- उत्पत्ति 18 - Bundeli Holy Bible

इसहाक के जनम की प्रतिज्ञा

¹ जब अब्राहम, मम्रे के तारपीन के पेड़ों के मजारें कर्रे घाम की बेरा तम्‍बू के दोरे पै बैठो भओ हतो, तब यहोवा परमेसुर उते परगट भओ:

² ऊने आंख उठाकें नजर करी तौ का हेरो कि तीन मान्‍स ऊके सामूं ठांड़े आंय। जब ऊने उनहों हेरो तब ऊ उनसें मिलबे के लाने तम्‍बू के दोरे सें दौड़ो, और जमीन पै गिरकें दंडवत करो,

³ और कैन लगो, “हे पिरभु, जदि मोए पै तोरी किरपा की नजर आय तौ मैं बिनती करत आंव कि अपने दास के लिगां सें चले नें जईयो।

⁴ मैं थोड़ो सो पानूं लात आंव, और आप औरें गोड़े धोकें ई पेड़ के तरें आराम करें।

⁵ फिन मैं एक टुकड़ा रोटी कौ ल्‍याओं, और ओई सें आप अपने जीव हों तृप्‍त करें, तब ऊके बाद आंगू बढ़ें; कायसे आप अपने दास के लिगां आए आव।” उनोंरन ने कई, “जैसो तें कैत आय बैसई कर।”

⁶ तब अब्राहम उलात तम्‍बू में सारा के लिगां गओ और कई, “मुतको मैदा जल्‍दी सें गूंथ, और ऊके फुलके बना।”

⁷ फिन अब्राहम गईया-बैला के झुंड में दौड़ो और एक कोमल और नोंनो बछेरू लैकें अपने सेवक हों दओ और ऊने जल्‍दी सें ऊहों पकाओ।

⁸ तब ऊने दही, दूध और ऊ बछेरू कौ मांस, जो ऊने पकवाओ हतो, लैकें उनके आंगू परोस दओ; और खुद पेड़ के तरें उनके लिगां ठांड़ो रओ, और बे खान लगे।

⁹ उनोंरन ने ऊसें पूंछो, “तोरी घरवारी सारा कितै आय?” ऊने कई, “बा तौ तम्‍बू में आय।”

¹⁰ यहोवा परमेसुर ने कई, “मैं बसन्‍त ऋतु में पक्‍कौ तोरे लिगां फिन आहों, और तोरी घरवारी सारा लौ एक मोंड़ा हुईये।” सारा तम्‍बू के दोरे पै जो अब्राहम के पाछें हतो, सुन रई हती।

¹¹ अब्राहम और सारा दोई मुतके बूढ़े हो गए हते; और सारा कौ मासिक धरम बंद हो गओ हतो।

¹² ई लाने सारा मनई मन हंसकें कैन लगी, “मैं तौ बुढ़ा गई आंव, और मोरो घरवारो सोई बूढ़ो आय, तौ का मोहों जौ सुख हुईये?”

¹³ तब यहोवा परमेसुर ने अब्राहम सें कई, “सारा जा कहकें काय हंसी कि का मोरो, जो इतनी बूढ़ी हो गई आंव, सांचऊं एक मोंड़ा पैदा हुईये?

¹⁴ का यहोवा परमेसुर के लाने कोऊ काम कठन आय? ठीक बेरा पै, मतलब बसंत ऋतु में, मैं तोरे लिगां फिन आहों, और सारा लौ एक मोंड़ा हुईये।”

¹⁵ तब सारा डर के मारे जा कहकें मुकर गई, “मैं नईं हंसी।” ऊने कई, “नईं; तें हंसी तौ हती।”

सदोम बगैरह नगरों के बिनास कौ बर्णन

¹⁶ फिन बे मान्‍स ऊतै सें चले और सदोम कुदाऊं नजर करी; और अब्राहम उनहों बिदा करबे के लाने उनके संगै-संगै चलो।

¹⁷ तब यहोवा परमेसुर ने कई, “जो मैं करत आंव, ऊहों का अब्राहम सें छिपा रखों?

¹⁸ अब्राहम सें तौ पक्‍कौ एक बड़ी और सामर्थी जाति उपजहै, और पृथ्‍वी की सबरी जातियां अब्राहम सें आसीस पाहें।

¹⁹ कायसे मैं जानत आंव कि ऊ अपने मोंड़ों और परिवार हों, जो ऊके पाछें रै जैहें, हुकम दैहै कि बे यहोवा परमेसुर की गैल में अटल बने रएं, और धरम और न्‍याय करत रएं; जीसें कि जो कछु यहोवा परमेसुर ने अब्राहम के बारे में कई आय ऊहों पूरो करे।”

²⁰ फिन यहोवा परमेसुर ने कई, “सदोम और अमोरा वारों की दुहाई बढ़ गई आय, और उनकौ पाप बेजा भारी हो गओ आय;

²¹ ई लाने मैं उतरकें तकहों कि जैसी दुहाई मोरे कान लौ पोंची आय, उनोंरन ने ठीक बैसई काम करो आय कि नईं; और नें करो होए तौ मैं ऊहों जान लैहों।”

²² तब बे मान्‍सन उतै सें मुड़कें सदोम कुदाऊं चलन लगे; परन्‍त अब्राहम, यहोवा परमेसुर के आंगू ठांड़ो रै गओ।

²³ तब अब्राहम ऊके लिगां जाकें कैन लगो, “का तें सांची में दुस्‍ट के संगै धरमी हों भी नास करहै?

²⁴ जदि ऊ नगर में पचास धरमी होएं; तौ का तें सांची में ऊ जागां हों नास करहै और उन पचास धरमियन के कारन जो ऊमें होएं, नें छोड़है?

²⁵ ई तरहां कौ काम करबो तोए सें दूर रए कि दुस्‍ट के संगै धरमी हों भी मार डाले, और धरमी और दुस्‍ट दोई की एकई दसा होए। जौ करबो तोए सें दूरई रए; का पूरी पृथ्‍वी कौ न्‍याय करबेवारो न्‍याय नें करे?”

²⁶ यहोवा परमेसुर ने कई, “जदि मोहों सदोम में पचास धरमी मिलें, तौ उनके कारन ऊ पूरी जांगा हों छोड़हों।”

²⁷ फिन अब्राहम ने कई, “हे पिरभु, सुन, मैं तौ माटी और राख आंव; तब भी मैंने इतेक ढिठाई करी कि तोए सें बातें करों।

²⁸ तब भी जदि उन पचास धरमियन में सें पांच घट जाएं; तौ का तें पांचई के घटबे के कारन ऊ पूरे नगर कौ नास करहै?” ऊने कई, “जदि मोहों ऊमें पैंतालीस भी मिलें, तब भी उनकौ नास नें करहों।”

²⁹ फिन ऊने ऊसें जा भी कई, “जदि उतै चालीस मिलें।” ऊने कई, “तौ मैं चालीस के कारन भी एैसो नें करहों।”

³⁰ फिन ऊने कई, “हे पिरभु, गुस्‍सा नें कर तौ मैं कछु और कहों; जदि उतै तीस मिलें।” ऊने कई, “जदि मोहों उतै तीस भी मिलें, तब भी एैसो नें करहों।”

³¹ फिन ऊने कई, “हे पिरभु सुन, मैंने इतेक ढिठाई तौ करी आय कि तोए सें बातें करों: जदि ऊमें बीस मिलें।” ऊने कई, “मैं बीस के कारन भी उनहों नास नें करहों।”

³² फिन ऊने कई, “हे पिरभु, गुस्‍सा नें कर, मैं एकई बार और कैहों: जदि ऊमें दस मिलें।” ऊने कई, “तौ मैं दस के कारन भी उनहों नास नें करहों।”

³³ जब यहोवा परमेसुर अब्राहम सें बातें कर चुको, तब चलो गओ; और अब्राहम अपने घर हों लौट गओ।