- उत्पत्ति 3 - Bundeli Holy Bible

पाप की सुरूआत

¹ यहोवा परमेसुर ने जितेक बनैले पसु बनाए हते, उन सब में सांप चतुर हतो; ऊने बईयर सें कई, “का सांची आय कि यहोवा परमेसुर ने कई, ‘तुम ई बगिया के कौनऊं पेड़ कौ फल नें खईयो?’”

² बईयर नें सांप सें कई, “ई बगिया के पेड़ों के फल हम खा सकत आंय;

³ परन्‍त जो पेड़ बगिया के मजारें आय, ऊके फल के बारे में यहोवा परमेसुर ने कई आय कि नें तौ तुम ऊहों खईयो और नें ऊहों छुईयो, नईं तौ मर जैहौ।”

⁴ तब सांप ने बईयर सें कई, “तुम पक्‍कौ नें मरहौ!

⁵ बल्‍कि यहोवा परमेसुर खुद जानत आय कि जी दिना तुम ऊकौ फल खाहौ ओई दिना तुमाई आंखें खुल जैहें, और तुम अच्‍छे बुरय कौ ज्ञान पाकें यहोवा परमेसुर के बरोबर हो जैहौ।”

⁶ सो जब बईयर ने हेरो कि ऊ पेड़ कौ फल खाबे में नोंनो, और हेरबे में मन हों भाबेवारो, और बुद्धि दैबे के लाने सोई बढ़िया आय; तब ऊने ऊहों तोड़कें खा लओ, और अपने घरवारे हों भी दओ, और ऊने सोई खाओ।

⁷ तब उन दोई की आंखें खुल गईं, और उनहों पता पड़ो कि बे नंगे आंय; ई लाने उनोंरन ने अंजीर के पत्ता जोड़ जोड़कें लंगोट बना लए।

⁸ तब यहोवा परमेसुर के निंगबे की आवाज़, जो दिन में जूड़े की बेरा बगिया में घूमत हतो, उनहों सुनाई दई। तब आदम और ऊकी बईयर बगिया के पेड़ों के मजारें यहोवा परमेसुर सें छिप गए।

⁹ तब यहोवा परमेसुर ने टेरकें आदम सें पूंछी, “तें कितै आय?”

¹⁰ आदम ने कई, “मैं तोरे निंगबे की आवाज बागिया में सुनकें डर गओ, कायसे मैं नंगो हतो; ई लाने छिप गओ।”

¹¹ यहोवा परमेसुर ने कई, “कीने तोए बताओ कि तें नंगो आय? जौन पेड़ कौ फल खाबे हों मैंने तोहों मना करो हतो, का तेंने ऊकौ फल खाओ आय?”

¹² आदम ने कई, “जो बईयर तेंने मोरे संगै रहबे हों दई आय ओई ने मोहों ऊ पेड़ कौ फल दओ, और मैंने खाओ।”

¹³ तब यहोवा परमेसुर ने बईयर सें कई, “तेंने जौ का करो आय?” बईयर ने कई, “सांप ने मोए बहका दओ, तब मैंने खाओ।”

यहोवा परमेसुर कौ न्‍याय

¹⁴ तब यहोवा परमेसुर ने सांप सें कई: “तेंने जो करो आय ई लाने तें सबरे घरेलू पसुओं, और सबरे बनैले पसुओं सें ज्‍यादा स्रापित आय; तें पेट के बल निंगहै, और जीवन भर माटी चाटत रैहै।

¹⁵ मैं तोरे और ई बईयर के मजारें, और तोरे बंस और ईके बंस के मजारें बैर पैदा कराहों; ऊ तोरी मूंड़ हों कुचल डालहै, और तें ऊकी ऐड़ी हों डसहै।”

¹⁶ फिन यहोवा परमेसुर ने बईयर सें कई: “मैं तोरी पीड़ा और तोरे गरभवती होबे के कस्ट हों बेजा बढ़ाहों; तें बेजा पीड़ित होकें बच्‍चा पैदा करहै; फिन भी तोरी लालसा तोरे घरवारे के लाने हुईये, और ऊ तोए पै राज करहै।”

¹⁷ यहोवा परमेसुर ने आदम सें कई: “तेंने जो अपनी घरवारी की बात सुनी, और जौन पेड़ के फल के बारे में मैंने तोए हुकम दओ हतो कि तें ऊहों नें खईयो, ऊहों तेंने खाओ आय ई लाने धरती तोरे कारन स्रापित आय। तें ऊकी उपज जीवन भर कस्‍ट के संगै खाए करहै;

¹⁸ और बा तोरे लाने कांटे और ऊंटकटारे उगाहै, और तें खेत की उपज खाहै;

¹⁹ और अपने माथे सें पसीने की रोटी खाए करहै, और आखिर में माटी में मिल जैहै कायसे तें ओई में सें काड़ो गओ आय; तें माटी तो आय और माटी मेंई मिल जैहै।”

²⁰ आदम ने अपनी घरवारी कौ नाओं हव्‍वा रखो; कायसे जितेक मान्‍सन जिन्‍दा आंय उन सब की आदिमाता ओई भई।

²¹ यहोवा परमेसुर ने आदम और ऊकी घरवारी के लाने चमड़ा के उन्‍ना बनाकें उनहों पैरा दए।

बगिया सें काड़ो जाबो

²² फिन यहोवा परमेसुर ने कई, “मान्‍स अच्‍छे बुरए कौ ज्ञान पाकें हम में सें एक के जैसो हो गओ आय: ई लाने अब एैसो नें होए कि ऊ हाथ बढ़ाकें जीवन के पेड़ कौ फल भी तोड़कें खा ले और सदा लौ जियत रए।”

²³ ई लाने यहोवा परमेसुर ने ऊहों अदन की बगिया में सें काड़ दओ कि ऊ ओई धरती पै खेतीबारी करे जीमें सें ऊ बनाओ गओ हतो।

²⁴ ई लाने आदम हों ऊने उतै सें काड़ दओ और जीवन के पेड़ की गैल कौ पहरा दैबे के लाने अदन की बगिया के पूरब कोद करूबों हों, और चारऊं कुदाईं घूमबेवारी आग सें भरी तलवार हों सोई तैनात कर दओ।