- उत्पत्ति 30 - Bundeli Holy Bible

¹ जब राहेल ने हेरो कि याकूब के लाने मोए सें कोऊ संतान पैदा नईं भई, तब बा अपनी बहन सें जलन लगी और याकूब सें कई, “मोहों भी संतान दे, नईं तौ मर जैहों!”

² तब याकूब ने राहेल सें गुस्‍सा होकें कई, “का मैं यहोवा परमेसुर आंव? तोरी कोख तौ ओई ने बन्‍द कर रखी आय।”

³ राहेल ने कई, “अच्‍छा, मोरी दासी बिल्‍हा हाजिर आय; ओई के लिगां जा, बा मोरे घुटनों पै जनहै, और ऊके द्वारा मोरो भी घर बसहै।”

⁴ तब ऊने ऊसें अपनी दासी बिल्‍हा हों दओ कि बा ऊकी बईयर होए; और याकूब ऊके लिगां गओ।

⁵ बिल्‍हा गरभवती भई और याकूब सें ऊहों एक मोंड़ा पैदा भओ।

⁶ तब राहेल ने कई, “यहोवा परमेसुर ने मोरो न्‍याय चुकाओ और मोरी सुनकें मोहों एक मोंड़ा दओ।” ई लाने ऊने ऊकौ नाओं दान रखो।

⁷ राहेल की दासी बिल्‍हा फिन गरभवती भई और याकूब सें एक मोंड़ा और पैदा भओ।

⁸ तब राहेल ने कई, “मैंने अपनी बहन के संगै बड़ी ताकत सें लिपटकें मल्‍लयुद्ध करो और अब जीत गई।” सो ऊने ऊकौ नाओं नप्‍ताली रखो।

⁹ जब लिआ ने हेरो कि मोहों बच्‍चा पैदा होबो बन्‍द हो गओ आय, तब ऊने अपनी दासी जिल्‍पा हों लैकें याकूब की बईयर होबे के लाने दै दओ।

¹⁰ लिआ की दासी जिल्‍पा सें याकूब हों एक मोंड़ा पैदा भओ।

¹¹ तब लिआ ने कई, “अहो भाग्‍य!” ई लाने ऊने ऊकौ नाओं गाद रखो।

¹² फिन लिआ की दासी जिल्‍पा सें याकूब हों एक और मोंड़ा पैदा भओ।

¹³ तब लिआ ने कई, “मैं धन्‍य आंव; पक्‍कौ बईयरें मोहों धन्‍य कैहें।” ई लाने ऊने ऊकौ नाओं आशेर रखो।

¹⁴ गेंहूं काटबे के दिनन में रूबेन हों मैंदना में दूदाफल मिले, और ऊ उनहों अपनी मताई लिआ के लिगां लै गओ। तब राहेल ने लिआ सें कई, “अपने मोंड़ा के दूदाफलों में सें कछु मोहों दे।”

¹⁵ ऊने ऊसें कई, “तेंने जो मोरे घरवारे हों लै लओ आय सो का छोटी बात आय? और अब का तें मोरे मोंड़ा के दूदाफल भी लैबो चाहत आय?” राहेल ने कई, “अच्‍छा, तोरे मोंड़ा के दूदाफलों के बदले ऊ आज रात हों तोरे संगै सोहै।”

¹⁶ संझा हों जब याकूब मैंदना सें आ रओ हतो, तब लिआ ऊसें मिलबे हों कड़ी, और कई, “तोहों मोरेई लिगां आने पड़है, कायसे मैंने अपने मोंड़ा के दूदाफल दैकें तोहों सांची में खरीद लओ।” तब ऊ रात हों ओई के संगै सोओ।

¹⁷ तब यहोवा परमेसुर ने लिआ की सुनी, और बा गरभवती भई और याकूब सें ऊहों पांचवों मोंड़ा पैदा भओ।

¹⁸ तब लिआ ने कई, “मैंने जो अपने घरवारे हों अपनी दासी दई, ई लाने यहोवा परमेसुर ने मोहों मोरी मजूरी दई आय।” ई लाने ऊने ऊकौ नाओं इस्‍साकार रखो।

¹⁹ लिआ फिन गरभवती भई और याकूब सें ऊहों छटवों मोंड़ा पैदा भओ।

²⁰ तब लिआ ने कई, “यहोवा परमेसुर ने मोहों अच्‍छो दान दओ आय; अबकी बेर मोरो घरवारो मोरे संगै बनो रैहै, कायसे मोहों ऊसें छै मोंड़ा पैदा हो चुके आंय।” ई लाने ऊने ऊकौ नाओं जबूलून रखो।

²¹ ईके बाद ऊकी एक मोंड़ी भी पैदा भई, और ऊने ऊकौ नाओं दीना रखो।

²² यहोवा परमेसुर ने राहेल की भी सुध लई, और ऊकी सुनकें ऊकी कोख खोली।

²³ ई लाने बा गरभवती भई और ऊहों एक मोंड़ा पैदा भओ, तब ऊने कई, “यहोवा परमेसुर ने मोरी नाओं धराई हों परे कर दओ आय।”

²⁴ ई लाने ऊने जौ कहकें ऊकौ नाओं यूसुफ रखो, “यहोवा परमेसुर मोहों एक मोंड़ा और भी दैहै।”

याकूब और लाबान के मजारें बिवाद

²⁵ जब राहेल सें यूसुफ पैदा भओ, तब याकूब ने लाबान सें कई, “मोहों बिदा कर कि मैं अपने देस और अपनी जागां हों जाओं।

²⁶ मोरी बईयरें और मोरे मोंड़ों, जिनके लाने मैंने तोरी सेवा करी आय, उनहों मोहों दे कि मैं चलो जाओं; तें तौ जानत आय कि मैंने तोरी कैसी सेवा करी आय।”

²⁷ लाबान ने ऊसें कई, “जदि तोरी नजर में मैंने किरपा पाई आय, तौ इतईं रै जा; कायसे मोहों समझ में आ गओ आय कि यहोवा परमेसुर ने मोहों तोरे कारन सें आसीस दई आय;

²⁸ तें अच्‍छे सें बता कि मैं तोए हों का देओं, और मैं ओई दैहों।”

²⁹ याकूब ने ऊसें कई, “तें जानत आय कि मैंने तोरी कैसी सेवा करी आय, और तोरे पसु मोरे लिगां की तरहां सें रए।

³⁰ मोरे आबे सें पैलां बे कितेक हते, और अब कितेक हो गए आंय; और यहोवा परमेसुर ने मोरे आबे पै तोहों आसीस दई आय। परन्‍त मैं अपने घर कौ काम कबै कर पाहों?”

³¹ ऊने फिन कई, “मैं तोहों का देओं?” याकूब ने कई, “तें मोहों कछु नें दे; जदि तें मोरे लाने एक काम करे, तौ मैं फिन तोरी गाड़र-छिरियों हों चराहों, और उनकी रक्‍छा करहों।

³² मैं आज तोरी सबरी गाड़र-छिरियों के मजारें होकें कड़हों, और जो गाड़र या छिरिया चितकबरी या चित्तेवारी होए, और जो गाड़र करिया होए, और जो छिरिया चितकबरी और चित्तेवारी होए, उनहों मैं अलग करके रखहों; और मोरी मजूरी में बेई ठैरहें।

³³ जब आगूं हों मजूरी की चरचा तोरे सामूं चलै, तब धरम की जाई गवाही हुईये; मतलब छिरियों में सें नें कोऊ चित्तेवारी नें चितकबरी होए, और गाड़रों में सें जो कोऊ करिया नें होए, जदि मोरे लिगां कड़ें तौ बे भड़याई की ठैरहें।”

³⁴ तब लाबान ने कई, “तोरे कैबे के अनसार होए।”

³⁵ सो ऊने ओई दिना सबरीं धारीवारे और चितकबरे बुकरों, और सबरी चित्तीवारी और चितकबरी छिरियों हों, मतलब जिनमें कछु उजलोपन हतो, उनहों और सबरी करिया गाड़रों हों भी न्‍यारो करके अपने मोंड़ों के हाथ में सौंप दओ;

³⁶ और ऊने अपने और याकूब के मजारें तीन दिना की गैल कौ अन्‍तर ठैराओ; और याकूब लाबान की गाड़र-छिरियों हों चरान लगो।

³⁷ तब याकूब ने चिनार, बादाम और अर्मोन पेड़ों की हरीरी-हरीरी बुदरियां लैकें, उनके छिलका कहूं-कहूं छीलकें, उनहों धारीदार बना दओ, एैसी कि उन बुदरियों की सफेदी दिखाई दैन लगे।

³⁸ तब छीली भई बुदरियों हों गाड़र-छिरियों के सामूं उनके पानूं पीबे के कठोतियों में ठांड़ो करो; और जब बे पानूं पीबे के लाने आईं तब ज्ञाबन हो गईं।

³⁹ बुदरियों के सामूं ज्ञाबन होकें, गाड़र-छिरियां धारीवारे, चित्तीदार और चितकबरे बच्‍चे जनीं।

⁴⁰ तब याकूब ने गाड़रों के बच्‍चों हों अलग-अलग करो, और लाबान की गाड़र-छिरियों के मों हों चित्तीवारे और सबरे करिया बच्‍चों की कोद कर दओ; और अपने झुंड़ों हों उनसें अलग रखो, और लाबान की गाड़र-छिरियों सें मिलबे नें दओ।

⁴¹ जब-जब तगड़ी गाड़र-छिरियां ज्ञाबन होत हतीं, तब-तब याकूब उन बुदरियों हों कठौतियों में उनके सामूं रख देत हतो; जीसें बे बुदरियों हों हेरत भई ज्ञाबन हो जाएं।

⁴² परन्‍त जब कमजोर गाड़र-छिरियां ज्ञाबन होत हतीं, तब ऊ उनहों उनके आंगू नें रखत हतो। ईसें कमजोर-कमजोर लाबान की रईं, और तगड़ी-तगड़ी याकूब की हो गईं।

⁴³ ई तरहां याकूब बेजा पईसावारो हो गओ, और ऊके लिगां मुतकी गाड़र-छिरियां, दासियां और दास, ऊंट और गधे हो गए।