नईं जानत, और ऊने अपनो सब कछु मोरे हाथ में सौंप दओ आय।

⁹ ई घर में मोए सें बड़ो कोऊ नईंया, और ऊने तोहों छोड़, जो ऊकी बईयर आय, मोए सें कछु नईं रख छोड़ो; ई लाने भला, मैं एैसी बड़ी दुस्‍टता करके यहोवा परमेसुर कौ अपराधी काए बनों?”

¹⁰ एैसो भओ कि बा हरएक दिना यूसुफ सें बातें करत रई, परन्‍त ऊने ऊकी नें मानी कि ऊके लिगां लेटे या ऊके संगै रए।

¹¹ एक दिना का भओ कि यूसुफ अपनो कामकाज करबे के लाने घर में गओ, और घर के सेवकों में सें कोऊ भी घर के अन्‍दर नें हतो।

¹² तब बा बईयर ने ऊकौ उन्‍ना पकड़कें कई, “मोरे संगै सो,” परन्‍त ऊ अपनो उन्‍ना ऊके हाथ में छोड़कें भगो और बायरें कड़ गओ।

¹³ जौ हेरकें कि ऊ अपनो उन्‍ना मोरे हाथ में छोड़कें बायरें भग गओ,

¹⁴ ऊ बईयर ने अपने घर के सेवकों हों टेरकें कई, “हेरो, ऊ एक इब्री मान्‍स हों हमाओ अपमान करबे के लाने हमाए लिगां ल्‍याओ आय। ऊ तौ मोरे संगै सोबे के लाने मोरे लिगां भीतरें आओ हतो, और मैं तेज आवाज में चिल्‍याई;

¹⁵ और मोरो चिल्‍याबो सुनकें ऊ अपनो उन्‍ना मोरे लिगां छोड़कें भगो, और बायरें कड़ गओ।”

¹⁶ बा ऊकौ उन्‍ना ऊके मालक के घर आबे लौ अपने लिगां रखे रई।

¹⁷ तब ऊने पोतीपर सें ई तरहां की बातें कईं, “ऊ इब्री दास जीहों तें हमाए लिगां ल्‍याओ आय, ऊ मोए सें हंसी ठिठोली करबे के लाने मोरे लिगां आओ हतो;

¹⁸ और जब मैं जोर सें चिल्‍याई, तब ऊ अपनो उन्‍ना मोरे लिगां छोड़कें बायरें भग गओ।”

¹⁹ अपनी बईयर की जे बातें सुनकें कि तोरे दास ने मोए सें एैसो काम करो, यूसुफ के मालक कौ गुस्‍सा भड़को।

²⁰ यूसुफ के मालक ने ऊहों पकड़कें जेलखाने में, जितै राजा के कैदी बंद हते, डलवा दओ; सो ऊ जेलखाने में रओ।

²¹ परन्‍त यहोवा परमेसुर यूसुफ के संगै-संगै रओ और ऊपै दया करी, और जेलखाने के दरोगा की किरपादृस्‍टि ऊपै भई।

²² ई लाने जेलखाने के दरोगा ने उन सब बंदियों हों, जो जेलखाने में हते, यूसुफ के हाथ में सौंप दओ; और जौन-जौन काम बे उतै करत हते, ऊके हुकम सें होत हतो।

²³ यूसुफ के बस में जो कछु हतो ऊमें सें जेलखाने के दरोगा हों कोऊ भी बस्‍त हेरबे नें पड़त हती; कायसे यहोवा परमेसुर यूसुफ के संगै हतो; और जो कछु ऊ करत हतो, यहोवा परमेसुर ऊहों ऊमें सफलता देत हतो।