- उत्पत्ति 21 - Bundeli Holy Bible

इसहाक कौ जनम

¹ यहोवा परमेसुर ने जैसी कई हती बैसई सारा की सुध लैकें ऊके संगै अपने बचन के अनसार करो।

² सारा अब्राहम सें गरभवती भई; और ऊके बुढ़ापे में ओई ठैराई गई बेरा में जो यहोवा परमेसुर ने ऊसें ठैराओ हतो, एक मोंड़ा पैदा भओ।

³ अब्राहम ने अपने ऊ मोंड़ा कौ नाओं जो सारा सें पैदा भओ हतो इसहाक रखो।

⁴ जब ऊकौ मोंड़ा इसहाक आठ दिना कौ भओ, तब ऊने यहोवा परमेसुर के हुकम अनसार ऊकौ खतना करो।

⁵ जब अब्राहम कौ मोंड़ा इसहाक पैदा भओ, तब अब्राहम सौ साल कौ हतो।

⁶ सारा ने कई, “यहोवा परमेसुर ने मोहों जौन बरदान दओ; ई लाने सबरे सुनबेवारे भी मोरे संगै बेजा खुस हुईयें।”

⁷ फिन ऊने जा भी कई, “का कोऊ कभऊं अब्राहम सें कै सकत हतो कि सारा मोंड़ा हों दूध पिलाहै? परन्‍त हेरो, मोए सें ऊके बुढ़ापे में एक मोंड़ा पैदा भओ।”

⁸ ऊ मोंड़ा बड़ो भओ और ऊकौ दूध छुड़ाओ गओ; और इसहाक के दूध छुड़ाबे के दिना अब्राहम ने बड़ी जेवनार करी।

हाजिरा और इश्‍माएल कौ काड़ो जाबो

⁹ तब सारा हों मिस्री हाजिरा कौ मोंड़ा, जो अब्राहम सें पैदा भओ हतो, हंसी उड़ात भओ दिखाई दओ।

¹⁰ ई कारन ऊने अब्राहम सें कई, “ई बंधुआ दासी हों ऊके मोंड़ा समेंत काड़ दे; कायसे ई बंधुआ दासी कौ मोंड़ा मोरे मोंड़ा इसहाक के संगै हिस्सेदार नें हुईये।”

¹¹ जा बात अब्राहम हों अपने मोंड़ा के कारन बेजा बुरी लगी।

¹² परन्‍त यहोवा परमेसुर ने अब्राहम सें कई, “ऊ मोंड़ा और अपनी बंधुआ दासी के कारन तोहों बुरओ ने लगे; जो बात सारा तोए सें कए, ऊहों मान, कायसे जो तोरो बंस कहलाहै ऊ इसहाक ही सें चलहै।

¹³ बंधुआ दासी के मोंड़ा सें भी मैं एक जाति पैदा करहों, ई लाने कि ऊ तोरो बंस आय।”

¹⁴ ई लाने अब्राहम ने भुन्‍सारे उठकें रोटी और पानूं सें भरो चमड़े कौ थैला भी हाजिरा हों दओ, और ऊके कन्‍धे पै धरो, और ऊके मोंड़ा हों भी ऊहों दैकें बिदा करो। सो बा चली गई, और बेशेर्बा के जंगल में भटकन लगी।

¹⁵ जब थैला कौ पानूं बड़ा गओ, तब ऊने मोंड़ा हों एक जरिया के खालें छोड़ दओ।

¹⁶ बा ऊसें तनक सी दूरी पै ऊके सामूं जा सोचकें बैठ गई, “कि मोए हों मोंड़ा की मौत नें हेरने पड़े।” तब बा ऊतै बैठकें चिल्‍या चिल्‍याकें रोन लगी।

¹⁷ यहोवा परमेसुर ने ऊ मोंड़ा की सुनी; और ऊके दूत ने सरग सें हाजिरा हों टेरकें कई, “हे हाजिरा, तोहों का भओ? नें डर; कायसे जितै तोरो मोंड़ा आय उतै सें ऊकी आवाज यहोवा परमेसुर ने सुन लई आय।

¹⁸ उठ, अपने मोंड़ा हों उठा और अपने हाथ सें सम्‍भाल; कायसे मैं ऊसें एक बड़ी जाति बनाहों।”

¹⁹ तब यहोवा परमेसुर ने ऊकी आंखें खोल दईं, और ऊहों एक कुआं दिखाई पड़ो; सो ऊने जाकें थैलिया हों पानूं सें भरकें मोंड़ा हों पिलाओ।

²⁰ यहोवा परमेसुर ऊ मोंड़ा के संगै रओ; और जब ऊ बड़ो भओ, तब जंगल में रैत-रैत धनुस चलाबेवारो बन गओ।

²¹ ऊ पारान नाओं जंगल में रैत हतो; और ऊकी मताई ने ऊके लाने मिस्र देस सें एक बईयर मंगवाई।

अब्राहम और अबीमेलेक के मजारें सन्‍धि

²² उन दिनों में एैसो भओ कि अबीमेलेक अपने सेनापति पीकोल हों संगै लैकें अब्राहम सें कैन लगो, “जो कछु तें करत आय ऊमें यहोवा परमेसुर तोरे संगै रैत आय;

²³ ई लाने अब मोए सें ई बारे में यहोवा परमेसुर की कौल खा कि तें नें तौ मोए सें छल करहै और नें कभऊं मोरे बंस सें करहै, परन्‍त जैसी करुना मैंने तोए पै करी आय, बैसई तें मोए पै और ई देस पै भी, जीमें तें डेरा डाल के रैत आय, करहै।”

²⁴ अब्राहम ने कई, “मैं कौल खात आंव।”

²⁵ तब अब्राहम ने अबीमेलेक हों एक कुआं के बारे में जो अबीमेलेक के दासों ने जबरईं लै लओ हतो, उलाहना दई।

²⁶ तब अबीमेलेक ने कई, “मैं नईं जानत कि कीने जौ काम करो; और तेंने भी मोहों नईं बताओ, और नें मैंने आज सें पैलां ईके बारे में कछु सुनो।”

²⁷ तब अब्राहम ने गाड़र-छिरियां और गईया-बैला अबीमेलेक हों दए; और उन दोई ने आपस में सन्‍धि करी।

²⁸ अब्राहम ने गाड़र की सात बच्‍ची अलग कर रखीं।

²⁹ तब अबीमेलेक ने अब्राहम सें पूंछो, “इन सात बच्‍चियों हों, जो तेंने अलग कर रखी आंय, का मतलब आय?”

³⁰ ऊने कई, “तें इन सात बच्‍चियों हों ई बात की गवाही जानकें मोरे हाथ सें ले कि मैंने जौ कुआं खोदो आय।”

³¹ उन दोई ने जो ऊ जागां में आपस में कौल खाई, ऐई कारन सें ऊकौ नाओं बेशेर्बा पड़ो।

³² जब उनोंरन ने बेशेर्बा में आपस में सन्‍धि करी, तब अबीमेलेक और ऊकौ सेनापति पीकोल उठकें पलिश्‍तियों के देस में लौट गए।

³³ फिन अब्राहम ने बेशेर्बा में झाऊ कौ एक पेड़ लगाओ और उतै यहोवा परमेसुर सें जो अनन्‍तकाल कौ यहोवा परमेसुर आय, बिन्‍तवाई करी।

³⁴ अब्राहम पलिश्‍तियों के देस में मुतके दिना लौ परदेसी होकें रओ।