- उत्पत्ति 19 - Bundeli Holy Bible

सदोम की दुस्‍टता

¹ संझा हों बे दो दूत सदोम के लिगां आए; और लूत सदोम के फाटक के लिगां बैठो हतो। उनहों हेरकें ऊ उनसें मिलबे के लाने उठो, और मों के बल झुककें दंडवत करके कई,

² “हे मोरे स्‍वामियो, अपने दास के घरै पधारो, और रात भर आराम करियो, और अपने गोड़े धो लईयो, फिन भुन्‍सारे उठकें अपनी गैल हों चले जईयो।” उनोंरन ने कई, “नईं; हम चौगड्डा मेंई रात बिताहें।”

³ परन्‍त ऊने बहुतई बिनती करके उनहों मनाओ; ई लाने बे ऊके संगै चलकें ऊके घरै आए; और ऊने उनके लाने भोजन तईयार करो, और बिना खमीर की रोटियां बनाकें उनहों खिलाईं।

⁴ उनके सो जाबे सें पैलां, सदोम नगर के मान्‍सन ने, जवानों सें लैके बूढ़ों लौ, बल्‍कि चारऊं कोद के सबरे मान्‍सन ने आकें ऊ घर हों घेर लओ;

⁵ और लूत हों टेरकें कैन लगे, “जो मान्‍स आज रात हों तोरे लिगां आएहें बे कितै आंय? उनहों हमाए लिगां बायरें ल्‍या कि हम उनसें भोग करें।”

⁶ तब लूत उनके लिगां दोरे के बायरें गओ, और किबाड़ हों अपने पाछें बन्‍द करकें कई,

⁷ “हे मोरे भईया हरौ, एैसी बुराई नें करो।

⁸ सुनो, मोरी दो मोंड़ियां आंय जो अबै कुंवारी आंय; इच्‍छा होए तौ मैं उनहों तुमाए लिगां बायरें ल्‍याओं, और तुमें जैसो नोंनो लगे बैसई ब्‍योहार उनसें करो; परन्‍त इन मान्‍सन सें कछु नें करो; कायसे जे मोरी छत के खालें आएहें।”

⁹ उनोंरन ने कई, “परे हट!” फिन बे कैन लगे, “तें एक परदेसी होकें इतै रैबे के लाने आओ, परन्‍त अब न्‍यायी भी बन बैठो आय; ई लाने अब हम उनसें भी ज्‍यादा तोरे संगै बुरो करहें।” बे ऊ मान्‍स लूत हों बहुतई दबान लगे, और किवाड़ तोड़बे के लाने लिगां आए।

¹⁰ तब उन पाहुनों ने हाथ बढ़ाकें लूत हों अपने लिगां घर में खेंच लओ, और किबाड़ हों बन्‍द कर दओ।

¹¹ उनोंरन ने का छोटे, का बड़े, सबरे मान्‍सन हों जो घर के दोरे पै हते, अन्‍धो कर दओ, सो बे दरवाजों हों टटोलत-टटोलत थक गए।

लूत कौ सदोम सें कड़बो

¹² फिन उन पाहुनों ने लूत सें पूंछो, “इतै, तोरो और को-को आय? दामाद, मोंड़ा, मोंड़ियां, और नगर में तोरो जो कोऊ होए, उन सब हों लैकें ई जागां सें कड़ जा।

¹³ कायसे हम ई जागां हों नास करबे पै आंय, ई लाने कि ईकी दुहाई यहोवा परमेसुर के सामूं बढ़ गई आय; और यहोवा परमेसुर ने हमें ईके सत्‍यानास करबे के लाने पठैव आय।”

¹⁴ तब लूत ने कड़कें अपने दामादों हों, जिनके संगै ऊकी मोंड़ियों की पक्‍यात हो गई हती, समझा बुझाकें कई, “उठो, ई जागां सें कड़ चलो; कायसे यहोवा परमेसुर ई नगर हों नास करबे पै आय।” परन्‍त ऊ अपने दमादों की नजर में ठट्ठा करबेवारो जान पड़ो।

¹⁵ जब भुन्‍सारो होन लगो, तब दूतों ने लूत सें उलात करबे हों कई, “उठ, अपनी बईयर और दोई मोंड़ियों हों जो इतै आंय लै जा; नईं तौ तें भी ई नगर के अधरम में भसम हो जैहै।”

¹⁶ परन्‍त ऊ अबेर करत रओ; ईसें उन मान्‍सन ने ऊकौ और ऊकी बईयर, और दोई मोंड़ियों के हाथ पकड़े, कायसे यहोवा परमेसुर की दया ऊपै हती; और उनहों काड़कें नगर के बायरें कर दओ।

¹⁷ एैसो भओ कि जब उनोंरन ने उनहों बायरें काड़ो, तब कई, “अपने प्रान बचाकें गदबद लगा; पाछें कुदाऊं नें तकियो, और तराई भर में नें ठैरियो; ऊ पहड़वा पै भग जईयो, नईं तौ तें भी भसम हो जैहै।”

¹⁸ लूत ने उनसें कई, “हे मोरे स्‍वामियो, एैसो नें करौ!

¹⁹ हेर, तोरे दास पै तोरी किरपादृस्‍टि भई आय, और तेंने ईमें बड़ी किरपा दिखाई कि मोरे प्रान हों बचाओ आय; परन्‍त मैं पहड़वा पै गदबद नईं दे सकत, कऊं एैसो नें होए कि कोऊ बिपदा मोए पै आन पड़े, और मैं मर जाओं।

²⁰ हेर, ऊ नगर इतेक लिगां आय कि मैं उतै गदबद दै सकत आंव, और ऊ छोटो भी आय। मोहों उतईं गदबद लगान दे, का ऊ नगर छोटो नईंया? और मोरो प्रान बच जैहै।”

²¹ ऊने ऊसें कई, “हेर, मैंने ई बारे में भी तोरी बिनती मान लई आय, कि जौन नगर की चरचा तेंने करी आय, ऊहों मैं नास नें करहों।

²² जल्‍दी सें उतै गदबद लगा; कायसे जब लौ तें उतै नें पहुंचे, तब लौ मैं कछु भी नें कर पाहों।” ऐई कारन ऊ नगर कौ नाओं सोअर पड़ो।

सदोम और अमोरा कौ बिनास

²³ लूत के सोअर के लिगां पोंचतई सूरज पृथ्‍वी पै ऊग आओ।

²⁴ तब यहोवा परमेसुर ने अपनी कोद सें सदोम और अमोरा पै आकास सें गन्‍धक और आगी बरसाई;

²⁵ और उन नगरों हों और पूरी तराई हों, और नगरों के सबरे रैबेवारों हों, धरती की सबरी उपज समेंत नास कर दओ।

²⁶ लूत की बईयर ने जो ऊके पाछें हती पलटकें पाछें कुदाऊं हेरो, और बा नोंन कौ खम्‍बा बन गई।

²⁷ भुन्‍सारे अब्राहम उठकें ऊ जागां हों गओ, जितै ऊ यहोवा परमेसुर के सामूं ठांड़ो हतो;

²⁸ और सदोम और अमोरा, और ऊ तराई के सबरे देस कुदाऊं आंख उठाकें का हेरो कि ऊ देस में सें धधकत भई भट्टी जैसो धुआं उठ रओ आय।

²⁹ एैसो भओ कि जब यहोवा परमेसुर ने ऊ तराई के नगरों हों, जिनमें लूत रैत हतो, उलट-पुलटकें नास करो, तब ऊने अब्राहम हों याद करकें लूत हों ऊ घटना सें बचा लओ।

मोआबियों और अम्‍मोनियों की उत्‍पत्ति

³⁰ फिन लूत ने सोअर छोड़ दओ, और पहड़वा पै अपनी दोई मोंड़ियों समेंत रैन लगो; कायसे ऊ सोअर में रैबे सें डरत हतो; ई लाने ऊ और ऊकी दोई मोंड़ियां उतै एक गुफा में रैन लगे।

³¹ तब जेठी मोंड़ी ने लौरी सें कई, “हमाओ बाप बूढ़ो आय, और पृथ्‍वी भर में कोऊ एैसो मान्‍स नईंया जो संसार की रीत के अनसार हमाए लिगां आए।

³² ई लाने आओ, हम अपने बाप हों दाखमधु पिलाकें ऊके संगै सोएं, जीसें हम अपने बाप के बंस हों बचाए रखें।”

³³ सो उनोंरन ने ओई दिना रात की बेरा अपने बाप हों दाखमधु पिलाओ, तब जेठी मोंड़ी जाकें अपने बाप के लिगां लेट गई; परन्‍त ऊ नें जान पाओ कि बा कबै लेटी और कबै उठ गई।

³⁴ एैसो भओ कि दूसरे दिना जेठी ने लौरी सें कई, “हेर, कल रात मैं अपने बाप के संगै सोई; ई लाने आज भी रात हों हम ऊहों दाखमधु पिलाएं; तब तें जाकें ऊके संगै लेट जईयो कि हम अपने बाप के द्वारा बंस पैदा करें।”

³⁵ सो उनोंरन ने ऊ दिना सोई रात की बेरा अपने बाप हों दाखमधु पिलाओ; और लौरी मोंड़ी जाकें ऊके लिगां लेट गई, परन्‍त ऊहों, ऊके सोई लेटबे और उठबे की बेरा कौ पता नें हतो।

³⁶ ई तरहां सें लूत की दोई मोंड़ियां अपने बाप सें गरभवती भईं।

³⁷ जेठी के एक मोंड़ा पैदा भओ; और ऊकौ नाओं मोआब रखो; ऊ मोआब नाओं जाति कौ जो आज लौ मूल बाप आय।

³⁸ लौरी कौ भी एक मोंड़ा भओ, और ऊकौ नाओं बेनम्‍मी रखो, ऊ अम्‍मोनबंसियों कौ जो आज लौ मूलबाप आय।