- उत्पत्ति 38 - Bundeli Holy Bible

यहूदा और तामार

¹ उनईं दिना में एैसो भओ कि यहूदा अपने भईयों के लिगां सें चलो गओ, और हीरा नाओं एक अदुल्‍लामवासी मान्‍स के लिगां डेरा डालो।

² उतै यहूदा ने शूआ नाओं एक कनानी मान्‍स की मोंड़ी हों हेरो; और ऊसें ब्‍याव करके ऊके लिगां गओ।

³ बा गरभवती भई, और ऊहों एक मोंड़ा पैदा भओ; और यहूदा ने ऊकौ नाओं एर रखो।

⁴ बा फिन गरभवती भई, और ऊहों एक और मोंड़ा पैदा भओ, और ऊकौ नाओं ओनान रखो गओ।

⁵ फिन ऊहों एक और मोंड़ा पैदा भओ, और ऊकौ नाओं शेला रखो गओ; और जौन बेरा ईकौ जनम भओ ऊ बेरा यहूदा परिवार के संगै कजीब में रैत हतो।

⁶ यहूदा ने तामार नाओं एक बईयर सें अपने जेठे एर कौ ब्‍याव कर दओ।

⁷ परन्‍त यहूदा कौ ऊ जेठा एर यहोवा परमेसुर की नजर में दुस्‍ट हतो, ई लाने यहोवा परमेसुर ने ऊहों मार डालो।

⁸ तब यहूदा ने ओनान सें कई, “अपनी भौजाई के लिगां जा, और ऊके संगै देवर कौ धरम पूरो करके अपने भईया के लाने संतान पैदा कर।”

⁹ ओनान जानत हतो कि संतान मोरी नें ठैरहै; ई लाने एैसो भओ कि जब ऊ अपनी भौजाई के लिगां गओ, तब ऊने बीज हों धरती पै गिराकें नास करो, जीसें एैसो नें होए कि ऊके भईया के नाओं सें बंस चले।

¹⁰ जौ काम जो ऊने करो ऊसें यहोवा परमेसुर खुस नें भओ; और ऊने ऊहों भी मार डालो।

¹¹ तब यहूदा ने ई डर के मारें कि कहूं एैसो नें होए कि अपने भईयों के जैसो शेला भी मरे, अपनी बहू तामार सें कई, “जब लौ मोरो मोंड़ा शेला जवान नें हो जाए तब लौ अपने बाप के घर में बिधवा ही बैठी रै।” ई लाने तामार अपने बाप के घर में जाकें रैन लगी।

¹² बिलात बेरा के बीतबे पै यहूदा की बईयर जो शूआ की मोंड़ी हती, बा मर गई; फिन यहूदा शोक के दिना बीतबे पै अपने संगी हीरा अदुल्‍लामबासी समेंत अपनी गाड़र-छिरियों कौ ऊन करतबेवारों के लिगां तिम्‍ना हों गओ।

¹³ तामार हों जौ सन्‍देसो मिलो, “तोरो ससुर अपनी गाड़र-छिरियों कौ ऊन कतराबे के लाने तिम्‍ना हों जा रओ आय।”

¹⁴ तब ऊने हेरकें जौ सोचो कि शेला तौ जवान हो गओ परन्‍त मैं ऊकी बईयर नें हो पाई; अपने विधवापन के उन्‍ना हों उतारो और घूंघट डालकें अपने हों ढंक लओ, और एनैम नगर के फाटक के लिगां, जो तिम्‍ना की गैल में आय, जाकें बैठ गई।

¹⁵ जब यहूदा ने ऊहों हेरो, ऊहों ऊने बेस्‍या समझो; कायसे बा अपनो मों ढांपें भई हती।

¹⁶ बा गैल सें ऊकी कोद फिरो, और ऊसें कैन लगो, “मोहों अपने लिगां आन दे,” (कायसे ऊहों जौ पता नें हतो कि बा ऊकी बहू आय।) ऊने कई, “जदि मैं तोहों अपने लिगां आन देओं, तौ तें मोहों का दैहै?”

¹⁷ ऊने कई, “मैं अपनी छिरियों में सें छिरिया कौ एक बच्‍चा तोरे लिगां पठै दैहों।” तब ऊने कई, “भलो ऊके पठैबे के पैलां लौ का तें हमाए लिगां कछु गिरमी रख जैहै?”

¹⁸ ऊने पूंछो, “मैं तोरे लिगां का गिरमी रख जाओं?” ऊने कई, “अपनो बाजूबंद और ऊसें लगी भई मुहर, और अपने हाथ की लठिया।” तब ऊने ऊहों बे बस्‍तें दै दईं, और ऊके लिगां गओ, और बा ऊसें गरभवती भई।

¹⁹ तब बा उठकें चली गई, और अपनो घूंघट उठाकें अपनो बिधवापन कौ उन्‍ना फिन पैर लओ।

²⁰ तब यहूदा ने छिरिया कौ एक बच्‍चा अपने संगी अदुल्‍लामवासी के हाथ पठै दओ कि बे गिरमी रखी गईं बस्‍तें ऊ बईयर के हाथ सें छुड़ा ल्‍याए; परन्‍त बा बईयर ऊहों नें मिली।

²¹ तब ऊने उतै के मान्‍सन सें पूंछी, “बा देवदासी जो एनैम की गैल में एक कुदाईं बैठी हती, कितै आय?” उनोंरन ने कई, “इतै तौ कोऊ देवदासी नें हती।”

²² ई लाने ऊने यहूदा के लिगां लौटकें कई, “मोहों बा नईं मिली; और ऊ जागां के मान्‍सन ने कई, ‘इतै तौ कोऊ देवदासी नें हती’।”

²³ तब यहूदा ने कई, “अच्‍छो आय, बा बन्‍धक ओई के लिगां रैन दे, नईं तौ हमोंरें तुच्‍छ समझे जैहें; हेर, मैंने छिरिया कौ बच्‍चा पठै दओ हतो, परन्‍त बा तोहों नें मिली।”

²⁴ करीबन तीन मईना बाद यहूदा हों जौ सन्‍देसो मिलो, “तोरी बहू तामार ने बेस्‍यापन करो आय; बल्‍कि बा ऊसें गरभवती भी हो गई आय।” तब यहूदा ने कई, “ऊहों बायरें काड़ ल्‍याओ कि बा जलाई जाए।”

²⁵ जब ऊहों बायरें काड़ो जा रओ हतो तब ऊने अपने ससुर के लिगां जौ कैला पठैओ, “जौन मान्‍स की जे बस्‍तें आंय, ओई सें मैं गरभवती आंव,” फिन ऊने जौ भी कैलाओ, “चीन लेओ कि जौ बाजूबंद और ऊसें लगी भई मुहर और लठिया कौन की आंय।”

²⁶ यहूदा ने उनहों चीनकें कई, “बा तौ मोए सें ज़्यादा सच्ची आय; कायसे मैंने ऊहों अपने मोंड़ा शेला सें ब्‍याव नें करो।” ऊने ऊसें फिन कभऊं प्रसंग नें करो।

²⁷ जब ऊहों जनबे की बेरा आई, तब जौ पता चलो कि ऊके गरभ में जुड़वा बच्‍चे आंय।

²⁸ जब बा जन रई हती तब एक मोंड़ा कौ हाथ बायरें आओ, और दाई ने लाल डोरा लैकें जौ कैत भए ऊके हाथ में बांध दओ, “पैलां जौई पैदा भओ।”

²⁹ जब ऊने हाथ ऐंच लओ, तब ऊकौ भईया पैदा हो गओ। तब बा दाई ने कई, “तें काए जबरईं कड़ आओ आय!” ई लाने ऊकौ नाओं पेरेस रखो गओ।

³⁰ पाछें ऊकौ भईया जीके हाथ में लाल डोरा बंधो हतो पैदा भओ, और ऊकौ नाओं जेरह रखो गओ।